Чуртағҷыларның кирексіністері ӱчӱн турызарға
04.08.2022
Хабарлар
Ағырсымнығ сурығ. Хакасия пазы хара тасты тимір чолҷа экспортха сығарар сурығҷа Москвада РЖД-ның устағ-пастаанаң тоғазар
Валентин Коновалов Москвазар тоғыс чорығынаң килер неделяда парар. Хазнаның ӧӧн городында регион пазы РЖД-ның устағ-пастаанаң тоғазарға пӧгінче, Хакасиядаң паза пасха регионнардаң хара тасты экспортха сығарарына кирілген хатығластар хоостыра. Пӧгінде ідӧк федеральнай ӱлгӱ органнары синінде тоғазығлар иртірері.
Четвергте, 4 августта командировкаа парар алнында Хакасия пазы региондағы хара тас аныпчатхан улуғ компанияларның устағҷыларынаң тоғысчы тоғазығлар иртірген – «СУЭК-Хакасия» ООО-ның ӧӧн директоры Алексей Келиннең паза «УК «Разрез Майрыхский» ООО-ның директоры Иван Морозовнаң. Олар предприятиелердегі амғы киректі, ол кирек хайди тилирінҷе ухаанҷыластарны паза сығызар хорғыстарны ӱзӱрібіскеннер.
– Хазнаның килкім отрасльы чабылар хорғыста. Iзенчем, федеральнай правительство синінде хара тас аныпчатхан регионнар чуртағҷыларының кирексіністерін арачылаҷаң чарадығлар алылар, отрасль толдыразынаң тоғынар паза кізілер тоғыс орыннарын чідір салбас ӱчӱн. Хакасия правительствозы позы саринаң прай кӱзін салча, киректі пістің республикаа туза ағыларына айландырып алар ӱчӱн, – алынҷа таныхтаан ол тоғазығлар тузында Валентин Коновалов.
20 июльда республика пазы Хакасияның хара тас аныпчатхан предприятиелерінің устағҷыларынаң хада улуғ чыылығ иртірген. Ол чыылығда хара тас аныпчатханнарның чӧптері пасха пастағларнаң хада пічік оңдайынаң тимнелген. Валентин Коновалов хол салғанынаң ол пічік Россия президенті Владимир Путиннің, Россия правительствозының кнезі Михаил Мишустиннің, хазна пазының Сибирьдегі полпреді Анатолий Серышевтің паза Россияның энергетика министрі Николай Шульгиновтың адына ызылған.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы