АРТИСТ ТОҒЫЗЫНАҢ ТАНЫСХАННАР
06.07.2022
Хабарлар
Светлана ЧАПТЫКОВА паза Айсили МАЙНАГАШЕВА
чайғыдағы театр школазынзар чӧрген олғаннарнаң хада
Культура. «Читіген» театрда чайғыдағы театр школазы тоғынды
Олғаннарның чайғыдағы школа лагерьі тоозыл парды. Ағбандағы школалар аны хынығ иртіргеннер. Анзы пілдістіг, республиканың ӧӧн городында ӱтертістіг орыннар кӧп нооза. Лагерь тузында олар олған библиотеказынзар чӧргеннер, спорт ачыхтарында аймах ойыннар ойнааннар, зоопаркта полғаннар, школаларында пластилиннең ойначахтар чайааннар, хоостар хоостааннар. Ағаа хоза, пӱӱл ӱгренҷілернің пастағызын на театр тоғызынаң тирең танысчаң оңдай полды. 26-ҷы, 8-ҷі, 3-ҷі, 21-ҷі школаларның ӱгренҷілері ӱс неделя «Читіген» театрзар «тоғынарға» чӧргеннер.
- Республикадағы хоза ӱгредіг пирҷең кіннең хада чӧптезіг ит салғабыс. Аны хоостыра «Читігенде» чайғыдағы театр школазы азылды, - чоохтапча «Читіген» театрның директоры Ирина Чустугешева. - Іди олғаннарнаң тоғынып пастабыстыбыс. Наа ла килгеннерінде, харахтары кӧйчеткен. Хысхаҷах тус аразына олар тӧрт аймах ойын тимнебіскеннер. Театр чуртазында ӧткін араласханнар. Кибелістер дее ӱгрен салтырлар. Ойыннарға чахсы тимнен салтырлар.
Кӱскӱзін театр студиязын азарға пӧгінчебіс, аннаңар пастағы мындағ хаалағлар итчебіс. Піске хакас тілінең чахсы чоохтасчатхан палалар киректелче. Пос артисттерін ӧскірерге кирек. Мыннаң мындар апарҷаң тоғыс кӧп.
Школадағы лагерьнің тоғызы тоозылғанда, чайғыдағы театр школазынзар чӧрген олғаннар «Читіген» театрда хысхачах ойыннарын кӧзіткеннер. Оларны Россияның саблығ артизі, Хакасияның чон артизі, драматург, режиссёр Светлана Чаптыкова тимнеен.
- Хандых айының пастағы кӱннерінең мин олғаннарнаң тоғынып пастаам. Пурнада танысхабыс. Анаң мин оларға театрдаңар чоохтаам. Хайдағ театрларны пілчезер тіп сурғанымда, олғаннар Хакасиядағы прай даа театрларны пілбинчеттірлер. Театрзар удаа чӧрчеткеннер ідӧк чоғыл. Пу тоғазығларның ноо нимезі чахсы? Олар амды хайдағ театрлар парын паза пос туста хайдар чӧрерге чарирын пілерлер. Театрдаңар олаңай чоохтаанда, ӱгренҷілерге хынығ пілдірбеен. Паланың чайаачы тоғысха тартылғаны іле кӧрінче. Чайааннар салған оңдайы полза, аның харахтары пасха чарыпча. Мағаа ікі Софья хызычах паза Денис оолах чахсы полысханнар. Оларға чайаачы тоғыста аралазарға хынығ полған.
Кізі сценазар сығарға хаҷан даа уйатча. Пастағы кӱнде адайахтаңар ойында пасха пала ойнаан. Піс ол ойынны прай турғыс салғабыс. Пазағы кӱнінде ол пала адайахты ойнирға тоғыр полыбысхан. Анаң иссем, лагерьдегі олғаннар ол оолахты «адайах» тіп тартыс сыхтырлар. Ол анзына сыдабаан. Анаң пасха матыр табыл парған, ідӧк оолах. Хызычахтар даа адайах поларға сағынғаннар.
Сценаа сыхханда, театр чарытхызын чарыдыбысханда, ойынға килістіре кӧглер ойнадыбысханда, олғаннар саңай алыс парғаннар. Итсе, пастап хоғдырасханнар, чӱгӱріс чӧргеннер. Соонаң артист чуртазына тирең тартыл сыхханнар, удур-тӧдір ӱгрет сыхханнар, полызысханнар. Минің кӧрізімнең, театр школазына чӧріп, чайаачы усха оларның харахтары, чӱректері кӧмес азыл парды.
Ам устағ-пастағ чоохтапча, полған на школада театр кружогы поларға кирек. Анзы орта пӧгін. Ноғадаңар? Андада палалар постарына киртін сығарлар, чахсы чоохтазарға, ӧткін тудынарға ӱгренерлер. Театр кружогы оларға чуртас чолын табарға полызар.
Светлана Семёновнаа театр школазынзар чӧрчеткен олғаннарнаң ойын турғызарға тееннеріндӧк, режиссёр Вадим Левиннің кибелістерін сағысха кирген. Ол институтта ӱгренчеткендӧк, поэттің хысхачах кибелістерін хығырарға хынҷаң. Аның кибелістерін сценаа кирерге оой тіпче ол. Анда прай сӧстер паза ноо ниме полчатханы пілдістіг пазыл парған. Кибелістер кӧмес кӱлкістіг, че олох туста ӱгредігліг.
Ідӧк япон поэзиязынаң алылған ойынны турғысханнар. Анда пір оолах пастых полчатхан Джонатан Биллні ойнаан. Пасхалары ағаа тоғынчалар, хол саларға пічіктер ағылчалар, улуғ пастыхты улуғлапчалар. Анзы, тізең, харых тартып узупча. Соонаң ілезіне сығыс парған - Джонатан Билл компотха хынчаттыр.
Светлана Семёновна ідӧк олғаннарны ойында тың чоохтанарға, орта аңдарыларға, ритм хоостыра пас чӧрерге ӱгреткен. Режиссерға олғаннарнаң тоғынарға «Читіген» театрның чиит артизі Айсили Майнагашева полысхан.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы