МАТЫРЛАР АЛНЫНДА ПАЗЫБЫС ТӦБІН ТӰЗІРЧЕБІС
13.05.2022
Хабарлар
Амғы тӧл «Ӧлімі чох полкнаң» хада поғдархаснаң парча
Илбек Чиңіс. 8 паза 9 Майда прай Россияда, ол санда Хакасияда, Илбек Ада чаадағы Чиңістің 77-ҷі чылына чарыдылған пайрамнығ кӧп мероприятие ирткен. Коронавирус ағырығ таранчатхан туста ікі чыл мындағ кӧп чоннығ пайрам иртірілбеен полған
ХУМАРТХЫЛАС РИТУАЛЫ
Республикада иртірілчеткен пайрамнығ мероприятиелер 8 майда Ағбанда Чиңіс паркында Успас от хыринда Хумартхылас ритуалынаң пасталған. Хакасия пазы Валентин Коновалов, парктың ӧӧн аллеязынӌа пастырып, Илбек Ада чаадағы полған на чылны таныхтапчатхан гранит плитазынзар чахайахтар салған. Аннаң андар ол, Успас отсар гвоздикалар салып, Чааӌылар сабланызы мемориал тӧзінзер, ӧнетін тимнелген орынзар, ӧӧн венок турғысхан. Аның соонӌа, олох чолӌа иртіп, чахайахтар паза венок салған Хакасияның Ӧӧркі Чӧп кнезі Владимир Штыгашев.
Хумартхылас ритуалын узаратханнар Хакасиядаң Россияның Федерация Чӧбіндегі кізілері Валерий Усатюк, Александр Жуков, Хакасиядаң Хазна Думазының депутады Сергей Сокол, Ағбандағы епархияның абыстары, Ағбан город пазының пастағы орынӌызы Владимир Жуковский, Ағбан городтың депутаттары чӧбінің кнезі Альберт Тупикин, Россия президентінің Сибирьдегі федеральнай округтағы кізізінің Хакасияӌа ӧӧн федеральнай инспекторы Николай Холодов, Ағбандағы гарнизонның пастығы, полковник Сергей Буланов, правительство кізілері паза даа пасхазы.
Веноктар паза чахайахтар салылған соонда, чаада чуртастарын пир салғаннарны сағысха киріп, пір минута сым турары чарлалған. Чааӌылар сабланызы мемориал тӧзінде турған чааӌылар, автоматтардаң киизер ӱс хати атып, салют иртіргеннер. Россияның паза Хакасияның гимннері толдырылғаннар, ӱбӱрчең оркестр «Чиңіс кӱні» сарынның кӧӧнең мероприятиені тоосхан.
Ідӧк 8 майда Ирт тағда орныхчатхан Ада чир-суубысты арачылап чуртастарын пир салған чааӌыларның хумартхы мемориал комплексінде «Алнындағы тӧллернің чӱректерінде сірернің махачыңар хачанға даа халар» республика акциязы ирткен. Пу мероприятиені олох мемориал комплексінде узаратхан тиксі Россияда иртірілчеткен «Хумартхылас свечізі» акция. Анда республиканың правительство кізілері, халых пірігістер, ӱгренӌілер, студенттер араласханнар.
ӦӦН ПАЙРАМ
9 Майда Ағбанда Пастағы май площадьында Илбек Чиңіс кӱніне чарыдылған ӧӧн пайрам ирткен. Тозыннығ, хазыр чилліг кӱннер турған соонда, пу ӱлӱкӱнге, ӧнетін чахаан чіли, чахсы кӱн турыбысхан.
Чиңіс кӱнінде хайдағ даа кӱн турза, чон сыбыра толдыра чыылысча. Ам даа площадь ибіре кізее иртчең оңдай чох полған. Кӧбізі палаларын чидініп ағылча, коляскалығ даа чииттер кӧп. Холларында флагтар, аймах ӧңніг шарлар тутчалар.
Правительство туразы алнында улуғ сцена турғыс салтырлар, аның ікі сариндағы трибуналарда ветераннар одырча. Площадьтың пасха саринда ідӧк улуғ нимес трибуналар кӧрігҷілерге турғызылғаннар, пулуңнардағы улуғ экраннарда площадьта ниме иртірілчеткені кӧзіділче. Мының алнында кӧп чаа техниказы полҷаң, анзы олған-узахха уғаа тузалығ полған, амды анда ӱс ле орудие кӧрінген.
Пайрамнығ мероприятиені театр кӧзідіглері пастааннар. Чайаачы ӧмелер, чаа тузындағы кип-азахты кизіп, Илбек Ада чаада полған аймах киректерні кӧзіткеннер. Мына ЗиС «полуторка» адалчатхан грузовик иртче, аның кузовында хызыл флагтар тудынған гимнастеркалығ чааҷылар турчалар. Хаптардаң арачыланҷаң точкалар пӱдірчелер паза даа пасха сценкалар кӧзіткеннер.
Площадьта турғызылған экраннардаң чонны ӱлӱкӱннең ветераннар, чииттер, юнармеецтер алғыстапчалар. Анаң митинг пасталған. «Парад, смирно!» - команда истіле тӱскен. «Священная война» кӧг толдырылча. Парадха кисчең кип-азахтығ Познанскай тимір чол бригадазының чааҷылары строевой хаалағнаң Россияның паза Чиңіс флагтарын ағылчалар. Ағбандағы гарнизон пастығының орынчызы Андрей Баринов гарнизонның пастығы, полковник Сергей Булановха гарнизон парадха тимдезінеңер рапорт итче.
Площадьта 17 парад расчеды турча (чааҷылар, МЧС тоғынҷылары, кӱс структуралары, юнармеецтер, кадеттер паза даа пасхазы). Сергей Буланов паза Андрей Баринов строевой хаалағнаң полған на командазар айланчалар. Гарнизон пастығы, изеннезіп, оларны Чиңіс кӱнінең алғыстапча. Полған на команда ӱс хати «Ура!» хыйғынаң нандырча.
Аның соонда митингте чыылған чонны паза чааҷыларны Хакасия пазы Валентин Коновалов Чиңіс кӱнінең алғыстаан.
- Аарлығ чир-суғҷылар, ветераннар! Сірерні Илбек Ада чаадағы Чиңістің 77-ҷі чылынаң алғыстапчам! 9 Май - иң аарлығ кӱн. Чыллар иртче, тӧллер алысча, че Чиңіс піске поғдархас, чаачылар сабланызының, махачызының тании полып халча. Пістің миллионнар чаахыбыс чаадаң айланмаан, амыр чуртағҷылар ыырҷыларның, нацисттернің бомбаларынаң чат халғаннар. Чобағ полған на сӧбірее теелген. Че Илбек Чиңіснең кӱс алынып, совет чоны, кӧдіріліп, хазнаны амғы тӧлге азахха турғысхан. Піске прайзына.
Чаа палалары! Чаа соондағы аар-чӱк сірерге артылған. Сірернің істенізіңер сылтаанда хазна иңзерілістең сығып алған. Промышленностьтығ, наукалығ, культуралығ сверх-держава полыбысхан.
Хакасияның 70 муңҷа чуртағҷызы фронтсар парыбысхан, 30 муң азыра чир-суғчыбыс аннаң айланмаан. Ағбанда тӧстелген Пирятин дивизиязы, матыр чаалазып, Европаны арачылаан. Піс оларның махачызынаң поғдархапчабыс, чиңісчілернің тархынын хайраллапчабыс, олар, постарына айабин, сабланыстаңар паза сыйыхтардаңар сағынмин, нацист азымахчыларын чох иткеннер.
Ачырғастығ, 77 чыл пазынаң пістің хазнаа Украинада пазын кӧдірчеткен нацизмнең паза бандеровщинадаң тоғыр пазох кӱрезерге килісче. Че піске пілерге кирек, Бандераа паза Шухевичке тудынчатханнарның кистінде Запад турча, олар пазох нацизмге хабасчалар. Піс оларға ам тоғырланчабыс!
Запад сыбыра прайзы тиң праволығ полчатханнаңар чоохтачаң, ам, тізең, аннаңар пір дее ниме испеен чіли тудынча. Хазналарны «сынға» паза «сын нимеске» кӧнізінең чарча. Іди ол нацизм паза расизм сағыстарын пазох тӧрітче.
Че піс оларға іди поларға пирбеспіс! Нацизмге, расизмге, бандеровщинаа сӧп-сап тӧкчең чирде орын! Пістің чоныбыс хахан даа сынның хадаанда турча. Піс ӧбекелерібістің сағыстарын, оңдайларын хаҷан даа алыстырбаспыс!
Санкциялар даа полза, пісті типсирге, тӧбін пазарға хайди даа кӱстензелер, Россия, аннаң хада Хакасия, тиліп ле турарлар! Піс хадабыс! Пістің худыбыс кӱстіг! Кӱзібіс уғаа улуғ! Піс алнынзар тӧреміл парчабыс! Ізенчем, піс матыр ӧбекелерібістің хумартхызына турызарбыс! Чиңіс пісти полар! - теен Валентин Коновалов.
Митингте ідӧк Хакасияның Ӧӧркі Чӧп кнезі Владимир Штыгашев чонны Илбек Чиңіс кӱнінең алғыстаан. Аның чооғынаң, Илбек Чиңіс харах частығ. Ноға? Піс ирткен чаа чылларын чахсы пілчебіс. Пирятин дивизиязынаң пасха, Хакасия фронтсар 50-ҷе батальон паза полк ысхан. Пістің чідіріглерібіс, чонны проценттер хоостыра саназа, Белоруссияның чідіріглерінең кӧп полған. Хакасиядаң 5 муң азыра ипчі фронтсар парған. Харатастағы летчиктер школазын тоосханнарның 14 кізізі Совет Союзының Матыры полыбысхан, пір кізі - ікі хати Матыр. Фронтсар Хакасия 19,5 муң ат ысхан. Амды Россия Украинада ӧнетін чаа операциязын иртірче, андағы фашисттерні, нацисттерні чох итче. Харындас Украина хаҷан даа піснең хада полар. Амды Илбек Ада чаа матырларының матыр ооллары, пархалары ӧс парғаннар.
Пір минута сым турары чарлалған соонда, Валентин Коновалов чонны пазох ӱлӱкӱннең алғыстаан:
- Пӱӱн піске амыр чуртас сыйлааннарны, сағысха киріп, алғыстапчабыс. Матырлар хаҷан даа ундулбастар! Аарлас - ветераннарға! Пазыбыс тӧбін тӱзірчебіс! Аарлығ ветераннар, пик хазых алғапчам сірерге, хыныс, сағыссырас сірерні сыбыра ибірзін! Хакасияның прай чуртағчыларына часка, чахсы чуртас, ӧрініс алғапчам! Ӱлӱкӱннең! Илбек Чиңіс кӱнінең! Ура!
Парадха тимнен салған командалар ӱс хати «Ура!» нандырғаннар.
Россияның паза Хакасияның гимннері толдырылған соонда пайрамнығ марш пасталған. Площадьча мотовездеходтар 8 фронттың штандарттарын апарғаннар.
Хакасия пазы Валентин КОНОВАЛОВ паза
Ӧӧркі Чӧп кнезі Владимир ШТЫГАШЕВ пайрамнығ митингте
Анаң ретроавтомототехника ирткен. Хызыл Знамялығ Познанскай бригаданың тахталар, понтоннар батальоннары, 24-ҷі алынҷа зенитно-ракетнай бригаданың командалары ирткен. Пастағызын на Пастағы май площадьынча Ракеталығ бригаданың, «Боевое братство» пірігістің командалары, ХГУ-ның, ХТИ-ның студенттері ирткеннер. Парадта кӱс структураларының, юнармеецтернің командалары паза даа пасха расчеттар араласханнар.
ӦЛІМІ ЧОХ ПОЛК
Чылдаң чылға «Ӧлімі чох полк» чӧрімге кӧп араласчы хозылча. Пӱӱл 9 Майда Ағбан городтың 15 муң азыра чуртағҷызы матыр пабаларының паза ағаларының сомнарынаң Н.Г.Булакиннің адынаң «Ағбан» спорткомплекс хыринда чыылысхан. Таныхтирға кии-рек, пандемия ӱчӱн пу чахсы акция ікі чыл онлайн ирткен. Аннаңар пӱӱлгі «ӧлімі чох полкты» прайзы чидікпин сахтаан.
12.00 часта улуғ колонна, спорткомплекстең тибіреп, Лениннің орамазынңа пастыр сыххан. Прайзының алнында Хакасия пазы Валентин Коновалов паза Ағбан город пазы Алексей Лёмин парғаннар. Валентин Олегович ағазының пабазы, майор полған Фёдор Кузьмич Циприковтың сомын апарған, Алексей Викторович - тай ағазы Савелий Максимович Бахтигозиннің сомын.
Харын, тасхар айас кӱн турған, анзы чӧрім араласчыларының кӧңнін улам кӧдірген. Колоннада парчатханнар, матыр туған-чағыннарының сомнарынаң пасха, ідӧк Чиңіс Знамязын апарғаннар. Олған-узахтың холыҷахтарында ах, хызыл паза кӧк ӧңніг шарлар кӧрінчеткеннер. Т.Шевченконың паза Г.Вяткиннің орамаларынзар чағдапчатханда, «ӧлімі чох полксар» улам кӧп кізі хозылған. Чӧрім тузында оол-хыстар ӱс хати «Ура-а-а!» тіп хысхыр турғаннар паза «Катюша» сарынны толдырғаннар.
Ол арада піс чуртағҷыларнаң чоохтазарға маңнанғабыс, олар кемнің сомнарын апарчатханнарын искіргеннер.
Виктория КУЛИМЕЕВА:
- Мин ағамның сомын апарчам. Ол іҷемнің пабазы полған. Ады Николай (Денис) Владимирович Кайлачаков (1908 -1988), Асхыс аймаандағы Картой аалдаң. Хайди ічем чоохтачаң, ағам чаада Николай аттығ чӧрген, пічіктерде Денис пазылых полған. Ол чаадаңар кӧп чоохтабаҷаң одыр. Пір чыл чарым чааластыр, пленде ӱр полтыр.
Ідӧк хонғанымның ууҷазы Ефросинья Павловна Пахтаеваның (Боргоякова) сомын апарчабыс. Ол Социалистическай Істеніс Матыры полған. Асхыс аймаандағы Абрамнар аалда чуртаан. Чаа тузында хыра тоғызында уйғу-чадын пілбин тоғынған.
Ӱзінчі сомда - Терентий Иосифович Пахтаев. Ол хонғанымның ағазы, Асхыс аймаандағы Ылырсы аалдаң полған. Чаадаңар кӧп чоохтаҷаң. Хызыл Армияа 1941 чылда хабылған. Илбек Ада чааны тооза ирткен, Берлинге читкен.
Сомнарны мин палаларым Анастасия паза Кирилл Кулимеевтернең хада апарчам. «Ӧлімі чох полк» чӧрімде пастағызын на араласчабыс.
Александр ТЫГДОМАЕВ:
- Мин позым Таштып аймаандағы Чоғархы Ибіг аалдаңмын. Пӱӱн пабам Николай Трофимович Тыгдомаевтің (1912 - 1976) сомын апарчам. Ол Асхыс аймаандағы Оот пилтірі аалдаң полған. Пабам чаадаңар чоохтирға хынмаҷаң. Фронттаң айланғанда, Чоғархы Ибігдегі колхозтың кнезі полған. Аннаң сығара тӧрт хати ВДНХ-зар чӧрген.
Пірсінде ол колхоз тоғысчыларына халасты пос кӧңнінең тикке ӱлебіскен. Анаң аны Асхыссар хығыртыбысханнар. Райкомның кнезі теен: «Коля, син ниме ит салдың? Полған на колхозтың кнезі халасты пос кӧңнінең ӱлезе, ай-пораан пасталыбызар». Анаң пабамны хайди хатығлирға пӧк сыхханнар. Ағбанзар сығдырадып, тееннер: «Николай Трофимович тӧрт планны толдыр салған. Артых халған халасты ӱлебіскен». Ағбандағылар Хызылчарзар сығдыратханнар. Андағылар даа пабамны хайди идерге пілбееннер. Хызылчардағылар Москвазар искіргеннер:
- Мында пір колхоз кнезі пос кӧңнінең халас ӱлебісті.
- Хайдаң ол халасты алған? - сурғаннар москвадағылар.
- Ӧскіріп алғаннар.
- Планны толдырыбысханнар ба?
- Я, тӧрт план толдырыбысханнар.
- Ам ниме идерге сағынчазар колхоз кнезінең? - сурғаннар москвадағы пастыхтар.
- Пілбинчебіс, арса, аны ат саларға кирек? - нандырғаннар хызылчардағылар.
- Сірер анда алчаах пардыңар ба?!-хырыссыхханнар москвадағылар. - Ағаа орден пирерге кирек.
Іди пабама Лениннің орденін пиргеннер паза ВДНХ-зар хығыртханнар.
Пабам ВДНХ-даң холмогорскай тӧлліг інектерні Хакасиязар ағылған. Аның ӱчӱн тың поғдархаҷаң.
Юлия НОВИЦКЕНЕ:
- Мин «Ӧлімі чох полк» чӧрімде ағам Антип Владимирович Чебодаевтің сомын апарчам. Ол Илбек Ада чааға 23 июньда 1941 чылда Пии аймаандағы Маткичіг аалдаң парған. Ибзер 1945 чылда 9 Май соонаң айланған. Чаадаңар чоохтирға хынмачаң. Че пірсінде хайди аны самнах ал халғаннаңар чоохтаан. Аның ах хорғамчыл самнах пар полған. Ол аны сапогының тӱрейінде ал чӧрҷең. Хазыр чаалазығ тузында снаряд кизегі пабамзар учух килген. Ол самнах пабамның азағын ал халған. Піс ол самнахты ӱр хайраллаабыс.
Ікінҷі сомда ідӧк минің ағам, ады - Пётр Георгиевич Кильчичаков (1906 - 1963). Ол Асхыс аймаандағы Оот пилтірі аалдаң. Чаа тузында разведчик полған. 1942 чылда істінең аар палығладыбысхан, анаң сигіс чыл ӱс ай Москвадағы госпитальда чатхан. Ибзер 1953 чылда айланған. Чаа соонаң Ӱс чулдағы ортымах школада география ӱгретчізі полып тоғынған, интернатта воспитатель полған.
Галина ТУТАЧКОВА:
- Сомда минің пабам Яков Романович Аткнин (1919 -1996). Ол Алтай аймаандағы Хубачар аалда тӧреен. 1939 чылда пабам 16 частығ полған. Аның нанҷыларын армияа апарыбысханнар. Пабамны албааннар. Ол пӧзік сыннығ оол полған. Анаң пабам позының чазын хозып алған. Іди 1939 чылдох ол 20 частығ пол парған. Арғыстарынаң хада Ыраххы Востоксар кавалерияда служба иртерге чӧрібіскен. 1942 чылда аны I Украинскай фронтсар ызыбысханнар. Анда разведгруппаның командирі полған. Аар палығлатхан соонаң 1944 чылда ибзер айланған. Пабам Илбек Ада чаа паза Хызыл Знамя орденнерінең таныхтатхан.
Анна АСОЧАКОВА:
- Мин ағам Владимир Павлович Тодиновтың паза ууҷам Мария Всеволодовна Тюнистееваның сомнарын апарчам. Ағам Владимир Павлович Асхыс аймаандағы Казанов аал чӧбінің кнезі полған. Улуғ хомзынысха, ол ханнығ чаада ізі чох чіт парған.
Минің пабам Геннадий Владимирович ӧкіс халған. Ол Хакас национальнай школа соонаң Хызылчарда летчикке ӱгренген. Пабам гражданскай авиацияның пастағы хакас летчигі полған.
Татьяна САРЛИНА паза Надежда ЧЕРПАКОВА, ікіс пиче:
- Піс ағабыс Василий Семёнович Баскучековтың сомынаң парчабыс. Ол Таштып аймаандағы Пыдырах аалдаң полған. Андартын чааға хабылған. Ізі чох чіт парған тіп саналған. Ӱр ниместе ағабыс Смоленск хыринда чатча тіп піліп алғабыс. Ӱреен соонаң Хызыл Чылтыс орденінең таныхтааннар.
Лариса КОСТОЧАКОВА:
- Мин пабам Андрей Сергеевич Асочаковтың (1915 - 1970) сомын холда тутчам. Ол Асхыс аймаандағы Пилтір аалда тӧреен. Пабам Выборг городта срочнай служба иртчеткенде, хорғыстығ чаа пасталыбысхан. Андартын 1943 чылда оң холынаң тың палығлат салып айланған.
Чааласхан кізілер кӧп чоохтанмачаңнар. Че пір хати искем, хайди пабам чоохтаан, ыырҷынаң харахтаң харахха тоғас парза, піреезі андар удур чӱгӱр сыхчаң. Андада аны ат салчалар. Тизерге кӱстенчеткеннерні ідӧк атыбысчалар. Пабам кізі соонда халбасха паза алнында чӧрбеске кӱстентір.
Ол ӧкіс ӧскен, аннаңар чаада сағынчаң полтыр «ӧл парзам даа, минің ӱчӱн пірдеезі ылғабас». Іди, саңай сағынып, ыырҷаа удур хорыхпин парчаң полтыр. Хыринҷа ухтар сыылап ла турғаннар.
Пірсінде немецтерге ибіртібістірлер. Пабам андартын чалғызан на хазых сығып алтыр. Чаадаң айланғанда, пабам Пилтірде чабан полған.
Лариса МОХОВА:
- «Ӧлімі чох полк» чӧрімге мин пабам Антон Николаевич Моховтың (1913 - 2005) сомынаң килгем. Ол Ағбан пилтірі аймаандағы Хапчал аалда тӧреен. Пабамны Хакасияда кӧбізі таныпча. Профессиязы хоостыра ол ӱгретчі полған. Чаа алнында Асхыс аймаандағы Казанов аалдағы школада директор полған.
1943 чылда армияа хабылған. Танкисттер курстарын ирткен. Анаң Курск тӱгеезіне кір парған. Ідӧк ол Украинаны, Польшаны, Румынияны, Венгрияны азымахчылардаң арачылаан. Ханнығ чааны Австрияда тоосхан. Чаада ікі хати палығлатхан. Анда ол кӧп нанҷызын чідір салған.
Чаа соонаң Ағбандағы ӱгретчілер институдында ӱгренген. МГУ-да аспирантура тоосхан. Пабам Антон Николаевич Мохов Хакасияда педагогика наукаларының пастағы кандидады полған. Аспирантура соонаң Хакас национальнай школаның директоры полып тоғынған.
Иліг чыллар тоозылчатханда, піс Хырғыс чирінзер кӧс парыбысхабыс. Пабам іҷемнең хада андағы университетте тоғынғаннар. Іҷем Галина Антоновна Орешкова тархын наукаларынаң айғасхан. Тоғызон чылларда, тынаға сыхханда, іҷемнең пабам Хакасиязар нандыра айланғаннар.
Пабам позының сыйыхтарын Хакас национальнай гимназияа сыйлап пирерге чахаан. Ол Илбек Ада чаа паза Хызыл Чылтыс орденнерінең, «За освобождение Будапешта», «За освобождение Вены» медальларнаң таныхтатхан.
Николай КЫСТОЯКОВ:
- Минің пабам Иван Павлович Кыстояков Алахтайлар аалынаң полған. Андада ол аал Асхыс аймаана кірҷең. 1940 чылда пабам армияа парған. Польша хырығларында служба апарған. Анда немецтерге ибіртібіскеннер. Ікі хати палығлатхан. 1946 чылда ибзер айланған. Хызыл Чылтыс орденінең паза «За отвагу» медальнаң таныхтатхан. Чуртас тооза совхозта шофёр полып тоғынған.
Пабам чаадаңар кӧп чоохтачаң. Пір хати бронемашиналығ париғаннар, пабам руль кистінде полған, хыринда чиит лейтенант одырған. Анаң ыырҷыларның самолёттары атакаа кір сыхханда, пістің чаахылар машиналардаң сегіргеннер. Чиит лейтенант, пабамны ідібізіп, ӱстӱне чадыбысхан. Самолёттар учуғыбысханнарында, пабам лейтенантты хыймыратча. Анзы сым на чатча. Іди ол позының чуртазынаң пабамны ал халған. Аның ӱчӱн пабам ікі кізінің ӱчӱн чуртирға кӱстенген.
Мин «Ӧлімі чох полк» чӧрімде чыл сай араласчам. Ветераннарыбыстың сомнарынаң хости парза, чӱрекке поғдархас толча. Матырларыбысты хахан даа ундутпаспыс.
Ӱлӱкӱнде чуртағҷыларны Хакасияның театрлары, филармония, ХГУ-ның искусстволар институды, С.П.Кадышевтің адынаң культура кінінің ӧмелері, концерттер кӧзідіп, ӧріндіргеннер. Иирде пайрамнығ салют полған.
Автор :
Николай СУЛТРЕКОВ, Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы