«ПОҒО» ЭЭЗІ ТАБЫЛДЫ!
10.06.2022
Хабарлар
«Хакас чирі» газетаның ӧӧн редакторы Радион СУНЧУГАШЕВ
«Чыып ал сыйых» марығ чиңісчізі Аксинья НЕРБЫШЕВАА ӧӧн сыйых читірче
Чыып ал сыйых. Газетабыстың тӧреен кӱнінде хығырығҷылар аразында чарлалған марығ салтарлары иділген. Ӧӧн чиңісчіні табарынча ойын ВКонтакте социальнай сетьте «Хакас чирі» республика газетазының ӧмезінде кӧні кӧзідіге сығарылған
«Чыып ал сыйых» марығның ады даа хығырығчыларға олаңай ла сыйых тимнелбеенінеңер чоохтаан. Пірдең, сыйых чардыхтары газетабыстың 2022 чылының хосхар-сілкер айларындағы номерлерде сығарылғаннар. Пастап піреезі астыға даа халған: ниме идерге ол чардыхтарнаң? Пола-пола сизік хаап сыхханнар, салтарында хоос чыып алғаннар. Ана ол хоосты ысхан хығырығчылар марығда араласханнар. Хандых айының 1-ғы кӱніне тиксі Хакасиядаң 24 араласчы чыыл парған.
ВКонтакте социальнай сетьте кӧні кӧзідіге сығар тузыбысха редакцияда тіл сурииның улуғ эксперттері чыылыс парған: Хакасияның национальнай паза территориальнай политика министрінің орынчызы Юрий Чертыков, ученай, филология наукаларының докторы Мария Чертыкова, хабарҷылар Инна Тодинова паза Алексей Боргояков. Олар паза «Хакас чирі» газетаның ӧӧн редакторы Радион Сунчугашев - пасха чон кізілері хакас тілін пілчеткенінче республика марииның комиссия араласчылары. Ӧӧн тоғыстарын толдырыбызып, комиссия араласчылары «Чыып ал сыйых» марығның чиңісчілерін тапчаң ойынның киречілері полыбысханнар.
Редакцияның чыылығлар пӧлиинде улуғ хайыныс пасталыбысхан. Хакас кӧгенектерін кизіп, газетабыстың чазан салған хабарҷылары Александра Карамчакованаң Татьяна Тютюбеева стол кистінде турыбысханнар. Столда, тізең, марығ араласчыларының пічіктері, тоғылах сӱлейке ідіс паза айахтарда ӧңніг мерчігестер чатхан. Хабарчылар искіриинең, ӧңніг мерчігестер істінзер марығ араласчыларының аттары пазылған чаҷынахтар киріл парған.
Чайаачы ӧӧрелерібіс мында ол ідістернең «хамнап» пастабысханнар. Сынны чоохтаза, Тросин ӱлӱкӱні алнында потхыны хайди пызырарын хығырығҷыларыбысха паза кӧрігҷілерібіске сағысха кирерге полысханнар. Че потхаа кирек ас-тамах орнына пу мерчігестер тузаланылғаннар.
Кибірли, ізіп парған кӧдезексер пурун ӧріңме салылча. Ол хайнап пастабысса, тустап, ун хозыбызарға кирек. Хойып парған потхы хайах сығарбинчатса, нинҷе-де нымырха хозыбысчазың. Пызырчатхан тус тооза потхыны чахсы пылғирға кирек. Александра потхыны пылғап парча, Татьяна прай кӧрілген «ас-тамахты» хосча. Пу хайыныс ойын даа полза, кӧрігҷілернің сілегейлері ахча ба хайдағ.
Нандырығлығ тус читті. Пу пызырылған «потхыдаң» пис ӧңніг мерчігес сығар килерге кирек. Кӧдезекті позытхан соонаң андар пу таллалған пис мерчік салылған. Ікі ӧӧре «Хакас чирі» газетаның ӧӧн редакторы Радион Сунчугашевті хығырыбысхан. Аның ниик холынаң марығ чиңісчізі табылар.
- «Хакас чирі» потхызын амзап кӧрерге, - чоохтанып ала сыххан пастығыбыс. Радион Дмитриевич, изен-минді пиріп, марығ оңдайларын хатап сағысха кирген. - Пастағы сығарылған мерчік піске марығ чиңісчізін адирға полызар. Пасха тӧрт араласчаа сыйыхха газетабысха чарым чылға тикке пазыныс паза матлама хакас тілінең пазылған «90 чыл чоннаң хада» кинде читірілер. Хығырығҷыларны газетабыстың пайрамына чарыдылған пасха марығларда аралазарға хығырчабыс, оларның салтарлары чыл тоозылчатса иділер. Амды чарадыңар чиңісчіні табарға, - тіп, Радион Дмитриевич кӧпсегеснең, ол мерчігестерні пылғап-пылғап, сарығ-хызыл ӧңнігні хаптырып алған. - Кемге талаан тусті? Ол кізі газетаа 30 чыл пазынғанын айландырып алар! Ол - Аксинья Егоровна Нербышева! - чаӌынны сығарып, хығыр пирген ӧӧн редактор.
Алтай аймаандағы Смирновка аалның чуртағӌызы, пістің хаӌанғы хығырығӌыбыс Аксинья Егоровна газетабыстың пайрамына чарыдылған алғым чыылыға хығыртылған. С.П.Кадышевтің адынаң Чон чайаачызы кінінде Радион Сунчугашев ағаа «Чыып ал сыйых» марығның ӧӧн сыйиин - Виталий Кызласовтың «Поғо» хоозын - читір пирген. Марығлар - ол хығырығӌыларыбысха алғыс читірӌең оңдай, олар чылларнаң ағаа пазынчалар, аны хығырчалар. Аннаңар газетаның тӧреен кӱнінде алғыс сӧстері тоғынӌыларға ла нимес, ідӧк хығырығӌыларға читірілерге кирек!
Ойын узарадылған. Сӱлейке ідістегі халған мерчіктер азылғаннар. Чарым чылға тикке пазыныс паза «90 чыл чоннаң хада» кинде читірілер: Светлана Боргояковаа, Елизавета Кичееваа, Любовь Табурчиноваа паза Сарима Тюреневаа.
Мына мындағ кӧгліг ирткен «Чыып ал сыйых» марығның салтарлары. Пу айда, тізең, піс ундударға пирбинчебіс, 2022 чылның ікінӌі чарым чылына газетаа пазынӌаң тус. Паалар паза пазынӌаң оңдайлар газетада тӧреміл сығарылчалар. Пасха марығларыбыста ідӧк ӧткін аралазарларыңны сағыпчабыс.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы