АЙМАХТАРҒА ГАЗ ХАЙДИ ПИРІЛЧЕ?
15.07.2022
Хабарлар
Ағбан город пазының орынҷызы Владимир ЖУКОВСКИЙ, «Красноярсккрайгаз» АО-ның ӧӧн директоры Александр КОВАЛЬ, «Минусинскмежрайгаз» АО службазының пастығы Александр МЕНГЕЛЬ,
«Назаровомежрайгаз» АО службазының пастығы Константин БУРЫЙ
Пресс-конференция. «Хакасия» газетаның редакциязында республиканың прай аймахтарына газты читірер сурыға чарыдылған пресс-конференция ирткен
Амғы туста пістің регионда газты ікі предприятие пирче - «Харатастағы» МУП паза «Красноярсккрайгаз» акционер пірігізі. «Харатастағы» МУП газты Харатас городха паза Ағбан пилтірі аймаана читірче.
2013 чылның улуғ хырлас айына теере республикада газты «Хакасгаз» предприятие пирчең, анаң ол банкрот пол парғанда, Ағбанда «Красноярсккрайгаз» тоғын сыххан. Аның директоры Александр Коваль амғы туста аймахтарға газ хайди тарадылчатханнаңар чоохтап пирген.
- 2013 чылда Ағбанның устағ-пастаа сурынызынаң городтың газ хониин холға алғабыс - 100-че резервуарлығ газ пӱдіриине піріктірілген 10000 азыра квартира. Анаң Хакасия чуртағҷыларына газтығ баллоннарны читірерінҷе тоғысты апарғабыс. Пастап Ағбан городта баллоннар хайраллаҷаң склад тӧстеебіс. Кізілер, складсар киліп, газ ал сыхханнар. Анаң андағох складты Алтай аймаанда асхабыс. Кӧместең республиканың пасха даа аймах тарынзар газты тарадып пастаабыс, - чооғын пастаан «Красноярсккрайгаз» акционер пірігізінің ӧӧн директоры Александр Коваль.
Пӱӱл кӱрген айында предприятие Орджоникидзе аймаандағы Копьёв посёлокта газтығ баллоннарны хайраллачаң склад тӧстеен.
Чуртағчыларға, андар постары киліп, газты садызып аларға чарир. Пу складтаң газ 21 аалзар машинанаң тарадылча. Газ хайраллачаң склад Асхыс аалның хыринда, Сорығда, Знаменка аалда тӧстелген. Хандых айында Шира аймаанда склад азылған. Асхыс аймаанда газты складтаң на алар оңдай пар. Аалларҷа ол тарадылғалах.
Александр Ковальның таниинаң, пасха аймахтарда газ хайраллачаң складтар чох таа полза, идінчектер газтығ баллоннарны сатчалар. Че аны садысчатхан кізілернің хай пірее сидіксіністер сығысча. Газ ӱчӱн чуртағчыларға субсидия пирілче. Идінҷектер газты пос паанаң сатчалар, «Красноярсккрайгаз» акционер пірігізі, тізең, хазна турғысхан паанаң.
- Баллоннарзар газ ӧнетін пункттарда урылча. Хакасияа баллоннығ газ Назаровтағы пунктта тимнелче. Андартын баллоннар республиканың алтынзархы аймахтарынзар тарадылча. Минсуғдағы газ урҷаң пункттаң баллоннарны Хакасияның пасха аймахтарынзар ағылчалар. Піс законодательствоның прай кирексіністеріне тудынчабыс. Баллоннарны ситкіп сыныхтапчабыс. Кізілер, газты алчатсалар, хуруғ баллоннарын ағылчалар. Піс, оларны кӧрглеп, тузаланысха чарапчатханын-чарабинчатханын сыныхтапчабыс. Мының алнында газ баллоннарын 40 чыл тузаланарға чарадылхаң, амды - 20 чыл. Ағаа хоза, баллонны полған на пис чыл пазынаң сыныхтирға кирек. Чуртағҷылар ағылған баллоннар тузаланысха чарадылбинчатсалар, піс аның орнына наа баллон садызып аларға чӧп пирчебіс. 50 килограммнығ наа баллон 6 муң салковайға турча, 27 килограммнығ - 5 муң салковайға.
Тудынған баллоннарның паазы ікі хати ниик. Тузаланысха чарабинчатхан баллоннар хорғыс ағылчалар. Аннаңар оларзар газ урылбинча. Аны, тыхтап, сырлабысчабыс, - теен Александр Коваль.
Газтығ баллонны садызып алған кізее аннаң орта тузаланардаңар паза хайди таарлирдаңар искіріг пирілче. Газнаң орта тузаланза, ол хорғыс ағылбинча. Хай пірее кізілер заправкада газты, садызып, постары баллонзар урып алчалар. Таныхтирға кирек, газ баллонзар 85% урылча. Кізілер, анзын пілбин, баллонзар толдыра ур салчалар, анаң чара чачырас пол парча. Мының алнында Хакасияда андағ кирек полған, хаҷан пір ирен, заправкада газты садызып, баллонға толдыра ур салған паза аны мылчазында турғыс салған. Ӱр дее полбинаң ол чара чачырап парған. Мылчадаң пір дее ниме халбаан. Ол кізі мылчадаң оортах турған сылтаанда хазых халған.
Газтың паазы чылда пір хати от айында алысча. Амды посха киліп алчатса, пір килограмм газ 52 салковай 92 ахчаа тур парар, аал-городтарзар машинанаң ағылған килограмм газ - 56 салковай 49 ахчаа, Ағбандағы кӧп квартиралығ газ тартылған тураларға - 46 салковай. Баллонда газтың кӧдірімі 21 килограммға тиңнелче.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы