НААҶЫЛАС ТОҒЫСТАРЫ – нацпроекттер полызиинаң
Имнег кирее. Хакасияның хазых хайраллаҷаң министрі Пии аймаанда имнег учреждениелерін нааҷылирынҷа апарылчатхан тоғысты паалаан
Республиканың хазых хайраллаҷаң министрі Олег Ананьевский Пии аймааның ӧӧн имнег туразында, Кирбі паза Новотроицкай ааллардағы амбулаторияларда пол килген.
Пиидегі имнег туразы амғы тустағы оборудованиенең тиріндірілче. Пылтыр андар амғы УЗИ-аппарат алылған. Пӱӱл эндоскопия системазын садызып алғаннар. Ол оборудованиеде чарытчаң прибор, инсуффлятор, эндоскоптарның дезинфекциязына кӧрілген паза пасха даа аппараттар. Наа оборудованиенің тиксі паазы – 11,6 млн салковай.
Коронавирус пандемиязының иң не хазыр тузында, 2020 чылда, «Хазых хайраллиры» нацпроектче олған пӧлии паза поликлиника тыхтал парған. Тыхтағ тоғыстарына 6,5 млн салковай хорадылған.
Ирткен чылда «Хазых хайраллирының тилізі» программа хоостыра анда тиксі тыхтағ тоғыстары хирургия пӧлиинде (6 млн салковайға) паза кeнӧрткі стационарда (5 млн салковайға) иділгеннер.
Табат аалда модульлығ имнег амбулаториязы пӱдіріл парған. Ол киректелчеткен прай оборудованиенең тиріндірілген. Наа амбулаторияа хорадылған ахча сині – 12,7 млн салковай.
2021 чылда декабрьда республиканың хазых хайраллаҷаң министерствозынаң аймахтағы ӧӧн имнег туразына кӧс чӧрҷең фельдшер-акушер пункты (ФАП) пирілген. Пу кӱнге теере ФАП тоғыс чорығына 146 хати сыххан, 1167 чуртағҷының хазии сыныхталған. Чыл планында 2000 кізі хазиин сыныхтиры кӧрілген.
«Демография» нацпроектче Пии аалда участковай имҷі-терапевтке квартира алылған, чурт паазы 1,6 млн салковайға тиңнелген. Пӱӱл августта ідӧк чурт участковай имҷі-педиатрға алылар.
Ам аймахтағы Салғын паза Хойбал аалларда фельдшер пункттарының, Солбы аалда ФАП-тың пӱдірии апарылча. Олар прайзы амғы модульлығ туралар чіли турғызылчалар. Оларның тиксі паазы – 20,7 млн салковай.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |