ӦҢНЕН, ХЫНҒАН ХАКАСИЯБЫС!
06.07.2022
Хабарлар
Хакасия пазы Валентин КОНОВАЛОВ
республика филармониязының устағҷызы Вячеслав ИНКИЖЕКОВХА «Хакас Республиканың чон артизі» танығ читірген
Пайрам. От айының 3-ҷі кӱнінде Хакас Республика тӧреен кӱнін таныхтапча. Ағаа чарыдып, Пастағы май ачығында опера «чылтыстарының» паза «Музыка экспедициязы» фестивальның гала-концерті ирткен
Пӱӱл Хакасия Россияның алынҷа субъекті полыбысханнаң сығара 31 чыл толча. 1991 чылның от айының 3-ҷі кӱнінде Хызылчар крайының Хакас автоном облазы Хакас Совет Социалистическай Республикаа айландырылған. Пу танығлығ кӱнге чарыдылған гала-концертте, хайда опера «чылтыстары» паза В.Г.Чаптыковтың адынаң Хакас Республика филармониязының симфония оркестрінең хада «Музыка экспедициязы» кӧг тиріглері фестивальының араласчылары сценаа сыхханнар.
Концерт тузында Хакасия пазы Валентин Коновалов республика чуртағҷыларын паза аалҷыларын алғыстаан. Аның таниинаң, пу оой нимес туста Хакасияның чуртас-экономика тилізін айныдар чахсы оңдайлар пар. Валентин Олегович ідӧк республикаа туза ағылып тіспен істенчеткен улусха алғызын читірген.
- Ӱс чыл аразына Хакасия правительствозы республиканың ахча суриин чахсыландырарға паза ӧдіс синін синдірерге прай кӱзін салған. Бюджет парызын ӧскірер ӱчӱн, піс килкім компанияларнаң хада тӧреміл тоғыс апарчабыс. Піс кічіг паза ортын пос киреене, предприятиелерге хабасчабыс паза оларны тилітчебіс. Республика прай социальнай тӧлеглерні тӧреміл паза тудығ чох тӧлепче. Піс муниципалитеттернің ӧдізін чаапчабыс паза ахчанаң пілдірте полысчабыс.
Пӱӱн таныхтирға чарир, піс алында устааннарның пис чылға толдырылған кӧзідіглерін ӱс чыл аразына аза халғабыс.
Тоғызыбыста пис ӧӧн кӧстеге тудынчабыс. Пастағызы - ол кізі, аның оңдайларын алғыдары. Пасхазы - экологияа хорғыс чох полары, чир-чайааныбысха ӱрег ағылбинчатхан наа экономика, чахсы инфраструктура, культура-тархын ис-пайын хайраллиры. Пу пис кӧстег - ол таңдағы тӧлге артызарға сағынчатхан Хакасиябыс!
Пӱӱн полған на кізее «пӱдірігҷілер» санына турарға паза піснең хада хынған Хакасияның чахсы чуртазы ӱчӱн тоғынарға чарир. Уламох, хаҷан кризис наа оңдайлар пирче. Хада-пірге тудынзабыс, піске пір дее хатығлас хорғыстығ нимес.
Пістің ӧӧн ис-пайыбыс - кізілер. Хакасияның кӱзі - аның чуртағҷыларында. Пір чӧпнең тудынзабыс, палаларыбыстың, пархаларыбыстың паза кӧргенектерібістің чахсы чуртазы ӱчӱн республика ӧңненер!
Хакасия - пістің ибібіс! Пӱӱн піс аның тӧреен кӱнін таныхтапчабыс! Республика кӱнінең, аарлығ чир-суғҷылар! Ӧңненіс сағаа, хынған Хакасиябыс! - теен Валентин Коновалов.
Республика пазы Хакас Республика филармониязының устағҷызы Вячеслав Инкижековха паза хоос устағҷызы Артур Марлужоковха «Хакас Республиканың чон артизі» кӧксіне хаптырҷаң танығны читірген. Кӧп чыл тіспен істенізі, Хакасияның культуразын хайраллирына, сабландырарына паза тилідеріне пілдірте хозымы ӱчӱн олар аарластығ сыйыхха турысханнар.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы