НИМЕ САҒЫПЧА ПӦЗІК ӰГРЕДІГНІ?
06.07.2022
Хабарлар
Хакас хазна университедінің ректоры
Татьяна КРАСНОВА (оң саринаң) чоох тутча
Ӱгредіг. Россияның Хазна Думазында пӧзік ӱгредігнің тилізіне чарыдылған азых ӱзӱріглер ирткеннер. Анда Н.Ф.Катановтың адынаң Хакас хазна университедінің ректоры Татьяна Краснова араласхан
Пастағызы. Хайди чоохтапча ХГУ-ның ректоры Татьяна Краснова, килчеткен чылларда вузтар техническай специальностьтарны азарына хайығ айландырарлар.
- Хайди искірілген азых ӱзӱріглерде, Россия технологиялар саринаң пасха хазналарнаң палғалыстығ полбасха кирек. Аннаңар піске кӱстіг IT-специалисттер киректелче. Оларны тимнир ӱчӱн, ӱгредіг киреен алыстырарға кирек, олар тирең пілістер алзыннар. Хазнада ІТ-специалисттер, инженерлер, конструкторлар, істезігҷілер читкіҷе поларға кирек. Олар хазнаны технология саринаң арачылап поларҷыхтар.
Таныхтирға кирек, ӱгредіг киреене Болонскай система кирілгенде, халғанҷы 20 чылда инженерлерні тимнирі тӧбін пол парған. Амды піс аны чахсы сизінчебіс. Россияның вузтарында 90 процент - бакалавриат паза магистратура, 10 процент - специалитет. Ирткен азых ӱзӱріглерде депутаттар бакалавриатты паза специалитетті тиңнестірібізер чӧпнең сыхханнар. Специалитетсер тирең ӱгренерге киректелчеткен специальностьтарны айландырарға кирек. Ол инженерлер, ӱгретчілер паза даа пасхазы.
Ӏкінҷізі - ол пӧзік ӱгредіг системазының азых полары. Амды прай даа вузтар сайттарында прай искіріглерні, хабарларны, ӱгредіг программаларын сығарчалар. Анзын амғы чуртас кирексіпче.
Ӱзінҷізі - Россия вузтарын тоосхан специалисттерні хазнадох істенерге артызарға кӱстенерге паза студенттер, ырахтын ӱгренмин, аудиторияларда піліс аларға киректер.
Тӧртінҷізі - практикаа хайығ салары. Хайди амғы студенттер практика иртчелер? Амды имҷілерге паза ӱгретчілерге ӱгренчеткеннер практиканы иң тирең паза алғым иртчелер. Че пасха специальностьтарға ӱгренчеткеннер практиканы хайди ла полза иртібісчелер. Студент предприятиезер парза, анда аннаң пірдеезі айғазарға хынминча. Чаҷында печать турғыс пирчелер, студентке, тізең, анзы ла кирек. Мына мындағ практикаларны тохтадар тоғыс килчеткен чылларда апарылар.
Пизінҷізі - воспитательнай тоғыс. Вузтарның кӧбізі, ол санда ХГУ-да, культура, спорт мероприятиелерін, ӱтертіс марығларын иртірҷең. Амды чир-сууна хынарына ӱгредеріне хайығ салылар. Аның сылтаанда Хакас хазна университедінде чииттер политиказынҷа наа проректор тоғызы кирілче. Аннаң Светлана Владимировна Шмидт устир.
Ідӧк азых ӱзӱріглерде ӱгредігнің качествозынаңар кӧп чоох парған. Школада алай ба университетте олғаннарнаң паза чииттернең тоғынарға хынминчатхан ӱгретчілер полбасха кирек. Ӱгретчілернең кӧп ниме палғалыстығ нооза.
Хазна Думазында ирткен чыылығда ідӧк аймах вузтарның студенттері араласханнар. Пір чиит кізі стипендия суриин кӧдірген. Хайди ол искірген, амды Россияда стипендия сині 3-4 муң салковай. Ол уғаа тӧбін. Чыылығ араласчылары аннаң чарасханнар. Ол ортымахти 7 - 8 муң салковайға тиңнелерге кирек. Пу сурыға чыылығ араласчылары соонаң айланарға молҷааннар, - искірген Татьяна Григорьевна.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы