«ХАКАС ЧИРІ» - ПРЕССАНЫҢ АЛТЫН ЧЫЫНДЫЗЫ
08.06.2022
Хабарлар
Хакасия пазы Валентин КОНОВАЛОВ «Хакас чирі» газетаның ӧӧн редакторы
Радион СУНЧУГАШЕВКЕ «Трудовая доблесть Хакасии» медаль читірген
Газетабысха - 95 чыл. Тиксі тилекейде хакас тілінең сығарылчатхан чалғыс газета пайрамнығ тӧреен кӱнін алғым таныхтабысты
Аарластығ аалҷыларның пірсі Хакасия пазы - Правительство кнезі Валентин Коновалов «Хакас чирі» газетаны пайрамнығ 95 чылынаң алғыстирға редакциязар иртен иртӧк чиде салған.
- Хакас Республиканың «Хакас чирі» газетазы 95 чыл изере хакас тілін паза культуразын хайраллирына, тилідеріне улуғ хозым итче. Мыннаң мындар ол кӧстеглерін ідӧк тӱзімніг толдыр турзын. Хабарҷылар хығырығҷыларға уламох кӧп тузалығ хабарлар сығар турзыннар, - теен Валентин Олегович.
Пуох тоғазығда республика устағҷызы Хакасия Правительствозының адынаң тӧреен кӱнін таныхтаан газета редакциязына 300 муң салковайға тиңнелчеткен сертификат сыйлап пирген. «Хакас чирі» газетаның ӧӧн редакторы Радион Дмитриевич Сунчугашевке, тізең, хакас тілін, культуразын паза журналистиканы тилідер кирекке улуғ хозым итчеткен ӱчӱн «Трудовая доблесть Хакасии» медаль читірген.
- Мин пӧзік ӱгредігні 30 чыл мының алнында алғам. Аннаң сығара мин наука паза ӱгредіг киреенде тоғынғам. Амғы істеніс чолым ідӧк хакас тілін хайраллирынаң паза аны тилідерінең пик палғалыстығ. Улуғ алғыс мындағ сыйых ӱчӱн. Паза ниме чоохтирға сағынчам. Газетаа 95 чыл - ол олаңай ла сан нимес! Ол чылларнаң пазылған кічіг чир-суубыстың тархыны, регион тилізіне улуғ хозым иткен кізілернің ӱлӱс тері! Пӱӱнгі дее кӱнде пістің позыбыс тың пӧгіннері пар. Піс оларны ідӧк турыстыра толдырчабыс, - алғыс сӧстерін читіріп, теен Радион Дмитриевич.
Таныхтирға кирек, сыйыхтастар мыннаң тоозылбааннар. «Хакас чирі» газетаның 95 чылына чарыдылған пайрам С.П.Кадышевтің адынаң культура кінінде узарадылған. Анда чоох тутхан Хакасия пазының - Правительство кнезінің пастағы орынҷызының тоғызын толдырчатхан Татьяна Курбатова. «Газета редакциязының тоғынҷыларына хакас тілін хайраллапчатхан, тилітчеткен ӱчӱн ідӧк улуғ алғызым читірчем», - теен ол. Анаң Хакасия Правительствозының адынаң пістің тӧрт тоғынҷаа аарластығ сыйыхтар читірген.
Іди чахсы тоғыс паза хакас тіліне, культуразына улуғ хозым итчеткен ӱчӱн «Хакас чирі» газетаның ӧӧн редактор орынҷызы Наталья Субракова, компьютер пӧлиинің улуғ операторы Мария Майнагашева, сыныхтағ бюрозының редакторы Розалия Алагашева Хакасия Правительствозының Аарластығ пічиинең таныхтатханнар, «Хакас чирі» газетаның ӧӧн редакторының орынҷызы Альберт Толмашовха Хакасия пазы - Хакасия Правительствозы кнезінің алғыстас пічии пирілген.
Хакасияның Ӧӧркі Чӧбі кнезінің адынаң «Хакас чирі» газета редакциязын алғыстирға Ӧӧркі Чӧп аппарадының устағҷызы Нина Шейерман сыххан.
- «Хакас чирі» ол сынап тиксі тилекейде хакас тілінең сығарылчатхан чалғыс газета полча. Аннаңар тоғынҷыларына аның адын турыстыра ал чӧрерге алғапчам! Газетабыс пастыра сірер хакас чонның оңдай-хылиин, чуртазын толдыразынаң кӧзітчезер нооза, - теен Нина Игнатьевна.
Пу пайрамда ідӧк редакцияның компьютер пӧлиинің улуғ операторы Виктория Сагалакова паза право пӧлиинің редакторы Николай Султреков таныхтатханнар.
Виктория Ильинична Хакасияның национальнай паза территориальнай политика министерствозының алғыстас пічиин министр орынҷызы Юрий Чертыковтың холынаң алған.
- Хакас газетазында пастағызынаңох сығара пос чиріне, пос чонына хынчатхан кізілер тоғынғаннар. Пӱӱн дее анда андағ улус істен парча. Аннаңар тың ізенчем, мыннаң мындар «Хакас чирі» уламох кӧп туза ағылар, хакас тілін хайраллап халарына кӧп хозым идер, - теен министр орынҷызы.
Хада тоғынчатхан паза пір арғызыбыс Николай Султреков Хакасияның Улуғлар чӧбінің «Чахсы киректер ӱчӱн» орденіне турысхан. Пу аарластығ сыйыхты ағаа Улуғлар чӧбінің нандырығлығ хачызы Любовь Аёшина кӧксіне хазап пирген.
Пістің редакцияда Россияның журналисттер пірігізінзер кірчеткен хабарҷылар асхынах нимес. «Хакас чирі» газетаның 95 чылына чарыдылған пайрамда пу пірігістің кнезі хол салған алғыстас пічиин алған хабарҷылар парох. Олар - пастағы категориялығ редактор Наталья Тюкпеева паза пӧлік редакторы Татьяна Тютюбеева. Пастағы категориялығ редактор, Хакас Республика культуразының саблығ тоғынҷызы, журналисттер пірігізінің паза пір араласчызы Илья Топоев, тізең, Россияның журналисттер пірігізінің аарластығ сыйиин - «За заслуги перед профессиональным сообществом» аарластығ таниин - алып алған. Аны ағаа ідӧк Россияның журналисттер пірігізінің Хакасиядағы пӧлиинің кнезі Ольга Ширковец читірген.
Че «Хакас чирі» газета пӱӱл, 95 чыллығ пайрамы таныхталчатхан чылда, «Прессаның алтын чыындызы-2022» аарластығ таныға турысханы пістің ӧмее уламох аарлығ сыйых полча! Андағ танығ тиксі Россия синінде СМИ-лар аразында чыл сай иртірілчеткен марығ чиңісчізіне пирілче. Аны, Москвада ирткен СМИ-лар форумына чӧр киліп, «Хакасия» газетаның ӧӧн редакторы Марина Алёхина ағылған. Анаң ол сыйыхты газетабыстың пайрамында читір пирген.
Тиксі чоохтаза, пу пайрамда алғыстас сӧстері, сыйыхтар кӧп читірілгеннер. Хакасияның культура министрінің орынҷызы Лариса Киштеева, ХакНИИЯЛИ устағҷызы Нина Майнагашева, Хакасиядағы Чайаачылар туразының устағҷызы Надежда Бурнакова, писательлер пірігізінің кнезі Альбина Курбижекова, Хакас книга издательствозы устағҷызының орынҷызы Нина Толмашова, Хакас телевидениезінің устағҷызы Наталья Табакова паза даа пасхазы «Хакас чирі» газетаның ӧмезіне хакас газетазының пӧгіннерін мыннаң мындар ідӧк ле турыстыра толдыр турзыннар тіп алғааннар.
«Хакас чирі» газетаның тоғынҷылары Хакасия Правительствозының аарластығ сыйыхтарына турысханнар
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде