АРМИЯНЫҢ КӰЗІ - ОЛАРДА
29.07.2022
Хабарлар
Россияның Кии-десант войсколары парадта иртчелер
ВДВ кӱні. Кии-десант войсколарының кӱні алай Десантник кӱні чыл сай, чайғының халғанҷы айы пасталчатса, 2 августта, таныхталча. Анзын прайзы пілче, «кӧгілбей пӧріктіглер» ӱлӱкӱнні алғым таныхтапчалар нооза
ӰЛӰКӰННӀҢ ТАРХЫНЫ
Десантник кӱні чыл сай алыспинча, ағаа хоза, ол тынағ кӱні дее полбинча, че ол хазнаның ӱлӱкӱннері мӱчеліне киріл парған. Аннаңар пӱӱл дее «ханаттығ десант» позының ӱлӱкӱнінде алғыстастар алар.
Кии-десант войсколары тӧстелген кӱнге 1930 чылдағы 2 август саналча. Андада Воронеж город хыринда иртірілчеткен чаа ӱгредіглері тузында 12 десантник парашюттығ ТБ-3 бомбардировщиктең сегірібіскен. Андағ ӱгредіглер иртірілген соонда ла, эксперттер войсколарның андағ кӧрімін хайди даа тӧстирге кирек полчатханын піліп алғаннар.
Пір чыл пазынаң Совет Союзында пастағы кии-десант частьтары тӧстелген. Оларны Хызыл Армияа кир турғаннар. 1932 чылда десант батальоннары Чаа-кии кӱстеріне кирілгеннер. Анда олар илееде тус - 15 чыл - полғаннар. 1946 чылда десантниктерні кӧнізінең арачыланыс министрінің холына пир салғаннар. Анда даа олар, пос алынҷа войсколарға саналбин, 45 чыл сухопутнай войсколарда полғаннар.
1991 чылда ла «ханаттығ десант» пос алынҷа кӧрімніг полыбысхан. Пістің хазнада улуғ алызығлар пар сыхханда, ВДВ кӱні алғым таныхтал сыххан. Итсе, десантниктер аның алнында даа тӧстелген кӱнін таныхтаҷаңнар, че піди тың алғым нимес.
Россияда Кии-десант войсколарының кӱні официальнай оңдайнаң 2006 чылның 31 майына теере чох полған. Андада ла хазна пазының указы хоостыра ВДВ кӱніне официальнай статус пирілген.
«Ханаттығ десанттың» тархынынаңар чоохтапчатса, «дядя Васядаңар» чоохтирға кирек. Десантниктер постары ВДВ аббревиатураны «Войска дяди Васи» тіпчелер. Мында чоох парча СССР-ның Матыры Василий Маргеловтаңар, хайзы ВДВ-наң 20 чыл азыра устаан.
Василий Маргелов десантниктерні амғы кӧрімніг ит салған. Аның кӱстенізі сылтаанда десантниктер тельняшка паза кӧгілбей пӧрік кис чӧрчелер, ідӧк ол десантниктерні чааласчаң машиналарда самолёттаң парашюттығ тӱзерге ӱгрет салған.
ПАЙРАМ КИБІРЛЕРІ
Десантниктер 2 августта постарының кӧгілбей пӧріктерін, тельняшкаларын кизіп алып, парктарда арғыстарынаң тоғасчатхан кибірні прайзы даа чахсы пілче. Ағбанда олар кибірли Чиңіс паркында, чыылызып, тоғасчалар. Фонтаннарда суға сомчатханнарынаңар чоохтирға даа кирек чоғыл.
Ідӧк 2 августта десантниктер, Кии-десант войсколарының флагтарын тудып, машиналығ город-аал орамаларынңа чӧрчелер. Оларның пасха даа кибірлері кӧп. Іди ол кӱнде иң чахсы десантниктерге сыйыхтар читірчелер, оларзар алғыстас сӧстерінең арачыланыс министрі, президент тее айланчалар.
ВДВ кӱніндегі пайрамда десантниктер аймах кӧзідіглер иртірчелер, тиріглерін, техниканы кӧзідіге сығарчалар, концерттер иртірілче, хол-азахнаң тудызар мастер-класстар кӧзітчелер, параднаң чӧрчелер.
Ідӧк пу кӱнде десантниктер чуртастарын пир салған арғыстарын сағысха кирчелер, оларның мемориалларынзар хайди даа чахайахтар салчалар.
АЛЫЗЫҒЛАР ПОЛАР
Украинада иртірілчеткен ӧнетін чаа операциязы ВДВ-ға прай саринаң теелче. Хайди эксперттер санапчалар, ВДВ-ның пӱдізін, тиріглерін, чааласчаң оңдайларын, тактиказын алыстырарға килізер. Десантниктер пу операцияда пастағы кӱннердең сығара араласчалар. Че пір дее участокта парашюттығ улуғ десант тасталбаан.
Амғы наа тиріглер сых килгенде, наа тактиканаң тузаланарға кирек полар. ПВО системазы тиліпче, поснаң хада хаап чӧрең зенитнай ракета комплекстері (ПЗРК) парда, андағ пір кізі ротаны чох ит полар. Десант апарчатхан самолётты тӱзіре атыбызарға ам сидік нимес.
ВДВ Россияның Тирігліг кӱстерінің элитазы полча, че анда хайди даа амғы тусха килістіре реформа иртірерге кирек полар. Хайдағ алызығлар кирерін специалисттер пӧгерлер.
Автор :
Тимнеен Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы