Тӧреен кӱнiңнең, Хакасия!
04.07.2022
Хабарлар
Хакасия пазы Валентин Коноваловтың Республика кӱнiне чарыдылған гала-концерттегi алғыстастығ чооғын пирчебiс:
– Чалахай иирнең, аарлығ чир-суғҷылар паза пiстiң ӱлӱкӱннiң аалҷылары!
1991 чылның от айының 3-ӌi кӱнiнде Хызылчар крайының Хакас автоном облазы Хакас Совет Социалистическай Республикаа айландырылған. Ол тустаң сығара регион Россияның алынҷа субъектi полып тилеен. 2022 чылда iдӧк Хакасия Россияа пос кӧңнiнең хозылғаннаң сығара 315 чыл толча. Тиксi хазнанаң хада пiс чидiглерге хаалаабыс паза чiдiрiглерге хомзынғабыс.
Пӱӱнгi кӱнде пазох оой нимес тус. Че халғанҷы чылларға пу сидiксiнiстернi тобырарға паза чуртас-экономика тилiзiн узарадарға чахсы ӧзен тӧстелген.
Ӱс чыл аразына Хакасия правительствозы республиканың ахча суриин чахсыландырарға паза ӧдiс синiн синдiрерге прай кӱзiн салған. Бюджет парызын ӧскiрер ӱчӱн, пic килкiм компанияларнаң хада тӧремiл тоғыс апарчабыс. Пiс кiчiг паза ортын пос киреене, предприятиелерге хабасчабыс паза оларны тилiтчебiс. Республика прай социальнай тӧлеглернi тӧремiл паза тудығ чох тӧлепче. Пic муниципалитеттернiң ӧдiзiн чаапчабыс паза алында пирiлбеен ахчанаң пiлдiрте полысчабыс.
Пӱӱн таныхтирға чарир, пiс алында устааннарның пис чылға толдырған кӧзiдiглерiн ӱс чыл аразына аза халғабыс.
Тоғызыбыста пис ӧӧн кӧстеге тудынчабыс. Пастағызы – ол кiзi, аның оңдайларын алғыдары. Пасхазы – экологияа хорғыс чох полары, чир-чайааныбысха ӱрег ағылбинчатхан наа экономика, чахсы инфраструктура, культура-тархын ис-пайын хайраллиры. Пу пис кӧстег – ол таңдағы тӧлге артызарға сағынчатхан Хакасиябыс!
Пӱӱн полған на кiзее «пӱдiрiгҷiлер» санына турарға паза пicнең хада хынған Хакасияның чахсы чуртазы ӱчӱн тоғынарға чарир. Уламох, хаҷан кризис наа оңдайлар пирче. Хада-пiрге тудынзабыс, пicке пiр дее хатығластар хорғыстығ нимес.
Арғыстар! Пiстiң ӧӧн ис-пайыбыс – кiзiлер. Хакасияның кӱзi – аның чуртағҷыларында. Улуғ алғыс, пiстiң сiлiг чирiбiсте чуртап, сiрер пос тоғызынаң, пiлiзiнең республиканы тилiдерiнде кӱннiң араласчазар. Пiр чӧпнең тудынзабыс, палаларыбыс, пархаларыбыс паза кӧргенектерiбiс чахсы чуртазы ӱчӱн республика ӧңненер!
Республика ученайларнаң, инженерлернең, энергетиктернең, культура тоғынҷыларынаң, имҷiлернең, ӱгретчiлернең, аал паза промышленность предприятиелерiнiң iстенҷiлерiнең сабланча. Пӧзiк профессия чидiглерiне чидiп, илбек хазнабыстағы чон аймаанда кiчiг чир-суубысты сабландырчазар. Хакасия – пiстiң ибiбiс! Пӱӱн пiс аның тӧреен кӱнiн таныхтапчабыс!
Республика кӱнiнең, аарлығ чир-суғҷылар!
Ӧңненiс сағаа, хынған Хакасиябыс!
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы