ПОС ТАЛЛААН ОРЫНҒА ХАЙЫҒ ДАА СИБЕР!
05.08.2022
Хабарлар
Сыйыхтас. Хакасия пазы Валентин Коновалов город-аалларның иптеҷең орыннарын таллирынҷа онлайн ӱн пирерін иртірерге полысханнарны алғыстады
Хакасияда «Городтағы осхас истіг оңдайлар тӧстирі» хазна программазы алтынҷы чылы тоғынча. Пастағы чылларда муниципалитеттер ибіркізін чахсыландырҷаң орыннарны постары таллап турған полза, соонаң хазна синінде андағ орыннарны чонға таллир оңдай пирілген. Іди табығлар тузында программада араласчатхан город-ааллар чуртағҷылары ідӧк «Городтағы осхас истіг оңдайлар тӧстирі» хазна программазынҷа постың муниципальнай пӱдізіндегі орыннарға ӱн пир турғаннар, анаң ол чӧрім «Хазна полызығлары» портал пастыра онлайн иртіріл сыххан. Че чонны пу киректе аралазарға тартып алар ӱчӱн муниципальнай пӱдіcтерге нинҷе кӱс киректелче? Ол санда пос кӧңнінең полызыға килчеткеннер парох. Орғах айының 3-ҷі кӱнінде Хакасия правительствозының чыылығлар залында онлайн ӱн пирісті иртірерінде ӧткін араласхан муниципалитеттернің тоғынҷылары паза полысчылар чыылысхан. Валентин Коновалов оларны позының паза республика правительствозының алғыстастарынаң таныхтаан.
– «Чурт паза город ибіркізі» нацпроекттің «Городтағы осхас истіг оңдайлар» хазна программазы город-аалларны иптирге чахсы оңдай пирче. Алты чыл аразына піс илееде орынны иптеп алғабыс. Ағаа хоза, амды чуртағҷыларның андағ орыннарны таллаҷаң оңдай пар. Че онлайн ӱн пиріс парынаңар чуртағҷыларға искірерге паза оларны араластырарға кирек. Пӱӱл онлайн ӱн пиріcте 40 муң чуртағҷы араласхан. Хакасияа ол хомай нимес салтар. Пу санға чидер ӱчӱн улуғ тоғыс апарылған. Пӱӱн піc иң кӱстенҷіктерні таныхтирбыс паза сірерні алғыстапчабыс, – теен Хакасия пазы Валентин Коновалов.
Чоохтирға кирек, муниципальнай пӱдістер аразында Ағбан город иң чахсы тоғыныбысхан. Тиксі 29513 ӱн пу городта ла чыыл парған. Че ол, республиканың ӧӧн паза иң улуғ городы полчатханнаңар, пасхазына чахсы кӧзідім полча. Республика пазы килчеткен чылда пу тоғыста ідӧк Харатаснаң Саяногорск ӧткін аралазарларына ізенче. Чахсы тоғыныбысханнар санында ідӧк Таштып аймаа. Ол ӱр ниместең «Городтағы осхас истіг оңдайлар» хазна программазына хозылған.
Хакасия пазының алғыстазын алғаннарның пірсі – Ольга Глущакова. Ӧткін ипчі пос кӧңнінең полызығ киреенде пастағызын на араласхан. Ағбандағы Хызыл Ағбан чуртаҷаң районның старостазы полып, ол городтың халых чуртазында ідӧк тее ӧткін араласча. Че пу чӧрім аның кӧңнін уламох кӧдірген. Таныстар саны, тізең, пілдірте хозыл парған. Онлайн ӱн пиріске город чуртағҷыларын тартар ӱчӱн, ол тоғысчы ӧмелернең тоғасхан, предприятиелерҷе, садығ тураларынҷа чӧрген. Пу чӧрім соонаң Ольга «Симфония в джинсах» концертте полысчы полған.
– Пазағы чылда мин ідӧк онлайн ӱн пирісті иртірерге полызарбын, – тіпче Ольга Глущакова. – Уғаа чахсы оңдай – чахсыландырҷаң орыннарны посха таллиры. Хызыл Ағбанда пу программаҷа тӧрт орын иптел парған. 2023 чылға піс 23№ школа хыринда улуғ спорт ачығын пӱдірерге сағынчабыс. Школаның андағ орын чоғыл, аннаңар ол ағаа даа, орындағы чуртағҷыларға даа тузалығ полар.
Пу чӧрімнің ӧткін араласчыларын ідӧк Хакасияның пӱдіріг паза ЖКХ министрі Валерий Келин, Таштып аймаа пазының социальнай тоғысча орынҷызының тоғызын толдырчатхан Елена Цыганкова, республиканың пос кӧңнінең полысчаң ресурс кінінің устағҷызы Никита Мальчиков чоох тутханнар.
Араласчыларның кӧрізінең, онлайн ӱн пиргені пу программаҷа иптелчеткен орыннарға чуртағҷыларның хайиин алыстырча. Ӱн пирген соонаң олар сибер хай сыхчалар, тоғысты мааннап пастапчалар. Килчеткен чылға республика онлайн ӱн пирісте Хакасия чуртағҷыларының 10 % араластырарға пӧгін турғысча. Тимнегліг тоғыс, тізең, амох пасталыбысхан.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы