БЮДЖЕТТІҢ ТОЛДЫРЫЛҒАНЫНА - СЫН ПААЛАҒ
25.05.2022
Хабарлар
Азых ӱзӱріглер. Пу наада «2021 чылда Хакасияның республика бюджеді толдырылғанынаңар» закон проектінің азых ӱзӱріглері ирткен
Азых ӱзӱріглерге Хакасияның Ӧӧркі Чӧбінің улуғ залында республика парламентінің депутаттары, правительство кізілері, сыныхтағ-сананыс палатазының кнезі Ольга Лях, кізі праволарынча уполномоченнай Андрей Шулбаев паза хай пірее город-аал пастары чыылысханнар. Президиумда, тізең, Ӧӧркі Чӧп кнезінің пастағы орынҷызы Юрий Шпигальских, бюджет паза налог политиказынҷа комитет кнезі Олег Иванов паза республика пазының орынҷызы Ирина Войнова одырғаннар.
- 2021 чыл - прай саринаң пасхаҷыл чыл. Тилекей чырғалында металлға паза хара тасха паалар ӧскеннеңер, республика бюджедінің парыстары пілдірте ӧс парған. Олох туста Россияда полбаан кирек полған: Хакасияның 2021 чылға бюджедінеңер республика законы сын ниместеңер чарғы чарадии алылған. Прай субъекттер хайиинда полғабыс. Піссер ситкіп кӧргеннер! Че ол сидік киректі пӧкчең оңдай табылғанох. 2022 чыл ідӧк пасхаҷыл чыл. Ол Украинадағы киректернең палғалыстығ. Аннаңар піске алызығларның теелізін тузында паалап пілерге паза ирткен чылның бюджедін сын ӱзӱрерге кирек, ол тоғыс пу чыл тоозылза, бюджет парызы саналза кӧрінер, - айланған чыылған чонзар, ӧӧнінде бюджетті толдырарынаң кӧні палғалыстығ улуссар, Юрий Шпигальских.
Хакасияның финанстар министрі тоғызын толдырчатхан Игорь Тугужеков, «2021 чылда Хакасияның республика бюджеді толдырылғанынаңар» закон проектінең таныстырып, ӧӧн хайығны чидіглерге айландырған. Хайди алында таныхталған, ол бюджет парызы. 2021 чылда республика бюджедінің налог парызы 2020 чылдағызынаң 68 %-ке кӧп чыылған. Аның сылтаанда пістің бюджет профициттіг пол парған. Кӧрчебіс таблицада.
Парыстар. Республика бюджедінзер кірчеткен прай парыстарны кӧрзе, олар 2020 чылдағызынаң ортымахти 26,8 %-ке хозыл парғаннар паза 46 миллиард 928 миллион 149 муң салковайға читкеннер, ол санда налог парыстары - 29 миллиард 394 миллион 734 муң салковай (ирткен чылдағызынаң 68,6 %-ке кӧп), налогтаң нимес парыстар - 568 миллион 527 муң салковай (54%-ке кӧп), айландырылбас ахча - 16 миллиард 964 миллион 888 муң салковай (11,7 %-ке тӧбін).
Хорадығлар. 2021 чылда республика бюджедінең 44 миллиард 877 миллион 348 муң салковай хорадылған. Чуртас-культура киреене 32 миллиард 274 миллион 904 муң салковай позыдылған, ол санда ӱгредіге -12 миллиард 259 миллион 599 муң салковай, культураа - 984 миллион 222 муң салковай, хазых хайраллирына - 6 миллиард 351 миллион 83 муң салковай, социальнай политикаа - 12 миллиард 229 миллион 351 муң салковай, физкультураа паза спортха - 450 миллион 649 муң салковай, национальнай экономикаа паза чурт-коммунальнай хоныхха - 6 миллиард 804 миллион 187 муң салковай, ол санда аал хониина - 1 миллиард 217 миллион 694 муң салковай, транспортха паза чол хониина - 2 миллиард 672 миллион 528 муң салковай, чурт-коммунальнай хоныхха - 1 миллиард 375 миллион 111 муң салковай. Пу хорадығларға ідӧк бюджет учреждениелері тоғынчыларына чал ахчазы кирілген.
Чидіглер. Хазна ӧдізі 1 миллиард 199 миллион 50 муң салковайға хызырыл парған паза чыл тоозыларына 23 миллиард 275 миллион 780 муң салковайға тиңнелген, ағаа хоза, ӧдістің коммерческай чардығы бюджет кредидіне орнастырылған. Тузында тӧлелбеен ӧдістер сині 12,9 хати хызырылған паза 39 миллион 72 муң азыра салковайға тиңнелген, кредиторлар ӧдізі ідӧк хызырылған. Чал ахчазы чыл ибіре тудығ чох тӧлелген.
Чӧптер. Хакасияның Ӧӧркі Чӧбі, сыныхтағ-сананыс палатазы, Хакасияның кізі праволарынҷа уполномоченнайы паза пасха араласчылар республика правительствозына бюджетті толдырарынӌа чӧптер тимнеп салғаннар. Ол санда чир ис-пайын анирынаң хыйа парар ӱчӱн, регионзар тартылчатхан инвестициялар пӱдізін алыстырарға; парыс ӧскірҷең оңдайларны алғыдарға; хазна программаларын чуртасха кирерге федеральнай бюджеттең тартылчатхан ахча синін ӧскірерге паза аннаң толдыразынаң тузалан турарға; регион синінде ӧкіс ӧскеннерге чурт читірҷең оңдайны, кӧрілген закон хоостыра нааӌылирға; республикада читіре пӱдірілбеен социальнай кӧстегліг тураларны санға аларға паза оларның санын хызырарға; хазна ӧдізін синдірерге паза 2030 чылға теере Хакасияның чуртас-экономика стратегиязын чуртасха кирҷең тоғыстар планына алызығлар кирерге паза пасхазы. Чоохтирға кирек, халых ӱзӱріглерінде ідӧк Хакасияның профсоюзтар федерациязының кнезі Евгения Ольховская чоох тутхан. Ол алында пионер лагерьлері полған, амды палалар хазиин пиктеӌең лагерьлерге тиксі тыхтағ киректелчеткеніне, ЖКХ сурығлары ааллар синінең аймахтарға пиріліп, тоғынӌылар правозы сайбалчатханына хайығ айландырған паза «Шира кӧл» курортта ӧрт сығысхан сылтаанда ӱреділген хырны нааӌылирға республика бюджедінең ахча позыдарға сурынған.
Юрий Шпигальских, прай чӧптер санға алылып, парламент чарадиина кирілерін таныхтаан. Пазағы сессияда, хандых айының 1-ғы кӱнінде, «2021 чылда Хакасияның республика бюджеді толдырылғанынаңар» закон проектін Ӧӧркі Чӧп депутаттары ӱзӱрер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде