ПІСТІҢ ПІР ХАЗНА - РОССИЯ
15.06.2022
Хабарлар
«Айас» ансамбль «Андижан польказы» узбек теелбегін толдырча
Пайрамнығ концерт. С.П.Кадышевтің адынаң чон чайаачызының национальнай кінінде пайрамнығ иир ирткен. Ол Россия кӱніне чарыдылған
Пайрамны Хакас филармониязының солизі Олег Гриценконаң «Ынархас» ансамбльның теелбекчілері асханнар. Чайаачы ус «Россия, алнынзар!» сарынны чӱрекке теерте толдырған. Аның авторы - Олег Газманов. Саблығ артист ырны Илбек Чиңістің 70 чылына удур пастыр, сизінгенде, анда амғы тустаңар чоохталча. Кееркестіг ӱнніг Ольга Васильева кӧрігӌілернің иң хынчатхан артисттерінің санына кірче. Ол «Россия» ырны сарнаанда, залдағы улустың кӧңні кӧдірілген. Анаң кізілерні чайаачыларынаң «Саяночка», «Час ханат», «Ынархас» ансамбльлар ӧріндіргеннер. «Час ханат» ансамбльның солизі Алина Канзычакова чахсы сарнапчаттыр. «Хакасия» ырны толдырып, ол тӧреен чиріне прай паарсас-хынызын читірген.
Пайрамнар алғыстастар чох иртпинче. Чыылған чонзар Хакасия пазы Валентин Коновалов айланған. Валентин Олегович теен:
- Прайзын Россия кӱнінең алғыстапчам. Піс кӧп нациялығ, пай тархыннығ хазнада чуртапчабыс, ӧбекелерібістің чидіглеріне поғдархапчабыс. Пӱӱн Россиядаң тоғыр санкциялығ чаа парча. Че піс тӧдір пазынмаспыс. Россияның кӱзі - хада-пірге тудынчатханыбыста. Хазнада аймах нациялығ, сағыс-кӧрістіг чон чуртапча, че прайзы амыр, пик чуртирға сағынча. Хада-пірге тудынзабыс, Ада чир-суубыс кӱстіг, пай полар. Прайзына часка, хазых алғапчам.
Валентин Коноваловтың чооғынаң чаразып, кӧрігӌілер матап айа сапханнар. Кибір хоостыра пайрамнығ мероприятиеде улуғ чидіге читкен чир-суғӌыларыбысты чеестееннер. Хоза ӱгредіг пирчеткен республика кінінің директоры Галина Жуковаа Россия президентінің Аарластығ пічии читірілген. Ӧӧркі Чӧп кнезінің орынӌызы Евгений Молостов «За заслуги перед Отечеством» II степеньніг орденге турысхан. Пасталығ класстар ӱгретчізі Елена Кадоркина Опытнай аалдағы школада істенче. Тӱзімніг тоғызы ӱчӱн Елена Александровна «Хакасияның саблығ ӱгретчізі» аарластығ атха турысхан, Ағбанның тиксі спорт школазының улуғ тренері Александр Зотов - «Хакасияның физическай культуразы паза спортының саблығ тоғынӌызы» атха. Ідӧк сыйыхтаттырғаннарның санында шофер Владимир Журавлевты адирға кирек. Владимир Николаевичті Хакасияның Аарластығ пічиинең таныхтааннар.
Орындағы халых пірігістері, Донецктегі паза Лугансктағы республикаларға полызығ чыып, ӧткін хайынчалар. Ол тоғыс ӱчӱн Хакасия пазының алғыстас пічіктері «Чосон» кореецтернің диаспоразының кнезі Олег Хегайға, «Ине тілі» региондағы халых пірігізінің кнезі Нина Майнагашеваа паза пасхазына читірілгеннер.
Пайрамнығ концерт «Кӧп омалығ Россия» тіп адалған. Иирнің ікінӌі чардығында национальнай кіннің ӧмелері Хакасияда чуртапчатхан аймах чоннарның чайаачызынаң таныстырғаннар. Программаның ӧӧн чардығы орыс паза хакас сарыннарынаң, теелбектерінең пӱткен. Ідӧк «Ынархас» паза «Айас» ансамбльлар узбек, хыдат, армян, корея теелбектерін толдырғаннар. «Айас» ансамбльның хоос устағӌызы Фаина Киштееваның чооғынаң, пасха чоннарның теелбектерін турғызарға оой нимес. Полған на сай ол чонның культуразын толдыразынаң істезерге килісче. Кип-азахнаң сидіксініс парох. Че ансамбль араласчылары узы-пазына сығып алчалар. Ӧмедегілер «Чосон» кореецтернің диаспоразынаң пик палғалыс тутчаттырлар. Кӧзідімге, репертуарда «Барабанлығ теелбек» пар. Диаспораның устағ-пастаа барабаннарны Ӱстӱнзархы Кореяда ӧнетін чахаан, кип-азахты тігерге полыс пиргеннер. Фаина Ивановна таныхтаан:
- Пасха чоннарның теелбектерін толдырып, олғаннар аймах кізілернең пілізерге, оларның культуразын улуғлирға ӱгренчелер. Концертсер айланза, ол пӧзік синде ирткен. Кӧрігӌілер артисттерге чалахай иир ӱчӱн алғыстастарын читіргеннер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде