ИДІНҶЕКТЕР - КӰСТЕНҶӀК ЧОН
01.06.2022
Хабарлар
Хакасия пазы Валентин КОНОВАЛОВ паза респубиканың ӧткін идінҷектері
Сыйыхтас. Россияның Идінҷектер кӱнінде Хакасия пазы Валентин Коновалов пос киреенең айғасчатханнарнаң тоғасхан паза оларны алғыстаан
- Пос кирее экономикабыстың ӧзені полчатханын прайзыбыс пілчебіс, - пастаан чооғын Хакасия пазы Валентин Коновалов. - Сірернің араңарда таланттығ, пастағчы кізі кӧп, сірер тоғыс орыннарын тӧстепчезер, чуртағҷыларға киректелчеткен ниме-нооны паза полызығларны читірчезер, чон чуртазын истіг итчезер. Республика бюджедінің 13 процент парызы - ол кічіг паза ортын пос киреенің хозымы. Нинҷе-де чыл идінҷектер саны хызырылған соонаң 2021 чылда республикада пос киреенең айғазарға чаратхан 500 кізее кӧп пол парған, аннаң пасха, посха тоғыс таап чатханнар санға чахсы алылча, ол, тізең, ідӧк пос киреенің чардығы.
Валентин Олегович идінҷектер хайдағ даа хығыртығларны сыдамах, турыстыра паза сидіксіністерге пазындырбин иртчеткеннерін таныхтаан. Халғанҷы чылларның андағ хығыртии наа чуғынчах ағырығ - коронавирус - полыбысхан. Аннаң пасха, алында кидеркі хазналарның хатығластары килкім не компанияларға теелген полза, амды олар кічіг паза ортын пос киреене дее теелчелер. Че федеральнай паза регион синінде алылған чарадығлар тузазын кӧзітчелер.
- Республиканың тилізіне тоғынчатхан ӱчӱн алғызым читірчем, - алғыстаан республика пазы.
- Пик хазых паза сағынған сағыстарыңны чуртасха маңнаныстығ кирерге алғапчам!
Пу сӧстер соонаң Хакасия пазы Валентин Коновалов идінҷектерге позының алғыстазын читірген. Алғыстасха ідӧк турысхан Асхыс аймаанда пос киреенең айғасчатхан Елена Бурнакова. Бурнаковтар халас тимнирінҷе пос киреен 1995 чылда пастааннаң пу тусха теере аннаң айғасчалар. Елена Вадимовнаның амғы тусты ыраххы 90 чылларнаң тиңнестірчең оңдайы пар, хаҷан чонға халас сығарызы пілдірте хызырылған, олар Асхыс аймааның полған на ыраххы аалынзар аны читірчеңнер. Пір лоток халасты даа чонға читір пирер ӱчӱн, Асхыстаң машинаны ысчаңнар. Ам пірдеезі іди тоғынмас. Халас сығарчатханнар даа саны хозылча. Идінчек, тізең, пос киреен алғыдып, пасха даа ас-тамах сығар сыххан.
- Амғы идінҷектерге, пос киреен азарға сағынчатханнарға прай ниме айада пирілче тиирге чарир, - таныхтапча Елена Вадимовна. - Республикада идінҷектерге хабасчаң уғаа чахсы кін тоғынча. Пӱӱнгі кӱнде піс адыбысты алыстырчабыс, аннаңар прай ас-тамаабысха наа сертификаттар аларға кирек. «Минің пос киреем» кін ол полызығны аларға полысча, идінчек аның ӱчӱн ахча тӧлебинче.
Елена Вадимовна республиказар туристтер киліп пастабысханына ӧрінче. Хакас чиизін тимнепчеткен кафе ээзі амғы туристтер чон ас-тамаанаң танызарға хынчатханнарын таныхтапча. Алында туристтер, оларның кафезінзер кірзелер дее, удаа олаңай чиисті чахычаң полтырлар. Че, андағ даа полза, идінчек хакас ас-тамаан Европа кирексіністеріне килістіре тимниріне кӧстег тутча.
Ӱлгӱлер идінчектің тузазын нинҷе тоғыс орнын тӧстеенінең паза налог тӧлепчеткенінең паалапчалар. Елена Вадимовнаның предприятиелерінде 40 кізі тоғынча. Ӧӧн ӧме чылларнаң тӧстелген тиирге кирек. Аннаң пасха, аймах синіндегі ӱлӱкӱннер идінҷек хабазии чох иртпинче. Хайди таныхтаан Хакасияның экономика тилізі министрі Виктор Богушевич, идінҷек хайда даа иң артых поларға кӱстенче. Елена Бурнакова сығарчатхан ас-тамаан ідӧк чахсы тимниріне улуғ хайығ айландырча. Ол тоғыстың салтары - предприятиенің ас-тамаа «Иң артых 100 ниме-ноо» Россия марииның федеральнай даа, регион даа синінде сыйиина турысчатханы.
Сыйыхтар читірілген соонаң идінҷектер республика правительствозы пос киреенең айғасчатханнарға чахсы хабазығ оңдайларын тӧстепчеткенін таныхтааннар. Республика пазы, сурығлар, сидіксіністер полза, айланарға сурынған. Чӧптернің пірсі идінчектернің киреен сабландырарына теелген. Идінҷек ады хазна синінде пӧзік паалалза ла, чуртағҷылар пос киреенең хынып айғазарлар тіп салтар иділген. Нименең аны кӧзідерге чарир? Пенсия синінең. Идінҷектің пенсиязы ол тӧстеен тоғыс орыннары санынаң палғалыстығ поларға кирек тіп санапча идінчектернің пірсі. Сағам ол чахсы сағыс чіли санға алылған. Арса, пірее чыл пазынаң чуртасха даа киріл парар.
Идінҷектер ідӧк тоғазығ оңдайларын алыстырарға сурынғаннар. Прайзы ла костюм-галстуктығ чӧрерге хынминча, аннаңар сала пос оңдайлығ тоғазығ, ол санда чир-чайаанда даа, иртірерге чӧп пиргеннер. Хакасияның экономика тилізі министрі аннаң айғасчатханын чарлаан. Тоғазығ пірге сомға суурынғанынаң тоозылған.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы