«ИЗЕННЕР» – ЧОН КӰЗIНЕҢ ПӰТКЕН АЧЫХ
05.08.2022
Хабарлар
Наа тынанҷаң орын. Таштып аал пазында «Изеннер» ачых азылған. Аны орындағы аал чӧбi пылтыр пӱдiріп пастаан
Аал пазындағы чирнi иптеҷең проекттi Таштыптағы 1 № школаның ӱгретчiзi Игорь Кайлачаков ӱгренҷiлерiнең хада тимнеен. Андар пос сағыстарын Таштып аал чӧбi пазы Рустам Салимов паза Таштып аймаандағы улуғлар чӧбiнiң кнезi Вера Сазанакова киргеннер.
«Изеннер» ачых ӧӧнiнде аалҷыларға кӧрiл парған. Мындағы баннерлерде республиканың, Таштып аймааның, Таштып аалның гербтерiнең, Хакасия гимнiнең, хакас мӱчелiнең танызып аларға чарир. Ачыхта хакас ибiҷек турча. Часхыда сууҷах кизiре iкi тахтаҷах пӱдiр салтырлар. Сарчын турғызар орынны хам кӧзiт пирген. Аны азынада турғыс салғаннар, хамнар, чоннаң хада ол сарчынны ибiрiп, от инезiн азырааннар.
Ачых хакас оңдайынаң идiл парған тiп полбассың. Ибiре ӱрілген ағас сиден уғаа сiлiг кӧрiнче. Аалҷылар килкiм абаа хайығ айландырғаннар. Абоғырчатхан ачын аңның скульптуразы сын абаа тӧӧй, хакас кип-азахтығ хыс, аны амыратчатхан чiли, чапсыра тур салтыр. Пу скульптура 340 муң салковайға тур парған, ағаа ахчаны Хакасияның Ӧӧркi Чӧбiнiң экономика политиказынҷа, промышленностьча, пӱдiрiгҷе паза транспортча комитедiнiң кнезi Василий Шулбаев тапхан. «Изеннер» ачых азылчатханда, ол чоох тутханох: «2023 чылда Таштып аал 255 чазын таныхтир. Сағынчам, прай чахығлар толдырылар, аал уламох сiлiг полар. Таштып аал административнай кiн не полбасха кирек, iдӧк ол аймахтың ӱгредiг, культура кiнi поларға кирек».
Рустам Салимовтың сӧстерінең, площадканың пӱдiриине прай 500 муң салковай хорадыл парған. Ноға андағ кӧмес? Таныхтирға кирек, «Изеннер» чон кӱзiнең пӱткен. Аалдағы ӧмелер, халых пірігістері, организация-предприятиелер, идiнҷектер пӱдiрiг материалларынаң, транспортнаң хабас пиргеннер. Кем-де, пос тузын хорадып, ниме-де иткен, кем-де ахчанаң полысхан. Амды, Таштыпсар аалҷылар, туғаннар килзе, оларны сах андох «Изеннер» ачыхсар апарып, наа тынанҷаң орыннаң махтаныбызарға чарир.
Пiр ле читпес сизiнiстiг полған. Хай пiрее баннерлерде, хайда хакас тiлiнең пазылған, шрифт саба айлан партыр, сӧстернiң кӧбiзi пiлдiстiг нимес. «Ол баннерлернi пу чағында алыстырарға килiзер», – теен Вера Сазанакова.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы