ЧИИТТЕР ӦӦН ПІЧІК АЛДЫЛАР
17.06.2022
Статья
Сергей ТОПОЕВ, Елена СЫРГАШЕВА паза Екатерина ТОРОКОВА паспорттар алдылар
Танығлығ кирек. Чыл сай Россия кӱні алнында Хакасия правительство туразында республика пазы Валентин Коновалов ӱгредігде, спортта, наукада, чайаачы тоғыста пӧзік чидіглерге читкен ӱгренӌілерге паспорттар читірче
Саарбахтарның кӧбізі табырах ӧс парарға сағынча полар. Паспорт алғаны пу чолның пастағы хаалии тіп санирға чарир. Пӱӱл регион устағҷызынаң 21 олған паспорт алды. Олар прайзы чахсы ӱгренчеткенінең пасха, ідӧк аймах кӧстеглерде пӧзік чидіглерге читкен.
Паспорт паза сыйых алғаннарның санында Н.Ф.Катановтың адынаң национальнай гимназия-интернаттың ӱгренҷілері полғаннар. Олар - Екатерина Торокова паза Елена Сыргашева.
Екатерина Тороковаа паспорт тоғысха кіріп аларға ондай пирер.
- Паспорт мағаа тоғынып пастир ондай пирче. Мин промоутер алай ба садығчы полып тоғынарға сағынчам. Пасха тоғыстарға мині албастар нооза. Пістің ам чайғы каникуллары иртче. Аны посха тузалығ иртіріп, кӧмес ахча тоғынып аларға итчем, тус табырах учухча нооза. Мин дизайнер-архитектор поларға сағынчам. Кип-азах сағын таап, позымның садығ туразын азып аларҷыхпын. Пу пӧгінні толдырып алар ӱчӱн, сыдамах паза турғысхан пӧгінге чидер хылыхтығ поларға кирек, - таныхтапча Екатерина.
Екатерина 14 частығ даа полза, ол улуғ сағыстығ. Ол, Ағбандағы Д.И.Каратановтың адынаң хоос школазын маңнаныстығ тоозып, амды гитаранаң ойнирға ӱгренерге сағынча.
Гимназияның ікінҷі ӱгренҷізі Елена Сыргашева чахсы ӱгреністең пасха, ідӧк прай олимпиадаларда араласча, чиңісчілер санында сыбыра полча. Позының чуртазын ол юриспруденциянаң палғалыстырарға пӧгінче.
Алтай аймаандағы Аршаннар аалының ӱгренҷізі Сергей Топоев ӱгредігде ле нимес, ідӧк спортта пӧзік чидіглерге читче. Ағаа паза даа пасха олғаннарға танығлығ кӱнде паспорттар паза сыйыхтар читірілген. Оларзар Хакасия пазы Валентин Коновалов айланған.
- Сірер чуртастың ӧӧн пічиин хазнаның ӧӧн ӱлӱкӱні, Россия кӱні, алнында алчатханы уғаа танығлығ. Пу кӱн сірернің сағыста ӱрге халарына ікінҷілебинчем. Сірер хазнаның тархынын, культуразын хайраллаңар. Чуртас чолынҷа ізестіг паза пик парыңар, - таныхтаан чооғында Валентин Олегович.
Оксана СУНЧУГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде