ОЙЫН ХЫНЫҒ ИРТКЕН
20.07.2022
Хабарлар
Кристина АЁШИНА тасты «тураа» киріп аларға пӧгінче
Чайғыдағы тынағ. Ағбандағы «Тепсей» физкультура-хазых комплексінде чайғыдағы кёрлинг ойнап аларға чарир
Пу комплекс 2020 чылда мартта тоғынарға пастаан. Ол Ағбанда Торосовтың орамазы, 12 номер тура адресче орныхча. «Тепсейнің» ӧӧн пӧгіні - чуртағӌыларға хазых пиктир оңдай пирері. Комплексте бассейн, тренажер залы тоғынчалар. Анда аймах кӧрімніг фитнеснең - суғ аэробиказы, чӱл-уйа гимнастиказы, deepWORK, киидегі акробатика паза пасхазы - айғазарға чарир. Ағаа хоза, «Тепсейнің» спорт ачығы пар. Ачыхта чон ӱзілбинче. Саарбахтар иир сай баскетбол, футбол хынып ойнапчалар. Ідӧк мында кёрлингче марығлар иртче.
Кёрлинг - олимп спорт кӧрімі. Ол Шотландияда XVI чӱс чылларда тӧстел-ген. Спортсменнер пус чазызында ойнап-чалар. Командазар тӧрт кізі кірче. Марығ оңдайларынӌа оларға, тасты пусча ідібізіп, чылчатхан тирігні кӧріл парған орынзар - ол «тура» адалча - читіріп аларға кирек. Тас 19,96 килограмм пасча, аны Эйлс-Крейг олтырыхтағы (Шотландия) граниттең не итчелер. Аар пасчатхан тирігні пусча ырахха ідерге андағ ла оой нимес, аннаңар ӧмедегілер, чылчатхан тастың чолын алнында ӧнетін щеткаларнаң чызып, тирігні «туразар» читіріп аларға кӱстенчелер. Ідӧк спортсменнерге «ыырӌыларның» тастарын «турадаң» сығара іде сазыбызарға кирек. Полған на команданың 8 тас, ойын 10 энд алай раунд парча. Энд соонда саннар санапчалар. «Турада» иң кӧп тас чыып алған ӧме чиңіс тутча.
Кёрлинг - хысхы спорт кӧрімі. Че ідӧк чайғыдағы (флор) кёрлинг пар. Аны пол кёрлингі адабохчалар. «Floor» англия тілінең «пол» тіп тілбестелче. Мында ӧӧні - спортсменнер тастарны пусча нимес, брезент чазыӌа чылдырчалар. Тастар пластиктең паза резинадаң иділгеннер, аннаңар аар паспинчалар. Оларның алтында ӱс кічіг тегілегес пар. Флор кёрлингінде щеткалар кирек чоғыл.
«Тепсей» комплексте кёрлингтің ікі кӧрімін тилідерге кӱстенчелер. Тоғынӌылар Хызылчарда ӱгредіг ирткеннер. Мында секцияның тоғызынаңар чоох парбинча, че пос туста ӧменең чыылызып ойнабызарға чарир. Чайғы туста «Тепсейде» флор кёрлингінӌе марығлар иртче. Аннаңар устағ-пастағ социальнай сетьтер пастыра азынада искірче. Халғанӌызын кёрлингке хынчатханнар 14 июльда иирде чыылысханнар. Директор орынӌызы Александра Филимонованың устаанынаң ойын ирткен.
Марығда олғаннар ла араласханнар. Оларны Александра Владимировна ӱс ӧмее чарыбысхан. Пастағы команда «Феникс» адалған, аның араласчылары - харындастар Диманаң Ваня Фисоченколар паза Элина Левенок. Дима 5 классты тоостыр, Ванянаң Элина пасталығ класс-тарда ӱгренчелер. Ӧӧрелер Лиза Чупрова паза Кристина Аёшина «Шкоды» тіп аданып алғаннар. Халғанӌы ӧме «Бойз» полған, анда Тася Ткачеванаң Катя Чупрова ойнааннар. Элина Левеноктаң пасха, прай палалар флор кёрлингінде кӱстерін сынирға маңнантырлар.
Марығ оңдайларынаңар чоохтаза, ойын пис энд парған, полған на командаа тӧрт тас пирілген. Пастап прай ӧмелер удур-тӧдір ойнааннар. Азах меетке иң кӧп сан чыып алған ікі команда сыххан. Сынында кёрлинг - чӱрексіністіг ойын. Тасты прай кӱснең ідібіссең, тиріг чазыдаң сығара учуғыбысча, чахсы ітпезең, «тураа» читір полбассың.
Кічіглер кӧйтіктенмин ойнааннар, улуғ арах палалар, таймаут алып, удур-тӧдір чӧптезерге ле маңнанминчатханнар. Салтарында азах меетке «Феникс» паза «Шкоды» сыхханнар. Пис энд соонда сан 4:4 пол парғанда, прайзы алаң ас парған. Пазох ойнирға киліскен. Кристина Аёшинанаң Лиза Чупрова чиңіс тутханнар. Александра Филимонова олғаннарға улуғ нимес сыйыхтар читірген. Александра Владимировнаның чооғынаң, кёрлингче марығлар тӧреміл хынығ иртчелер. Улуғлар, «ағырып», хысхырчалар, чарғыӌыларнаң таласчалар. «Тепсей» прайзына марығ иртірерге тимде, че комплекстің устағ-пастаанзар сурыныс пічиинең айланарға кирек.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы