ЧОННЫ ӦРТТЕРДЕҢ АРАЧЫЛИРЫ ТЫЫДЫЛАР
27.07.2022
Хабарлар
Асхыс аймаанда орныхчатхан ӧрттердең тоғыр кӱресчең 4№ отрядтың пастығы Аркадий СУНЧУГАШЕВ паза водитель Сергей ТОПОЕВ Хакасия пазы холынаң автоцистернаа клӱстер паза пічіктер алып алдылар.
Наа техника. Хакасия пазы Валентин Коновалов Ағбанда Пастағы май площадьында республиканың ӧрт ӱзірҷеңнеріне наа техника клӱстерін паза пічіктерін читірген
ХАКАСИЯНЫҢ ПРАВИТЕЛЬСТВОЗЫ «ХАКАС РЕСПУБЛИКАНЫҢ ЧОНЫН ПАЗА ЧИРЛЕРІН АЙМАХ ХОРҒЫСТАРДАҢ, ӦРТТЕРДЕҢ АРАЧЫЛИРЫ ПАЗА СУҒЛАРДА КІЗІЛЕРГЕ ХОРҒЫС ЧОХ ПОЛАРЫ» ХАЗНА ПРОГРАММАЗЫ ХООСТЫРА ӦРТ ӰЗІРҶЕҢ 4 АВТОМОБИЛЬ АЛАРЫНА 42,48 МИЛИОН САЛКОВАЙ ПАЗА НИИККЕ ЧӦРҶЕҢ 3 АВТОМОБИЛЬ АЛАРЫНА 2,47 МИЛЛИОН САЛКОВАЙ ПОЗЫТХАН. ӦРТ ӰЗІРҶЕҢ АВТОМОБИЛЬЛЕР ПАЛЫХТЫҒ СУҒ, БОГРАД, ТАШТЫП ААЛЛАРДАҒЫ ПАЗА АҒБАН ПИЛТІРІ ПОСЁЛОКТАҒЫ ӦРТ ӰЗІРҶЕҢ ЧАСТЬТАРЗАР ЫЗЫЛАРЛАР.
Пастағы май площадьында ӧрт ӱзірӌең 4 автоцистерна паза ниикке чӧрӌең ӱс «Лада Гранта» автомобиль изере турғаннар. Пір автоцистерна алнында Асхыс аймаанда орныхчатхан ӧрттердең тоғыр кӱресчең 4 № отрядтың пастығы Аркадий Сунчугашев паза автоцистернаның водительі Сергей Топоев турғаннар.
Хайди таныхтаан Аркадий Андреевич, амды пирілчеткен наа автоцистерна Палыхтығ суғ аалзар ызылар. Анда ам ӧрт ӱзірӌең наа часть азылған, пу автомобиль Палыхтығ суғ аалны паза ағаа чағын аалларны ӧрттердең арачылирға чахсы хабазар. Халғанӌы туста аалларға наа техника кӧп пирілче.
Ідӧк площадьта Хакасияның ӧрттердең тоғыр службазының пастығы Александр Кужаковнаң чоох алысхабыс. Хайди ол искірген, халғанӌы 30 чылда ӧрттердең тоғыр службаа мындағ наа техника пирілбеен полған. Амды пір саңай 4 автоцистерна алылды. Августта хоза 19,22 миллион салковайға турчатхан пасхыстығ автоцистерна алылар. Ол Тойым посёлоксар ызылар, анда ӧрт ӱзірӌең наа депо пӱдірілген, ағаа ам чахсы хозым полар. Посёлокта кӧп хадыллығ туралар пар, ідӧк анда психоневрология диспансеріне хоза улуғ корпус пӱдірілче, аннаңар андағы частьха пасхыстығ автоцистерна киректелче. Амды площадьта турчатхан 4 автоцистернаны иргі ниик арах пааӌа 10,6 миллион салковайға садызып алғабыс. Олар амды 14 миллион азыра салковайға турчалар. Ниикке чӧрӌең «Лада Гранта» оперативнай автомобильлер Хакасияның ӧрттердең тоғыр службазына искіріглерӌе табырах чӧрерге чахсы хабазар.
Валентин Коновалов стройда турчатхан ӧрт ӱзірӌең командаларзар айланған:
- Хакасияның ӧрттердең тоғыр службазы хазнаның ӧрт ӱзірчең системазының чардығы полча. Піс 2015 чылда регионда полған чобағлығ киректерні ундубинчабыс. Пӱӱл дее пістің ӧрт ӱзірчеңнерге оой нимес сыныхтағлар иртерге киліскен, че сірер сыдасхазар, сидіктерні турыстыра тобырғазар. Сірер кізілернің чурғазын, хазиин, ис-пайын ӧрттердең арачылапчазар. Республика правительствозы ӧрт ӱзірчеңнерге наа техника паза оборудование аларға сыбыра кӱстенче. Пу алылған автомобильлер сірерге ӱр полыссыннар, ӧрттер саны асхынах ползын.
Чооғын тоозып, республика пазы Хакасияның ӧрт ӱзірӌең командаларының устағӌыларына автотранспорттың клӱстерін паза пічіктерін читірген. Анаң автоцистерналарның прай тиріглерін ағаа кӧзіткеннер.
Пу ӧрт ӱзірӌең автомобильлер иртерге сидік орыннарӌа чӧрер оңдайлығлар. Оларның кізілерні арачылир аймах гидравлическай тиріглері пар. Пӱӱл ам даа ӧрт ӱзірӌең ікі автомобиль садызып алары кӧрілче.
Хакасияның ӧрт ӱзірӌең хадаан 2021 - 2027 чылларға тилідер план чарадыға алылған. Аны хоостыра Хубачарда, Таштып аймаандағы Мадыр аалда, Ағбан пилтірі аймаандағы Піӌі пазы паза Солнечнай аалларда, Шира аймаандағы Шира паза Жемчужнай аалларда ӧрт ӱзірӌең деполар пӱдірілер. Ідӧк ӧрттердең тоғыр службаның подразделениелерінде штаттар саны хозылар, наа автомобильлер, оборудование алылар.
- Хакасия правительствозы ӧрт ӱзірчеңнерге мыннаң мындар ідӧк прай саринаң полызар, - таныхтаан Валентин Коновалов.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы