АСХЫС ТИЛІПЧЕ
06.05.2022
Хабарлар
Сомада: хазых хайраллаҷаң министр Олег АНАНЬЕВСКИЙНЕҢ «Хакасгражданстрой» ООО-ның директоры
Олег МАНЖУЛА олған имнег тура пӱдіриинің пастағы ӧзегін саапчалар
Нацпроекттер. Асхыс аалда ӱс улуғ пӱдіріг пасталды. Пу танығлығ мероприятиеде республика ӱлгӱлері араласханнар
Улуғ пӱдіріглерні азарға Хакасия пазының орынӌызы Ирина Войнова, аал хонии паза ас-тамах министрі Сергей Труфанов, пӱдіріг паза ЖКХ министрі Валерий Келин, культура министрі Светлана Окольникова, хазых хайраллаӌаң министр Олег Ананьевский, ӱгредіг министрінің пастағы орынӌызы Анатолий Бутенко килгеннер.
Иң пастағызын улуғ аалӌылар аймахта олған имнег туразы пӱдірілчеткен орынзар парғаннар. Анда пӱдірігнің ӧӧн подрядчигі «Хакасгражданстрой» ООО-ның ӧӧн директоры Олег Манжула имнег туразының проектінең таныстырған. Имнег туразы ӱс хадыллығ полар. Полған на хадылның пӧзии 3,6 метрге тиңнелер. Ол имнег туразында кӱнде 200 олған имнег полызиин ал полар.
Ирина Войнованың чооғынаң, пу кӱн Асхыс аймааның тархынына кір парар. Пӱдіріліп пасталчатхан имнег туразын аймах чуртағӌылары кӧп тус сахтапчалар. Халғанӌы туста Асхыс аймаанда кӧп пӱдіріг апарылча. Олған имнег туразы тузында тимге сығарыларына ізенерге чарир. Аны ізестіг подрядчик турғысча.
Олег Ананьевскийнің таниинаң, олған имнег туразы «Хакас Республикада пастағы имнег полызиин пирӌең учреждениелерні чахсыландырары» регион программазы хоостыра пӱдірілче. Ол республикада 2021 чылдаң чуртасха кирілче. Ирткен чылда Оот пилтірі аалда ФАП пӱдіріл парған. Асхыстағы объектті турғызары ӱс чылға кӧріл парған, ағаа 300-че миллион салковай позыдылар. Ідӧк аймахта ікі ФАП пӱдірілер, ол тоғыстарға 12 миллион салковай кӧріл парған.
Асхыс аймаа пазы Абрек Челтыгмашевтің чооғынаң, наа имнег туразын имӌілер дее сағыпчалар. Че мыннаң имнег туразының тилізі тохтабас, тӱрчедең Асхыста чӱрек-тамырлар ағырығлары кінін турғызар пӧгін пар.
Ідӧк ол кӱн улуғ аалӌылар чииттерге паза олғаннарға кӧріл парған культура-ӱгредіг кінінің паза 825 ӱгренӌее кӧріл парған школа пӱдіриин асханнар. Прай ӱс объектке хазна бюджедінең 2 миллиард артиинаң салковай позыдылар. Таныхтирға кирек, школа паза культура-ӱгредіг кіні «Аалларның тиксі тилізі» хазна программазы хоостыра пӱдірілер.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы