ПАРК ЧАРИ ТӰСТІ
27.07.2022
Хабарлар
«Люстра» арт-объект азылған
Чапсых кирек. Пу кӱннерде Асхыстағы тынағ паркында ікі улуғ арт-объект азылған
Тынағ паркының тархыны 1940 чылларда пасталған. Андада комсомол ӧмезі ол орында тиректер одырт салған. 1970 чылларда паркта кимеӌек, сцена паза кӧрігӌілерге одырчыхтар турғызылған. Олох туста паркка «ВЛКСМ-ның 17-ӌі чыылии адынаң» ат пирілген.
Пазағы чылларда парк тастал парған. 2015 чылда Асхыс аймаа пазы Абрек Челтыгмашевтің пастаанаң паркты нааӌылабызарға чарадығ алылған, аалдағы чонға паза аалӌыларға тынағ орны пар ползын тіп. Парктың проектін Хакас Республиканың тиліс чӧбінде чарадыбысханнар. Че администрация пічіктерінде аалны иптирінӌе чардых чох полғаннаңар, аны орындағы чуртағӌылар кӱзінең пӱдірерге чарадығ алылған.
2015 чылдаң сығара амға теере улуғ тоғыс иділген. Мында кӧп ағас паза ыдырбан одыртылған. Амды мында сцена паза теелбек ачығы, амфитеатр осхас каркас иділген. Анда кӧрігӌілерге орнығар оңдай пар. Ідӧк ирткен чылда ол орында корабль оңдайынаң спорт ачығы турғызылған. Ол корабльның ады «Ветерок» полча. Аннаң пасха, «Холлар» арт-объект пол килген. Паза пасха даа тоғыс иділген.
Прай пу тоғыстарда Асхыс аймааның аарластығ чуртағӌылары Иван Миндибеков, Владимир Астанаев паза Сталбек Мишаков араласханнар. Ідӧк оортах турбааннар пӱдірігӌілер Алексейнең Олег Манжулалар паза даа пасхазы. Тиксі тоғысха тӧрт миллион артиинаң салковай хорадылған. Че паркта итчең тоғыс ам даа кӧп. Амды мында ікі арт-объект азыл парды - «Люстра» паза «Чыл». Олардаңар Асхыс аймаа пазы Абрек Челтыгмашев чоохтап пирген:
- Пу проект пылтыр сентябрь айда иділіп пастаан. Мында кӧп кізі тоғынған. «Алтын» холлығ устар пу ікі арт-объектті турғыс салғаннар.
«Ветерок» корабль олғаннарға турғызылған полза, амғы объекттер - прай чонға. Пӱӱн чыылысхан чонны танығлығ кирекнең алғыстапчам.
Идінӌек Иван Миндибековтың чооғынаң, паровоз парчатса, вагоннар - аның соонӌа. Асхыс аймааның паровозы Абрек Челтыгмашев полча. Ағаа кӧӧгіп, ідӧк илбек тоғыс идібізерге сағыс тӧріпче. Пу парк пала-пархаларыбысха халза, чахсы поларӌых.
Пу танығлығ киректің «пыролығ» кізізі Хакасияның Ӧӧркі Чӧп депутады Роман Челтыгмашев полча. Ол, сценаа сығып, таныхтаан, мының алнында чон парксар сыбыра чӧрӌең. Чииттер паркта кӧп тус иртірӌең. Че мының алнында парк хуруғ турған. 2002 чылда ла мында наа объекттер тӧстелген. Аннаң сығара улуғ тоғыс иділген.
Мероприятие тоозылчатханда, арт-объекттерні турғызарында араласхан кізілерге сыйыхтар читірілген.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде