ОЛАР ПІСТІҢ САҒЫЗЫБЫСТА
13.05.2022
Хабарлар
«Алтынай» хакас ипчілер халых пірігізінің араласчылары Юлия ШРОО паза Ираида АХПАШЕВА
Кӧзідіг. Илбек Чиңіс кӱніне «Алтынай» хакас ипчілернің халых пірігізі «Іӌенің чирі» хоос фильмні республиканың аалларынӌа ал чӧрген
Сілкер айының 7-ӌі кӱнінде хоос фильм Пии аймаандағы Хызыл хара суғ аалзар читкен. Аны кӧріп аларға чаа палалары, тыл істенӌілері паза пасхазы килгеннер. Ідӧк танығлығ мероприятиеде Пии аймаа пазы Иннокентий Стряпков паза Улуғ Нонып аал чӧбінің пазы Андрей Челтыгмашев араласханнар. Улуғ аалӌыларны айраннаң паза талғаннаң удурлааннар.
Пайрамнығ иирні Хакасияның саблығ артизі Ираида Ахпашева асхан, ол «Тадар чирім» сарынны толдырған. Хайди таныхталған мероприятиеде, Илбек Ада чаадаңар кӧп фильм суурылған, кӧп ыр сарналған, кӧп кибеліс чоохталған, кӧп кинде пазылған. Андағ даа полза, ол тоғыс хаӌан даа тохтадылбас. Ол чаадаңар толдыразынаң хаӌан даа чоохтап полбас. Хорғыстығ чылларны ирткен чир-суғӌыларыбыстың кӧбізі амды изен нимес. Че олар пістің сағызыбыста хаӌанға даа халарлар.
Андрей Челтыгмашев, чир-суғӌыларын ӱлӱкӱннең алғыстап, таныхтаан:
- 77 чыл мының алнында ағаларыбыс ол хорғыстығ чаада чиңіс тутханнар. Че фашизмнең тоғыр чаа тохтабаан. Амды пістің чааҷыларыбыс Украинада нацизмнең тоғыр харбасчалар. Хакасияның ооллары Украинада иртчеткен ӧнетін чаа операциязында ідӧк араласчалар. Прайзын чағдапчатхан Илбек Чиңіс кӱнінең алғыстапчам.
Иннокентий Стряпковтың чооғынаң, пӱӱл Илбек Ада чаа араласчызы, Совет Союзының Матыры Михаил Чебодаевке 100 час толарӌых. Ол Киндірліг пилтірі аалда тӧреен-ӧскен. Матырның тоғылах чазына Пии аймаанда мероприятие иртірері кӧріл парған. Илбек Ада чаа тузында тыл істенӌілеріне аар тоғысты толдырарға киліскен. Амғы чиит тӧлге ол хорғыстығ чыллардаңар пілерге кирек.
Алғыстас сӧстері соонаң кӧрігӌілер «Іӌенің чирі» хоос фильмні кӧріп алғаннар. Анда ипчілернің чаа тузындағы чуртазы кӧзіділ парған. Иреннер чааға парыбысханда, прай аар тоғыс ипчілер иңнілеріне артылған.
Чаа палазы Елизавета Сагалакованың тайызы чаада чат халған, хасты чаадаң айланған, че аннаңар ол чоохтирға хынмаӌаң.
- Іҷелерібіс хараа-кӱнӧрте хырада тоғынңаңнар. Фильмде анзын чахсы кӧзіт пиргеннер. Ипчілерге паза палаларға хатығ чуххан, - сағысха кирче Елизавета Иосифовна.
Фильм тоозылғанда, «Алтынай» пірігіс кнезінің орынӌызы Юлия Шроо чоох тутхан. Аның сӧстерінең, чир-чайаан піске улуғ сыйых иткен - сағыс пирген. Сағыс кӧп киректі ӱр тус ундутпасха оңдай пирче. Илбек Ада чаадағы киректер тархында халғаннар, че анда чуртастарын пир салған кізілерні, харах частығ Илбек Чиңісті чон хаӌан даа ундутпас. Ол киректернің киречілері ах чарыхтаң парыбыссалар даа, аннаңар сағыс кӧп чыл чуртир. Пурунғызын пілбинчеткен чонның таңдағызы чоғыл. Піс чаадаңар ундут салзабыс, ол пазох айланар.
Ираида Ахпашеваның чооғынаң, «Алтынай» пірігіс, Илбек Чиңіс кӱніне чарыдып, мындағ тоғазығларны чыл сай иртірче. Пӱӱл пірігіс ідӧк Орджоникидзе аймаандағы Майрастар аал чӧбінде пол килген. Анда Илбек Ада чаа араласчылары халбаан, мероприятиее чаа палалары чыылысханнар.
- Пу фильмні «Алтынай» пірігіс 60 муң салковай грант ахчазына суурған. Чиңіс кӱніне чарыдып, аны республика аймахтарында кӧзітчебіс. Пӱӱл фильмні Пии паза Орджоникидзе аймахтарынха ал чӧргебіс. Пазағы чылларда пасха аймахтарзар парарбыс, - чоохтапча «Алтынай» пірігістің кізізі Ираида Захаровна.
Андрей Челтыгмашевтің сӧстерінең, пӱӱнгі кӱнде Улуғ Нонып аал чӧбінде ветераннарның ӧкіс халған ипчілері паза тыл істенӌілері санына кірчеткен тӧрт кізі халды. Ідӧк 30-ча чаа палазы чуртапча.
- Минің кӧрізімнең, пу фильмні аймахтарҷа ал чӧрчеткені уғаа чахсы. Ол, пос тілінең суурылып, Хакасияның тархынын кӧзітче. Илбек Ада чааны чоныбысха кӧзідерге кирек, - таныхтапча Андрей Петрович. - Чииттерні чир-сууна хынарға ӱгредіп, школаларда паза культура тураларында аймах мероприятиелер иртірілче. Спорт марығларында оол-хыстар, республика синіне сығып, пос аалы ӱчӱн турысчалар. Пістің аал чӧбінің саблығ спортсменнері прай тилекейге сабланчалар, кӧзідімге Карамчаковтар сӧбірезі.
Амғы туста Улуғ Нонып аал чӧбі чааға парған чир-суғӌыларынаңар істезігліг тоғыс апарча. Ідӧк чаадаң айланған, че амғы туста изен нимес ветераннарның аттары хумартхы тастарзар кирілчелер.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде