ИҢ ЧАПЧАҢНАРҒА - СЫЙЫХТАР
10.06.2022
Хабарлар
Ағбандағы «Саяны» стадионда МЧС иртірчеткен спорт марығлары азылчатхан туста
Марығлар. Ағбандағы «Саяны» стадионда паза МЧС-тың площадказында ӧрт ӱзірӌең-арачылаӌаң спорт кӧрімнерінӌе 36-ӌы марығлар ирткеннер
Хакасияның прай город-аймахтарының командалары иртен Ағбандағы «Саяны» стадионда чыылысханнар. Ӧрт ӱзірҷең-арачылаҷаң спорт кӧрімнерінҷе мындағ марығлар республикада 1984 чылдаң сығара иртірілчелер. Пастап, ӧрт ӱзірҷең служба МВД-ның холында полғанда, пу марығларны МВД апарҷаң. Халғанҷы 19 чыл оларны МЧС-тың Хакасияҷа Ӧӧн управлениезі иртірче. Полған на командаа, чазы хоостыра, олғаннар, саарбахтар паза улуғлар кірче.
Марығлар «Саяны» стадионда пайрамни азылғаннар. Командалар чӱгӱрҷең полосада изере стройға турыбысханнар, полған на команданың капитаны позының флагын иң алнында апарған. Хайди стройнаң изере килгеннер, оларға ідӧк изере номерлер пирілген. Чоохтирға кирек, марығлар пасталыбысханда, спортсменнернің командалары адалбин турғаннар, пирілген номерлері ле адалған.
Іди номерлері хоостыра командалар піди парғаннар:
1. Ағбан;
2. Харатас;
3. Саяногорск;
4. Асхыс аймаа;
5. Орджоникидзе аймаа;
6. Таштып аймаа;
7. Шира аймаа;
8. Алтай аймаа;
9. Пии аймаа;
10. Ағбан пилтірі аймаа;
11. Боград аймаа;
12. Олимп резервінің училищезі.
Полған на команданың тимненҷең алынҷа палатказы турған. Парадха кисчең кип-азахтығ МЧС тоғынҷылары строевой хаалағнаң стадионзар МЧС-тың Хакасияңа ГУ-зының знамязын киргеннер. Россияның паза Хакасияның гимннері толдырылған. Ведущай марығлар пайрамни азыларында араласчатхан устағҷыларны адаан. Іди анда полғаннар Хакасияның пазы Валентин Коновалов, Росгвардияның Хакасияңа управлениезінің пастығы Вячеслав Васильев, Чарғы приставтары федеральнай службаның Хакасияҷа управлениезінің пастығы Алёна Романова, Хакасияның ӧрт ӱзірҷең-арачылаҷаң спорт федерациязының президенті Сергей Ожигов паза даа пасхазы.
Марығ араласчыларынзар алғыстас сӧстерінең айланған Хакасияның пазы.
- Мындағ ирте туста прайзы ла усхунмаан полар. Мин сірерні ӧрт ӱзірчең-арачылаҷаң спорт кӧрімнерінің 36-ҷы марығлары азылчатханынаң алғыстапчам. Пу спорт кӧрімнерінде кізі позының профессиязында киректелчеткен узын, пілізін, чапчаңын кӧзітче. Аннаңар мағаа сірерні алғыстир улуғ ӱлӱс тӱсті. Амды сірер, марығлазып, пу спорттың алынҷа кӧрімнерінде чиңіс тударзар, профессиядағы устарыңны кӧдірерзер. Мында улуғларнаң хада олғаннар даа араласчалар. Прайзына оң ползын! Спортта, ӱгредігде, службада наа чидіглер сірерге! - теен Валентин Коновалов.
Ідӧк спортсменнерзер алғыстас сӧстерінең айланғаннар МЧС-тың Хакасияҷа Ӧӧн управлениезінің пастығы Александр Мулл, Хакасияның ӧрт ӱзірҷең-арачылаҷаң спорт федерациязының президенті Сергей Ожигов. Олар ідӧк марығлар араласчыларына пӧзік чидіглер кӧзідерге, марығларны, палығлатпин, иптеп иртірібізерге алғааннар.
Марығлар пайрамни азылған соонда командалар постарының орыннарынзар айланғаннар. Стадионда кирек оборудование турғызылған, анаң марығлар пасталғаннар. Спортсменнер, сиденнер азыра сегіріп, турғызылған узун тӧгеҷе чӱгӱріп, ораап салған шлангты сӧӧ тартып, аны суғ пирҷең кранға піріктіріп, азах меетке теере чӱгӱрчеткеннер. Пасха кӧрімнерде спортсменнер кӧйчеткен орынны ӱзіргеннер, пӱдіріглерге сыхханнар паза даа пасха оңдайнаң кӱстерінең сынасханнар. Ікі кӱн ирткен марығларда иң кӱстіглері, чапчаңнары, табырахтары ілезіне сығарылғаннар.
Пу марығлар оларға службаны пӧзік синде апарарға чахсы хабазар. Иң чапчаңнарға, чиңісчілерге сыйыхтар читірілген: кубоктар, дипломнар, грамоталар...
Чиңісчілер Кемеровта иртер регионнар аразындағы марығларда аралазарлар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы