ААЛЛАР ТИЛІЗІ
08.06.2022
Хабарлар
Россияның аал хонии министерствозының кізілері Ксения ШЕВЕЛКИНА паза Виталий ПЛАТОНОВ
Тоғазығ. Хакасия пазы Валентин Коновалов Россияның аал хонии министерствозының кізілері Ксения Шевелкинанаң паза Виталий Платоновнаң тоғазығ иртірген
Россияның аал хонии министерствозының специалисттері Асхыс, Боград, Шира, Ағбан пилтірі паза Алтай аймахтарынзар пар килерлер паза республика «Аалларның тиксі тилізі» хазна программазының мероприятиелерін хайди толдырчатханын сыныхтирлар.
Россияның аал хонии министерствозының аалларның тиксі тилізі департаментінің директоры Ксения Шевелкина Хакасия хазна программазын чуртасха кирерінде ӧткін араласчатханын таныхтаан:
- Регион программаны чуртасха кирерінде уғаа ӧткін араласча. Сірернің аалларны тилідерінең айғасчатхан чахсы команда. Хазна программазы аал чуртағҷыларын хайраллап халарына тӧсғелген, аал чуртағҷылары санын кӧрзе, сірернің чахсы кӧзідімнер.
Хакасия «Аалларның тиксі тилізі» хазна программазын чуртасха кирерінде 2020 чылдаң араласча. Аны хоостыра ӱгретчілерге паза имӌілерге чурт пӱдірілче (2021 чылда пу программа сылтаанда чӱс артиинаң специалист аалзар тоғынарға килген). Ідӧк аалдағы прай инфраструктура нааӌылалча: школалар, олған садтары, культура учреждениелері, спортплощадкалар, коммунальнай сетьтер.
2022 чылда программазар Асхыс аалны тилідерінӌе улуғ проект кіріп алған. Проект 3 чылға кӧрілген, аның паазы -1,6 миллиард салковай.
Ағбан пилтірі, Боград паза Асхыс аймахтарында 11 сӧп-сап площадказы пӱдірілер. Программаӌа ідӧк аал хонии предприятиелеріне специалисттерні ӱгредері кӧріл парған.
Хакасия пазы программа республиканың экономика стратегиязына, хайзының ӧӧн кӧстее кізі кӱзін хайраллиры паза тилідері, регионның прай пулуңнарында чуртасха паза істеніске истіг оңдайлар тӧстирі полча, уғаа кирек полчатханын таныхтаан.
- Піс кӧрчебіс: кізілер аалда чуртирға хынчалар. Че олар аалда городтағы осхас инфраструктуралығ паза посты кӧзідеріне алғым оңдайлығ чуртирға сағынчалар. «Аалларның тиксі тилізі» хазна программазы ол саринаң, улам амғы экономика оңдайларында, регионға федеральнай кіннең улуғ хабазығ, - таныхтаан Валентин Коновалов.
Ол ідӧк Хакасия правительствозы 2023 чылға программада аралазарына айланыстығ пічік тимнеп салғанынаңар искірген. Андар 200 артиинаң проект кірген, ӧӧннернің пірсі - Хубачар аалны тиксі тилідері. Пічіктер амды Россияның аал хонии министерствозында кӧрілче. Оларға чахсы паалағ пирілзе, федеральнай бюджеттең ахча позыдардаңар чарадығ алылар.
Тилістіг инфраструктура тӧстирінең пасха республика «Аалларның тиксі тилізі» хазна программазында агротуризмге хабазығ кӧрімӌе аралазарға сағыс тутча. Россияның аал хонии министерствозы аал хонииндағыларны туризм тӧстеглеріне паза аалӌыларны удурлирына ӱгредерінӌе пилотнай проектті сыныхтабысхан паза алғыдарға тимде. Хакасияда программаа амох кірерге тимде предприятиелер пар, килістіре айланыстар федеральнай ведомствозар ызыл парғаннар.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы