ЧАЙААЧЫ КӦҢНІЛІГЛЕРГЕ - АХЧА
29.06.2022
Хабарлар
Министр Виктор БОГУШЕВИЧ марығ араласчызы Мария ЧАПТЫКОВАНАҢ сыйыхтас тузында
Пу наада креативтіг индустриялар марииның финалына сыххан улусты чеестееннер. Азах меетке 20 кізі сыххан
Креативтіг индустриялар - экономиканың алынҷа секторы. Аны ідӧк пілістер экономиказы алай культура экономиказы тіп адапчалар. Тархын танығларынаң, ол 1990 чылларның халғанӌызында хырығ озаринда тӧстелген. Креативтіг индустрияларзар аймах сфералар кірчелер: дизайн, музыка, музейлер паза библиотекалар тоғызы, архитектура, кинематография паза пасхазы. Мында ӧӧні - наа технологияларға тӧстеніп чайиры, ахча тоғынары. Чайалған ниме-ноо чапсых, пасхазына тӧӧй нимес поларға кирек.
Россияда креативтіг индустрияларға 2000 чылларның ортызында хайығ айландырып пастааннар. Че толдыра кӱзінең тоғыс ікі-ӱс чыл мының алнында ла апарыл сыххан. Пістің республикада креативтіг индустриялар ідӧк ӱлгӱлернің хайиинда. Пылтыр С.П.Кадышевтің адынаң чон чайаачызының национальнай кінінде «АРОН» арт-резиденция тоғынып пастаан. Ӧӧн пӧгін - чииттерге чайаачы устарын таптирға, оларның проекттерін чуртасха кирерге полызары. Пӱӱл часхызын Хакасияның экономика тилізі паза культура министерстволары креативтіг индустрияларҷа марығны чарлааннар. Аның салтарлары 23 июньда искірілгеннер.
Мероприятиені республиканың экономика министрі Виктор Богушевич асхан. Виктор Николаевичтің чооғынаң, марығ 16 номинацияӌа ирткен, анда 48 кізі узын сынаптыр. Марығ оңдайларынҷа араласчылар жюри адына сурыныс пічіктерін паза проекттерін ысханнар. Артыхтарның артығын таллирға оой полбиндыр. Азах меетке 20 араласчы сыхтыр. Че мыннаң тоғыс тоозылбинча. Полғанына ла куратор пирілер. Марығласчатханнар, кураторлары устаанынаң проекттерін читіре тимнебізіп, чарғыҷылар алнында арачылабызарға киректер. Андада ла чиңісчілерні адирлар. Пастағы орынға сыххан араласчаа 500 муң салковай читірілер, ікінӌі орын ӱчӱн - 300 муң салковай, ӱзінӌі орын ӱчӱн - 200 муң салковай. Министр Виктор Богушевич прайзына чиңіс тударға алғаан. Алғыстастар соонаң таллағны иртібіскен улусха дипломнар читіргеннер. Оларның санында театр хоосчылары Мария Чаптыкованаң Мария Максименконы адирға кирек.
Ікі Мария ӧӧре полча. Мария Чаптыкова, ӧӧн тоғызынаң пасха, пос туста открыткалар чайирға хынадыр. Оларны «Алтын чир» паза «Этностиль» садығ тураларында садызып аларға чарир. Че, креативтіг индустриялар мариинда аралазып, чиит ипчі артист паза драматург Алексей Сагатаевнең хада «Махачы Акун» киндені сығарарға пӧгінче. Алексей нымахты чайапча, Марияа хоостарны тимнебізерге кирек. Чайаачы ус марығда оларға оң полар тіп ізенче.
Мария Максименко - спектакльларға костюмнар чайапчатхан хоосчы. Ол теердең ипчілер сӱӱмектерін, чазанӌыхтарны, пӧріктерні чайирға кӱс. Че амғы туста Мария Юрьевнаның теернең тоғынӌаң оборудованиезі чоғыл. Пу сурығны пӧгіп, ол марығда аралазарға чаратхан.
Азах меетке сыхханнардаң ідӧк чир-суғӌыларыбыс Сергей Токояковты, Сабир Бурнаковты, Александра Тутаркованы, Анна Сагатаеваны таныхтирға чарир. Анна Владимировна Пии аймаандағы Хызыл хара суғ аалдаң. Хакас хыс «Парыс табан. Хакас тілін IT-технологиялар полызиинаң хайраллиры» проектті тимнеп салған. Ол чуртасха кирілер тіп ізенербіс.
Сыйыхтассар айланза, аның тузында культура министрінің орынӌызы Ирина Браим сағыстарынаң ӱлескен. Ирина Викторовнаның таниинаң, пістің республикада таланттығ чон чуртапча, хазнада креативтіг индустрияларны хайығда тутчатханда, оларға устарын кӧзідерге оңдай пирілер. Пӱӱл Россияның 33 регионында, ол санда Хакасияда, креативтіг индустрияларның школалары тоғынып пастирлар. Олар 12 -17 частығларға кӧріл парғаннар. Палаларға ӱгредіг тикке парар. Школаны азарына ахча федеральнай бюджеттең позыдылған, аның сині - 54 миллион салковай. Ол ахчаа ӧнетін оборудование алылған. Школада 120 пала ӱгренерге кирек, пӱӱнгі кӱнде 132 сурыныс пічии кіртір. Аны сентябрьда азарлар, олох туста креативтіг индустриялар марииның чиңісчілеріне грант ахчазын читірерлер.
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 26 | 27 | 28 | 29 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
