АҒБАН - ОЛҒАН ГОРОДЫ
03.06.2022
Хабарлар
«Орлёнок» паркта олғаннарға мастер-класс иртірілче
Палаларны арачылаҷаң чоннар аразындағы кӱн. Пӱӱл пу ӱлӱкӱн Россияда 73-ҷі хати пайрамналған
І июньда Ағбанда олған-узахха аймах мероприятиелер иртірілгеннер. Городтың школаларында, олған садтарында, культура учреждениелерінде, парктарында паза скверлерінде палаӌахтарға ӱтертістер тимнелгеннер. Олғаннарға аймах мастер-класстар, кӧзідіглер иртірілгеннер, сомға суурынӌаң орыннар тӧстелгеннер паза спорт, туризм площадкалары тоғынғаннар. Ідӧк «Орлёнок» паркта городтың кічіг чуртағӌыларына концерт, ойыннар паза теелбектер иртірілген.
Ағбанда ӱлӱкӱннің ӧӧн площадказы Чайаачы олғаннар кіні (ЦДТ) алнындағы ачыхта орныххан. Аның хыриндағы Вяткиннің паза Хакасскай орамаларда автомобиль чӧрізі 8.00 - 15.00 часта тохтадылған. Анда чӧргенде, Ағбан олған городына айлан парған чіли пілдірген. Олған-узах, ойнап, аах-уух тӱскен. Оларға прай даа ниме чарадылған: ойнирға, чолӌа сегір чӧрерге, мелнең хайда хынза хоостирға... Палалар, асфальтта хоостап, чалахай кӧңнілерін читіргеннер. Чарых ӧңнернең чахайахтар, ӧрбекейлер, туралар паза кізіӌектер хоостааннар.
Кӧзідімге, «Арачылағӌылар» площадкада ӧӧнінде оолағастар чыылыс парғаннар. Оларға ол кӱн ӧрт ӱзірӌеңнернің кип-азаан кис кӧрерге паза, оларның машиналарында одырып, сиренаны тоғындыр кӧрерге чарадылған.
Тоғынчатхан кӧп площадка аразында кізінің пазы айланыбысча. Олғаннар прай даа чирде маңнан халарға сағынчатханнары пілдірген, полғанында ла тохтап, пасхазынзар хайғаннар.
- Пӱӱн мында кӱрестің аймах кӧрімнері школазының площадказы тоғынча. Улуғ нимес стадион, хайда алты кӧрімҷе марығласчаң оңдай тимнелген, чиңісчілерге тадылығ сыйыхтар пирілче. Мында полған на кізее кӱзін сынап кӧрерге чарир. Пістің тренерлерібіс паза Хакас хазна университедінің студенттері чарғыҷылар полчалар, - позының площадказынаң таныстырған Ағбандағы кӱрестің аймах кӧрімнері спорт школазының директор орынӌызы Екатерина Мамаева.
Сизінгенде, пу марығларда утырған кізі чох полған, полған на араласчаа тадылығ сыйых читірілген. Чалахай кӧңніліг ікі нанӌының пірсі марығласхан соонаң кӧңнінең ӱлескен.
- Мин спорт площадказында арғызым Рома Кызласовнаң араласхам. Піс ікӧлең спортнаң айғасчабыс, аннаңар марығда хай пірее чахығларны ол, хай піреезін мин чахсы толдырғам. Тадылығ сыйыхтарны ікӧлеңе пиргеннер. Аннаңар кӧңнібіс чалахай, - чоохтаан Баяназ Дадабаев.
«Орлёнок» парктағы сценада аймах ансамбльлар, теелбек салып, кӧрігӌілерні ӧріндіргеннер. Чайаачы олғаннар аймах сарыннар толдырғаннар. Сцена алнында кічіг кӧрігӌілер плесет салғаннар, хай пірее іӌелер теелбектенгеннерӧк.
«Домашняя рукодельня» площадкадағы кӧзідіглер, мастер-класстар хайиимны тартхан.
- Пістің площадкада Ағбандағы чайаачы олғаннарның хоостарының кӧзідии иртче. Ідӧк сӧбірелер пос холынаң тимнеен ниме-нооны кӧріп аларға чарир. Ус холлығлар, мастер-класс иртіріп, сірерні ӱгредерлер, - чоохтаан Татьяна Чернова.
«Орлёнок» паркта волонтерлар иркеӌектерге ӱбӱрілген шарлардаң адайахтар, чахайахтар идіп сыйлааннар. Іӌе-пабаларға, тізең, хайди идерге кӧзіткеннер.
Таныхтирға кирек, Палаларны арачылаӌаң кӱн Ағбанда пастағызын на піди алғым таныхталған, неке. Городтың микрорайоннарында, зоопаркында паза даа пасха городтың танығлығ орыннарында олған-узахты ӱлӱкӱннең алғыстааннар. Пайрам тоозыл парған даа полза, чайғы тынағ кӱннері пасталып, олғаннар ӱлӱкӱні мыннаң мындар узарадылча.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде