ТАҢДАҒЫЗЫНЗАР ІЗЕСТІГ КӦРІСНЕҢ!
15.07.2022
Хабарлар
Ферромолибден сығарчатхан завод
Металлург кӱніне. Чағдапчатхан тынағ кӱннерінде Хакасияның Саяногорск, Абаза, Сорығ городтары паза Тӧӧ пазы поселок тӧреен кӱннерін Металлург кӱнінең хада таныхтирға тимненчелер
Пу орыннар тиктең нимес адалды. Чир ис-пайын анып, тимір сығарчатхан предприятиелернің ӧӧн чардығы пу городтарда паза поселоктарда орныхчалар: Саяногорск - алюминий городы, Абаза паза Тӧӧ пазы тимір сығарызынаң палғалыс парғаннар, Сорығ - ферромолибденнең.
Сорығда ферромолибден заводы паза чир ис-пайын пайытчаң комбинат тоғынча. Таныхтирға кирек, хазна пошлиналары паза налогтар ӧскірілгеннеңер, пу предприятиелер сидіксіністерге урунғаннар. Ікінӌі тынысты алынарға полысхан Хакасияның ӱлгӱлері. Олар Россия правительствозынзар молибден сығарызынаң палғалыстығ предприятиелерге хазна пошлиналарын тӱзірерге сурыныснаң айланғаннар. Сурығны Россия правительствозы кнезінің орынӌызы Виктория Абрамченко хайыға алған. Пірдең, пу предприятиелер тоғызынаң Сорығ городтың таңдағызы паза арачыланыс промышленнозы, авиа паза ракета пӱдірии палғалыстығ. Олар хазнада молибденні тиксі тимге сығарчатхан чалғыс предприятие полчалар.
Пӱӱнгі сығарыста Сорығдағы ГОК-тың паза ферромолибден заводының амғы тузынаңар паза мыннаң мындархы тилізінеңер чоохтапча предприятиелер устағӌызы Виктор Седусов:
- Сорығның чир ис-пайын пайытчаң комбинат паза ферромолибден заводы Сорығның экономика тилізіне ӧӧн хозым итчелер, предприятиелер муниципальнай пӱдісте иң кӧп тоғыс орнын тӧстепчелер, піс 1500 кізее тоғыс пирчебіс.
2021 чыл оой нимес полған, че комбинаттың паза заводтың тоғыс ӧмезінің чӧптіг тоғынғаны кӧрілген сығарысты толдырарға полысхан.
Чир ис-пайын пайытчаң фабриканың тоғыс тӱзімін синдірбес ӱчӱн, ікі дамба пиктелген, чарчатхан наа дамбада пульповод салылған. Ирткен чылда улуғ хырлас айында ол чолча кирек чох чирні сығарып пастаабыс. Фабрикада флотомашинаны тыхтаға турғысчатса, чис концентрады саңайға чідірілчеткен. Іди полбас ӱчӱн, ӧнетін проект чуртасха кирілген. Салтарында читі айға сығарыста тузаланарға 50 тонна чис концентрадын айландырып алғабыс.
Предприятиелерге тағ транспорты алылча. 2021 чылда ТСМ FD-30 автопогрузчик, К-702 бульдозер паза СО1-265 виброразгрузчик алылған, пӱӱл - «CASE» автогрейдер, «Урал-Некст» самосвал паза ӱс БелАЗ самосвал, чыл тоозыларына наа экскаватор кірерін сағыпчабыс. Флотомашина садызарына 25 миллион салковай позыдылған. Тиріглерні наачылирына паза тиксі тыхтағ иртіреріне ідӧк ахча пирілче.
Комбинатта паза заводта тоғынҷыларны тут халар ӱчӱн, 2021 чылның чарыс айынаң пасти прайзына чал ахчазы ӧскірілген. Промышленность-сығарыс тоғысчыларының тарифтері паза окладтары ортымахти 30 процентке кӧдірілген, пӱӱл кӧрік айында - хоза 10 процентке. Чыл сай иртірілчеткен индексация паза чал ахчазы ӧскірілген сылтаанда пӱӱнгі кӱнде тоғынҷыларыбыстың ортымах чал ахчазы 53 муң салковайға тиңнелче.
Экономика сидіксіністеріне урунзабыс таа, предприятиелерде тоғысчы ӧменең чӧптезігде кӧрілген прай социальнай кирексіністер толдырылча. Тоғынҷыларны арачылир пӧгіннең паза оларны тоғынарға кӧӧктірер ӱчӱн азырирға дотация кӧріл парған. 2021 чылда паза 2022 чылның пис айына тиксі 47 миллион азыра салковай позыдылған.
Ідӧк піс тоғынҷыларға санаторий-курорттарда хазыхтарын пиктир оңдай пирчебіс. 2021-2022 чылларда ол кӧстеге 1,5миллион салковай хорадылған. Ағаа хоза 3 миллионча салковай тағҷыларның паза металлургтарның палаларына чайғызын хазых пиктечең лагерьлерзер путевка аларға кӧрілген.
Улуғ частығлардаңар ідӧк сағыссырапчабыс. Іди предприятиеде ӱзігі чох 25 чыл паза аннаң даа ӱр тоғын салған кізі, тынаға сыхчатса, тӧрт ортымах чал ахчазын пір саңай алча. Іди 2021-2022 чылларда пенсияа сыхханнарға 2 миллион салковай тӧлел парған. Алынҷа тоғынҷыларға ахчанаң полысчабыс, ол кӧстеге пу чылларда 5 миллион салковай позыдылған. Пу чылның пис айына социальнай тӧлеглерге 30 миллион салковай парыбысхан.
Піс тоғынҷыларыбысха чахсы тоғыс оңдайларын тӧстиріне паза таңдағы кӱнге ізеністерін чідірбес ӱчӱн прай ниме итчебіс. Предприятиелер, сорығдағыларға тоғыс орыннарын пирчеткенінең пасха, город чуртағӌыларына истіг чуртас оңдайларын тӧстирінде орындағы устағ-пастаға полысчалар. Сорығдағы чир ис-пайын пайытчаң комбинат паза ферромолибден заводы кірчеткен «Союзметаллресурс» компания 2022 чылда город тилізіне 7,5 миллион салковай хосхан.
- Тоғынчыларның паза оларның сӧбірелерінің чахсы чуртазынаң палғалыстығ пістің предприятиелернің маңнаныстығ тоғызы, - таныхтапча Виктор Седусов. - Социальнай учреждениелерні тыхтирына, класстарға паза олған садтарына тиріглер аларына ахча позыдып, піс пос палаларына ӱгренчең паза тынанчаң чахсы оңдайлар тӧстепчебіс. Олар - пістің городтың паза предприятиелернің таңдағызы.
Іди 1,5 миллион азыра салковай ӱгредіг учреждениелерінің тилізіне позыдылған. Ол ахчаа городтағы школалар, олған садтары тыхталар, 1№ ортымах школазар наа мебель алылар. Аннаң пасха Олғаннарның чайаачы туразының, «Металлург» культура туразының, В.В.Андрияшевтің адынаң Сорығдағы чир-суғ ӱгренӌең музейнің, музыка школазының паза пасхазының кирексіністеріне 50 - 100 муңар салковай позыдылған. Олғаннарға ойнаӌаң орыннар чидіспинче. 2022 чылда компания полызиинаң Сорығда 11 олған ачығы турғызыл парар. Оларны садызып турғызарына 4,2 миллион салковай пирілген.
2008 чылдаң сығара Сорығда православнай тигіриб пӱдірілче. Пӱӱнгі кӱнге анда ӧӧн тоғыстар толдырыл парған, халған істіндегі тоғыстар. Ол пӧгінге компания 1,7 миллион азыра салковай позыдар.
Металлург кӱніне удур ГОК-тың паза ФМЗ-ның тоғынӌыларын хайди даа Аарластығ пічіктернең паза ахчалығ сыйыхтарнаң таныхтапчалар. Іди пӱӱл тиксі 128 тоғынӌы сыйыхтарға турысхан. Предприятиелернің Аарластығ пічиине паза ахчалығ сыйиина комбинаттың 26 паза заводтың 23 тоғынӌызы турысхан, ол санда обжигальщик Дмитрий Кирбижеков, флотатор Ксения Кочетаева, хара металлның сығарызында контролер Галина Кучендаева. Комбинаттың 37 паза заводтың 25 тоғынӌызына ахчалығ сыйых паза алғыстас чарлалған, ол санда мастер Александр Араштаевке, кран машинизі Татьяна Килижековаа, слесарь Анатолий Янгуловха, бульдозер машинизі Артем Костяковха, водитель Алексей Орешковха, насос станциязының моторизі Надежда Кучендаеваа, уборщик Наталья Костяковаа паза пасхазына.
Иң чахсы тоғынчатханнарның Аарластығ чардызына сығарылған 17 кізі. Оларның ады-сомы чыл ибіре турар. Чахсы салтарлар кӧзітчеткеннер санында ферромолибден сығарарынӌа цехта істенчеткен обжигальщик Иван Трояков.
Автор :
Тимнеен Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде