ПАСХА ХАЗНАЛАРНАҢ ХАЙЫЗЫҒЛАР ТЫЫДЫЛАР
29.07.2022
Хабарлар
Валентин КОНОВАЛОВ Леонид КАЛАШНИКОВНАҢ хада хазналар хайызығларын ӱзӱрчелер
Тоғыс чорығы. Хакасия пазы Валентин Коновалов от айының 27-ӌі кӱнінде Москвада тоғынды
КАЛАШНИКОВНАҢ ТОҒАЗЫҒ
Хакасия пазы Валентин Коновалов Хазна Думазының Пос алынӌа хазналар ынархазы, Евразия пірге тудынарының киректерінӌе паза чир-суғӌыларнаң палғалыстарӌа комитет кнезі Леонид Иванович Калашниковнаң тоғасхан.
Аның искіриинең, олар республикаа теелчеткен чоннар аразындағы хайызығлар сурығларын пӧкчең оңдайларны ӱзӱргеннер. Импорт ниме-ноозын хыйа иткені паза Беларусь, Казах паза Хырғыс чирлерінең, ідӧк СНГ-ның пасха хазналарынаң хада садығ палғалыстары республиканың экономика тилізіне уғаа киректелчелер.
Комитет Таможня пірігізі паза Пірге экономика ибіркізі пастыра Пос алынӌа хазналар ынархазынӌа пірге тудынарына хабасчаң илееде тоғысты толдырча.
- Россияның, Белоруссияның, Казахстанның, Киргизияның Арменияның паза СНГ-ның пасха хазналары аразындағы хайызығлар пістің хазнаа паза регионыбысха уғаа кирек, - тіпче Валентин Коновалов.
Олар ідӧк Донбассха паза Украинаның олаңай чуртағӌыларына гуманитарнай полызығ чығӌаң чӧрімнер иртірерін ӱзӱргеннер. Хакасиядаң 71,4 тонна гуманитарнай полызығ алында ызылған. Пу чағында наа полызығ ызарға тимде полар.
Леонид Иванович, Евразия хазналарынаң хада чоннар аразындағы садығ хайызығларына тӧстеніп, республикаа хабасчаң оңдай тілирге молӌаан.
ХЫЗЫЛ КІРЕСНЕҢ ЧӦПТЕЗІГ
Хакасия правительствозы паза Хызыл Кірес чӧптезігде хол салыбыстылар. Хада-пірге тоғынғаны хазых хайраллирында паза хабазығ кирексіпчеткеннерге социальнай полызығ киреенде программалар чуртасха кирерге полызар.
Чӧптезіг хоостыра республика правительствозы паза Хызыл Кірес гуманитарнай . программаларға пірге тоғынарлар. Ӧӧнінде ол теелче сағыбаан саайлар тузына, чуртағӌыларны пастағы полызығны читірерге ӱгредеріне, кӧс килгеннерні наа орынға кӧніктіреріне паза пасха кӧстеглерге.
Пӱӱнгі кӱнде пірігіс Украинадаң кӧс килгеннернең тоғынча, олар Россиязар амыр чуртир паза тоғынар ӱчӱн килчелер.
- Россияның Хызыл Кірезі - ол чахсы киректер кибірлері паза аллығ чӱректіглер кирее. Тиксі Россиядағы Хызыл Кіреснең хада-пірге тоғынҷаң оңдайларны алғытханы республикаа тузалығ полар, - таныхтапча республика пазы.
Олох кӱн Валентин Коновалов «Комсомольская правда» радионың «Партийная среда» передачазының аалӌызы полған. Чоохтазығ кӧні эфирде ирткен. Толдыра чоохтазығны радио сайтында кӱн хабарларында таап аларға чарир. Ол ідӧк газетабыстың пазағы сығарызында сығарылар.
Ідӧк Хакасия пазының тоғызынаңар хабарларны аның телеграм-каналында хығырарға чарир:
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы