ЧИИТТЕРГЕ ЧОЛ АЗЫХ ПОЛАДЫР
06.07.2022
Хабарлар
«Студенттер часхызы» фестивалының чиңісчілері Никита КОТОЖЕКОВ, Татьяна МАЗИНА паза Айат КАНЫСОВ
Чайаачыларыбыс. ХГУ-ның музыка колледжінің студенттері Айат Канысовха, Татьяна Мазинаа паза Никита Котожековха пу ӱгредіг чылы уғаа танығлығ полды
Олар пӱӱл Челябинск городта ирткен Россия синіндегі профессиональнай ӱгредіг учреждениелер студенттері аразындағы «Студенттер часхызы» фестивальның чиңісчілері полыбысханнар. Татьяна Мазина «Эстрада сарыны/соло» номинацияда пастағы орынға турысхан, Айат Канысов «Чон сарыны/соло» номинацияда ікінҷі орын алып алған, Никита Котожеков, тізең, «Чон кибірлеріне сын полғаны» ӧнетін сыйых алған.
Никита Котожеков Н.Ф.Катановтың адынаң Хакас хазна университедінің музыка колледжінде ікінҷі чылы ӱгрен салды. Ол пу ӱгредіг заведениезінде кӧрілген «хакас кӧг тиріглері» специальность алча. Чайаачы кӧңніліг оолның тӧреен-ӧскен чирі Алтай аймаандағы Аршаннар аалы полча. Андағыох ортымах школада 9 класс тоосхан.
- Пастағы класста ӱгренчеткенде, музыка ӱгретчізі піске Аршандағы олған музыка школазынзар чӧрерге чӧп пирген. Хада ӱгренген арғызымнаң хада тоғыр полбаабыс. Пастап Наталья Юрьевна Сергееваның устаанынаң ӧмеде сарнаҷаңмыс паза теелбектенҷеңміс. Че анаң піс Валентина Ильинична Тюкпиековазар парыбысхабыс. Ол пу школада хакас кӧг тиріглерінең ойнирға кӧніктірче. Минің кӧңніме хомыс кірген. Іди хомыснаң ойнирға ӱгреніп алғам, - чоохтап пирген Никита.
Хайди ол таныхтапча, Н.Ф.Катановтың адынаң Хакас хазна университедінің музыка колледжінзер кірерге аны ідӧк Валентина Ильинична кӧстебістір. «Минің саңай пасха сағыс полған - Харатас городтағы тағ техникумында ӱгренерге. Че киліспин парған. Анаң ӱгретчімнің чӧбінҷе музыка колледжінзер парғам», - тіпче чиит оол.
Чоохтирға кирек, хакас кӧг тириинең таныс Никита Котожеков пу ӱгредіг заведениезінзер сидіксініс чох кіріп алған. Ол амды хомыснаң ойнир узын ӱгретчі Вячеслав Вадимович Албычаковта алғытча. Пӱӱнгі кӱнде чайаачы студент аның устаанынаң ідӧк чатханнаң, ыыхнаң ойнирға ӱгренче.
Паза Никита Котожеков, колледжте хада ӱгренчеткен оол-хыстарох чіли, аймах марығ-пайрамнарда удаа араласча. Ползын ол ӱгредіг заведениезі алай республика синінде. Чайаачы оол пӱӱл дее ол киректең хыйа турбаан. Россия синіндегі профессиональнай ӱгредіг учреждениелерінің студенттері аразындағы «Студенттер часхызы» фестивальда аралас кӧрерге чаратхан.
- Пастап регион синінде таллағлар полғаннар. Мин аны маңнаныстығ ирт парыбысхам. Анаң чол азылған Челябинск городсар. Пӱӱл анда ирткен пу фестивальның халғанҷы чардығы. Мин анда хомыснаң ойнаам. Россияның паза Хакасияның саблығ артизі Евгений Улугбашевтің «Алнындағы чол» произведениезін толдырғам. Салтарында ӧнетін сыйыхнаң таныхтатхам, - чарытхан студент оол.
Челябинсксер Хакасиядаң парған делегациянаң музыка колледжінің паза пір студенті Айат Канысов устаан. Ол - Тағлығ Алтайдаң сыххан оол. Россия синіндегі «Студенттер часхызы» фестивальда пос чоныныңох «Санаалар» сарынын толдырған. Татьяна Мазина, тізең, англия тілінең эстрада сарынын сарнаан.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы