пала хайди даа ӱгренер
Кӱн сурии. Наа ӱгредiг чылы чағдап килир. Хакасияның ӧӧн городы чуртағҷыларының хайзы-пiрсi, тiзең, пастағы классха парар палаларын хайдағ школаа чӧргiзердеңер сурығны ам даа читiре пӧккелек
Пастағы классха олғаннарны хайди алчатханынаңар паза iҷе-пабалар хайдағ сидiксiнiстерге урунчатханнаңар чоохтапча Ағбан городтың ӱгредiг устанызының пастых орынҷызы Галина Озерова:
– 2020 чылда Россияның ӱгредiг министерствозы пасталығ, тиксi паза ортымах ӱгредiг программаларынҷа ӱгредiге алар оңдайлардаңар чарадығ алыбысхан. Ағбандағы олғаннар пастағы классха олох федеральнай законға тӧстенiп алылчалар. Iҷе-пабалар палаларына школа таллапчатхан чӧрiмнiң пастағы чардығы 1 апрельдең 30 июньға теере ирткен, iкiнҷiзi, 6 июльдаң пасталып, 5 сентябрьда тоозылар.
Часхының iкiнҷi айынаң сығара чайғының пастағы айы тоозылғанҷа прописка хоостыра чуртапчатхан чирде орныхчатхан школаларзар палаларын алып алардаңар iҷе-пабаларның сурыныс пiчiктерi алылча. Паза федеральнай закон хоостыра хада тӧреен харындас-пиҷелерi ӱгренчеткен школаларзар туңмалары хайди даа парчалар. Оларның iҷе-пабаларына сурыныс пiчiктерiн iдӧк 1 апрельдең 30 июньға теере пир саларға кирек. Пасха даа федеральнай законнарда таныхтал парған палалар пуох туста кирек школаларзар алылчалар. Кӧзiдiмге, чааҷы паза полиция службазындағы iҷе-пабаларның палалары.
Ағбанда пу чӧрiмнiң пастағы чардығының салтарын кӧрзе, пiссер прай 2470 олғанның iҷе-пабазының сурыныс пiчии кiрген.
Амды чӧрiмнiң iкiнҷi чардығы парча – пастағы классха пос орыннығ школаларзар палалар алылча. Прописка санға алылбинча!
Пӱӱнгi кӱнде iдӧк Ағбандағы пис школазар национальнай класстарға оолах-хызыҷахтар алылчалар. Ол 3№, 20№, 22№, 24№, 31№ школалар. Аннаңар палаларын хакас тiлiне ӱгредерге сағынчатхан iҷе-пабалар маңзыразыннар.
Ноға iҷе-пабалар хынған школаларзар палаларын албин салчалар? Пастағы чардыхта айланған iҷе-пабаның паза паланың прописказы килiстiре полбаза паза кирек пiчiктер читiре чыылбаан полза!
Школаның устағ-пастаа пасха сылтағ тапхан полза, ол iҷе-пабалар Ағбанның ӱгредiг устанызынзар айланзыннар. Олған хайди даа ӱгренерге кирек нооза. Пiстiң специалисттер школаларда пос орыннар таап пирерге полыс пирерлер.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |