ПӀСТӀҢ ЧААҶЫЛАРҒА ХАБАЗЫҒ
27.07.2022
Хабарлар
Россия армиязына хабазар акцияда Хакасия пазы Валентин КОНОВАЛОВ араласхан
Автомобильлер чӧрізі. Ағбанда тиксі Россиядағы «Боевое братство» халых пірігізінің региондағы пӧлии Украинада ӧнетін чаа операциязын иртірчеткен Россияның армиязына хабасчатхан автомобильлер чӧрізін иртірген
Ағбанда Пастағы май площадьында аймах автомобильлер сыыспин турғаннар, оларның саны чӱстең асхан полар. Прайзының даа ӱстӱнде Россияның, Хакасияның, Чиңіс, политика партияларының, халых пірігістерінің флагтары чалбырапчатхан. Россия президенті Владимир Путинге, Украинада ӧнетін чаа операциязын иртірчеткен пістің армиябысха хабазар улуғ мероприятиені «Боевое братство» пірігіс иртірген.
Прай даа автомашиналарда «2» танығ полған, ідӧк мероприятие араласчылары борттарында «2а Пу-тина!», «Zа армию!», «Zа Шойгу!», «Zа Россию!» улуғ букваларнаң пазып алтырлар.
Чӧріс пасталар алнында «Боевое братство» халых пірігізінің региондағы пӧлиинің устағҷызы Александр Векшиннең чоох алысхабыс. Хайди ол таныхтаан, пу акция Россия президентіне, армияа хабазар пӧгіннең иртірілче. Амды мероприятие Ағбанда полар, анаң полған на аймахта мындағ акциялар иртірілері кӧрілче. Россияның чааңылары пілзіннер - оларға прай халых чон хабасча.
Хакасия пазы Валентин Коновалов автомобильлер колонназының иң алнында парар «Урал» автомашинаның кабиназынзар пассажир орнына одырыбысхан. Колонна, Щетинкиннің, Чоннар ынархазы орамаларҷа аэропортсар парчатхан чолдағы тегілек орынға чидіп, алтынзархы дамбаҷа Ағбан суғ кизіре коммунальнай тахтазар сығып, Ирт тағзар чол тутхан. ГИБДД тоғынҷылары колоннаны хорғыс чох иртірер тоғыс апарғаннар.
Чуртағҷылар автомобильлер чӧрізін ӧрініснең удурлап турғаннар. Анзы ідӧк пілдістіг, полған на кізі пістің чааңыларға хабазар сағыс тутча нооза.
Ада чир-суубысты арачылап, чуртастарын пир салған Хакасия чуртағҷыларына чарыдылған Ирт тағдағы мемориал комплексінде «Боевое братствоның» волонтёрлар ротазы тоғынған. Олар килчеткен колонна араласчыларының автомобильлерін ипти турғызарға хабасханнар. Мемориал площадьында улуғ нимес митинг ирткен.
Чыылған чонзар алғыстас сӧстерінең Александр Векшин айланған:
- Пос тус таап, пістің акциябысха хозылған ӱчӱн прайзына улуғ алғыс! Пӱӱн уғаа кирек мероприятие иртірчебіс. Украинада ӧнетін чаа операциязында араласчатхан пістің оолларыбысха прай чон хабасчатханын кӧзітчебіс. Чир-суунда оларны прайзы сағыпчатханын паза оларға хабасчатханын чааҷылар пілзіннер. Олар хайди даа чиңіс тударына піс киртінчебіс, ізенчебіс. Анзы - ӧӧні!
Анаң микрофон Валентин Коноваловха пирілген.
- Пістің чоныбыс хаҷан даа хада-пірге тудынча, анзында пістің кӱзібіс. Россия чоны тархындағы прай сынны сыбыра арачылапча, пос чуртас ӱчӱн турысча. Піс нинҷе хати Европаны азымахчылар холынаң позытхабыс, Совет армиязы пір хати тилекейні нацизмнең арачылаан. Пілчем, кирек полза, пістің чоныбыс прайзын нацизмнең пазох арачылир, - таныхтаан Хакасия пазы.
Мыннаң пістің чааҷыларыбысха хабазар автомобильлер чӧрізі тоозылған.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы