ХАКАСИЯЗАР ХАТАП КИЛ ПАРАРҒА ПӦГІНЧЕЛЕР
22.06.2022
Хабарлар
Ольга КУЗЬМИНА паза Тимур ЮСУПОВ пресс-конференция тузында
Туризм. Ирткен неделяда пістің республикада федеральнай СМИ-ларның хабарҷылары чорыхнаң пол килгеннер
РЕСПУБЛИКАҶА ЧОРЫХ
Хакасия ӱлгӱлері, туризмні тилідіп, хабарӌыларға пресс-турлар тӧреміл иртірчелер. Чорыхтарның ӧӧн пӧгіні - аалӌыларны чирібістің чапсых пулуңнарынаң таныстырары. Ікінӌі чылы пресс-турларны иртірерге tutu.ru Россиядағы чорыхтар сервизі полысча. Пылтыр аның тоғынӌылары 10 кізіні ағылған ползалар, пӱӱл чорыхта 12 хабарӌы паза блогер араласты, оларның санында ТАСС хабарлар агентствозының, Russian Traveler журналның, «Минің планетам» телеканалның, «Вокруг света» журналның сайтының паза пасха СМИ-ларның тоғынӌылары.
Хабарӌылар паза блогерлер Хакас чирінде 13 - 17 июньда ааллааннар. Пис кӱн аразына олар «Ӧбекелер чолы» объектте, Ӱӱ тағда, «Улуғ Хуртуйах тас» музейде, Оғлах тағда, Сойан-Сус ГЭС-та, «Мраморка» экстрим-паркта пол килгеннер. Ідӧк программада Ким паза Ах Ӱӱс суғларӌа инері, От инені азыраӌаң кибір, «Джинсалығ симфония» концерт паза аймах мастер-класстар полғаннар.
ЧИДІГЛЕР, ПӦГІННЕР
Чорыхха чарыдылған пресс-конференция «Азия» отельде 17 июньда ирткен. Аның тузында аалӌылар сағыс-кӧрістерінең ӱлескеннер. Че пастап туризм тилізінің департаментінің устағӌызы Ольга Кузьмина улуғ нимес сан пиріс иткен. Хайди таныхтаан Ольга Владимировна, пістің республикада туризм ӱлгӱлернің улуғ хайиинда. Ӱзінӌі чылы сфераның тилізіне ахча чахсы позыдылча. Салтарында Хакасия аймах марығларда чиңіс тутча, чоннар аразыңдағы кӧзідіглерде ӧткін араласча. Идінӌектернің гранттар мариинда аралазып, объекттер пӱдіреріне ахча киріп алчалар.
Ӱлгӱдегілер туризм киреенең чарадығ чох айғасчатханнарнаң тоғыс тӧреміл апарчаттырлар. Кӱстеністері тикке парбаан. Ӱс чыл мының алнында тӧлелчеткен налогтарның сині 100 миллионға ла читчең полза, амды 1 миллиардха тиңнелче. Пӱӱл январьда Хакас Республиканың 2030 чылға теере туризмні тилітчең стратегиязы алыл парған паза алынӌа хазна программазы пар. Халғанӌы чидіглердеңер чоохтаза, департаменттің ӧмезі «Сибирьдегі тынағ» наа маршрут тимнебіскен. Ол Россияның пис ӧӧн национальнай маршруттарның санына кірче. Аның презентациязы 16 июньда Санкт-Петербургтағы чоннар аразындағы экономика форумында ирткен. Маршруттың узуны - 1244 километр, ол Хакасияны, Туваны паза Хызылчар крайын піріктірче. Чорых тузында кізілер Хакасияның пурунғы тархынынаң, Сибирьнің промышленнозынаң, Ырғах-Тарғах тайғазынаң, кӧс чӧрчеткен чоннарның культуразынаң танызарлар.
Форумда презентацияны Туризмӌе федеральнай агентствоның устағӌызы Зарина Догузова иртірген. Зарина Валерьевна позы «Сибирьдегі тынағ» маршрутта пол килерге пӧгінче. Устағӌыны Хакасияда 4 июльда сағыпчалар. Пір сӧснең, чидіглер пар, че итчең тоғыс аннаңох кӧп.
Пресс-турның араласчыларынаң ӱс сурығ полған: Хакасияда туристтер саны хозылча ба? Республикада хайдағ кӧрімніг туризмні тилідерге пӧгінчелер? Пос алынӌа тынанарға сағынчатхан улусха хайдағ оңдайлар тӧстелген?
Хайди таныхтаан Ольга Владимировна, тынанчатхан улусты санға аларға сидік. Ноғадаңар? Амғы туста туристтернің 53 %-і пос алынӌа тынанарға кӱстенче. Пічіктер хоостыра пылтыр Хакасияның гостиницаларында 184 муң хати хонғаннар. Шира кӧллерінде чайғы сай 1 миллион артиинаң кізі тынанча. Алында пеер ӧӧнінде Хызылчар крайынаң паза Тувадаң килӌең ползалар, амды Кемеров, Омск, Новосибирск областьтарының чуртағӌыларына тӧреміл тоғазарға чарир. 2021 чылдаң Хакасиязар Москвадаң, Санкт-Петербургтаң, Хазаннаң, Нижний Новгородтаң тынанарға килчелер.
Республикада экология, тархын-чарыдығлығ паза хазых пиктеҷең туризмні тилідерге пӧгінчеттірлер. Хазых пиктеҷең туризмнеңер чоохтаза, андар курорттарда паза кӧллерде хазыхтанары ла нимес, ідӧк кӱс орыннарында тынанары кірчеттір. Кӱс орыннарын йоганаң айғасчатхан, медитациялар иртірчеткен кізілер тілепчелер. Департаменттің тоғынҷылары «ЬІзых Хакасия» маршрутты тӧстееннер. Аны садызып аларға чарир.
Алынҷа тынанарға сағынчатхан улусты департамент паза Туризмҷе хабарлар кіні (ТИЦ) улуғ хайығда тутчалар. Ол пӧгіннең khakassia.travel сайт, карталар тӧстелгеннер. Сурығлар полза, ТИЦ-сар кӧнізінең сығдырадарға кирек. Пу чӧп республика чуртағҷыларына ідӧк тузалығ полар. Пасха регионда пос алынҷа тынанарға сағынчатсаңар, азынада сығдырадыңар.
Пресс-тур араласчылары Сергей ЧАРКОВТЫҢ устаанынаң чатханнаң ойнирға ӱгренчелер
ӰНДЕЗІГЛЕР
Орындағы улус аалҷыларның чорых хоостыра сағыс-кӧрістерін піліп аларға сағынған. Пастап читпестердеңер чоох парған. Хайди таныхтаан пресс-турның устағҷызы Тимур Юсупов, прай регионнарда тасхын чӧрҷең орыннарнаң сидіксініс. Пірееде сіліг чирзер чидіп алчазың, чиис садызып алар оңдай пар, че санузелліг туалет орнына ағас тасхынзар чӧрерге килісче. Таныхтирға кирек, пу сурығ туристтерні ле нимес, Ағбанның чуртағҷыларын даа сағыссыратча. Тынағ парктарында туалеттер пиктіг турчалар алай чонны андар ахчаа кирчелер. Хырығ озаринда прай туалеттерзер тикке кирчелер, анда чаҷын сыбыра полча, ипчі чонның кирексіністерінеңер ундубинчалар.
Блогер Светлана Краснякованың чооғынаң, Хакасияда чоллар хомай. Чиит ипчі позы Омсктаң, пӱӱнгі кӱнде Санкт-Петербургта чуртапча. Ол автомобиль туризміне хынчаттыр. Светлана Россияның аймах регионнарында пол килерге маңнанған, федеральнай трассада хомай салылған асфальтты ағаа пастағызын на кӧрерге килістір. Russian Traveler журналның ӧӧн редакторы Иван Васин республикаа хакас чонның кибірліг ас-тамааның рестораны хайди даа кирек тіп таныхтаан. Пірее кафелерде талғанны, ӱгрені, ханны чіп алар оңдай пар, че анзы читкіҷе нимес. Иван Викторович Хакасияда форель хоныхтары парына чапсаан. Ол теен:
- Карелиядағы форель брендке саналча. Кізілер аны ӧнетін садызып аларға килчелер. Ноға Хакасия позының палығына махтанминча? Ымай поселоксар читкенде ле, мында форельні ӧскірчеткенін піліп алғабыс. Аның тадии пасха полтыр. Туристтерге форель хоныхтарынаңар искірерге кирек.
Пресс-тур араласчылары археология хумартхыларына, хайа хоостарына аптаттырғаннар. Че Москвадағы блогер Людмила Захарченконың чооғынаң, интернетте хумартхыларға турыстыра реклама чоғыл. Чиит ипчі пістің республиказар чорыхнаң килерге чочынтыр. Интернеттегі сомнарда чазы чирлері, хайдағ-да тастар кӧзіділік. Хумартхыларны пос хараанаң кӧріп алғанда, блогер ипчі кӧрізін алыстырған. «Вокруг света» журналның сайтының шеф-редакторы Татьяна Меньщикова Москвадаң, Сибирь регионнарынаң алында Тюмень облазында ла полтыр. Татьяна Сергеевнаның таниинаң, хумартхыларны хайраллир тоғысты хайди даа апарарға кирек. Туристтер саны кӧп полза, пис муң чыл турчатхан обаалардаң пір дее ниме халбас.
«Уралдағы авиалиниялар» борттағы журналның редакторы Игорь Цалер пос туста тархыннаң айғазарға хынча. Пурунғы чоннарның тархын істерін кӧріп, матап хайхаптыр. Хакасиянаң танысханы ағаа пасха планетада пол килген чіли пілдірген.
Хабарҷыларның паза блогерлернің танығларынаң, олар полған объекттердең Сойан-Сус ГЭС-та, «Мраморка» экстрим-паркта паза Ағбан пилтірі поселокта Хызылчар тулғорның хазында тынағ чапсытхан. Олар туристтерге пу орыннарда хайди даа пол килерге чӧп пирерҷіктер. Сойан-Сус ГЭС хаҷаннаң ӧӧн турист объекттерінің санына кірчетсе, «Мраморканы» тынағ кініне альпинизмҷе Россияның спорт узы Александр Жигалов айландыр парир. Экстрим-паркта спортсменнер дее, алында хайаңа сых чӧрерінең айғаспаан даа улус тынанып алар оңдайлығ. Ағбан пилтірі поселокта Хызылчар тулғорның хазын Хакасияның парус спортының паза суғ туризмінің федерациязы иптепче. Июньда федерациядағылар шатер турғызыбысханнар. Орын «Ким хаалхазы» адалчаттыр, аннаң чир-чайааннаң ӧкерсінерге чарир. Блогерлернең чоохтасханда, прайзы даа Хакасияда хатап пол килерге пӧгінче.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы