ЧОН КӦҢНӀН КӦДІРЧЕТКЕН ЧАЙААЧЫЛАР
01.06.2022
Хабарлар
Сомда: «Алтыр» мода театры «Скифтер» кӧзідігні кӧзітчелер
Культура. С.П.Кадышевтің адынаң чон чайаачызының кіні 83-ӌі чайаачы сезонын чапсых концертнең тоозыбысты
Пу сезонда ырҷыларның, теелбекчілернің сағынған сағыстары паза улуғ пӧгіннері толғаны іле кӧрінче. Олар, аймах марығларда паза фестивальларда аралазып, иң артыхтарның санына кіргеннер. Сценадағы устарның пӱӱлгі тоғыстары «Чон кӧңнін кӧдірчеткен чайаачылар» иирнең чабылды.
Концертті «Алтыр» хакас мода театры (устағҷызы Наталья Сартыкова) хореограф Анат Быдышев турғысхан «Стихии» кӧзідігдең пастаан. Сылағай хыстар, сіліг чазанҷыхтығ кӧгенектерін кизіп, сценаа толдыра кеен пас чӧргеннер. Абахай хыстар, чалахай кӱлімзірестерін залда одырчатхан кӧрігҷілерге читіріп, ідӧк «Скифтер» кӧзідігнең хайхатханнар.
Хакасия хыри-пазы чох чазыларға пай. Чайаачы устар, чир-суубыстың сілиине морсынып, аймах кибелістер, сарыннар пасчалар паза теелбектер турғысчалар. «Айас» теелбек студиязы (устағҷызы Хакасия культуразының саблығ тоғынҷызы Фаина Киштеева) композитор полған Юрий Киштеевтің кӧӧне «Ағбан чазы» теелбекті тимнеп салған. Ачых-чарых хызыҷахтар теелбекте чазыда чайхалысчатхан асха, сарнасчатхан хузыҷахтарға паза, таныҷахха саптырып, чайхалысчатхан порчоҷахтарға кӧгісчеткеннер. Ідӧк студияның иң кічіг иркеҷектері сценазар «Чиис пызырҷаң устар» теелбекнең сыхханнар. Таныхтирға кирек, пӱӱл часхызын «Айас» студия «Территория искусств. Москва» чоннар аразындағы марығ-фестивальның лауреады полыбысхан.
«Час ханат» олған эстрада студиязының 4-5 частығ палаҷахтары, чарых ӧңніг хакас кӧгенегестерін кизіп, холыҷахтарында саңыҷахтар тудынып, «Чазыдағы порчоҷахтар» теелбекті толдырғаннар. «Час ханатнаң» Россия культуразының саблығ тоғынҷызы Игорь Боргояков устапча.
30 чыл аразына «Хайҷы» хакас эстрада студиязы республиканың прай пулуңнарынзар читкен. Оменің артисттерін прайзы чахсы таныпча паза оларның сарыннарын истерге хынча. Концертте «Айтыс» республиканың фестиваль-мариинда ікі хати чиңісчі полыбысхан Наталья Бурнакова хакас чонның «Сайда тӱскен хусхаҷах» паза Евдокия Тыгдымаеваның «Тӧӧ суғның ооллары» тахпахтарын толдырған. Ағаа Хакасияның чон артизі Герман Танбаев паза Туваның чон артизі Альберт Кувезин кӧгнең полысханнар.
«Кӱн чахайағы» хакас теелбек паза сарын ансамбльы (устағҷызы Хакасияның саблығ артизі Анна Бурнакова) регионҷа кӧп чӧрче. Аның артисттерін республиканың кічіг паза улуғ аалларында чидікпин сахтапчалар. Ансамбль аймах марығларда паза фестивальларда сыбыра араласча. Пылтыр «Кӱн чахайағы» ансамбль тиксі Россия синінде иртірілген «Живая нить» (Пермь город) паза «Кибірлер» (Москва город) онлайн-марығларның лауреады полыбысхан. Пӱӱл кӱскӱзін ансамбль пайрамнығ 65 чылын таныхтир. 5 июньда С.П.Кадышевтің чон чайаачызы кінінде ӧменің чалахай кӧгҷілері паза теелбекчілері Ағбан городтың чуртағҷыларын паза аалҷыларын хайхастығ концертнең ӧріндірерлер. Че амғы чайаачы иирде «Кӱн чахайағы» ансамбльның абахай хыстары сценазар «Чирім кӧглері» теелбекнең сыхханнар. Анаң чиит оол Темир Янгулов «Іҷенің сарыны» ырны (кӧӧ О.Толмашовти, сӧстері В.Татаровани) толдырған.
Концертте пасха даа чайаачы ӧмелер араласханнар. Хайди таныхтаан С.П.Кадышевтің адынаң чон чайаачызы кінінің устағҷызы Анна Шаламова,
кінде тиксі 61 чайаачы ӧме тоғынча, хайзында 840 кізі араласча. Оларның чайаачы программаларын пір саңай кӧрзе, кіннең пір неделя сыхпасха чарир.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы