ХАЗНА ФЛАГЫ КӰНІНЕ ЧАРЫДЫЛЧА
Флешмоб. Республиканың чир-суғ ӱгренҷең музейі хыринда Россияның Хазна флагы кӱніне чарыдылған флешмоб ирткен. Анда Хакасия пазы Валентин Коновалов араласхан
Ағбандағы флешмобта республиканың Халыхтар палатазының паза халых пірігістерінің кізілері араласханнар. Ол санда «Чиңіс волонтёрлары», «Имҷі волонтёрлар», «Боевое братство» араласчылары, Юнармиядағы чииттер паза спортсменнер.
Таныхтирға кирек, пу флешмоб тиксі Россияда иртче. Аны хоостыра Россия Федерациязының прай субъекттерінзер хазна флагының чаламалары ызылған, полған на регион ол исте чонны піріктірчеткен сӧстер паза хыйғылар пас салар ӱчӱн.
Пістің регионға флагтың хызыл ӧңніг чаламазы киліc партыр, ӧнетін алай чох, кем пілер аны. Чаламада пастағызын республика пазы Валентин Коновалов пазып хол салған, анаң флешмобтың пасха араласчылары постың хыйғыларын пасханнар.
Прайзы пазып хол салыбысхан соонаң флешмоб араласчылары чаламаны чаза тартыбысханнар. Анда аймахпасха патриотизм сӧстері пазылых полған, ол санда: «Россия ӱчӱн, амыр чуртас ӱчӱн», «Піс хадабыс», «Пос кізілерін тастабинчабыс», «Чир ӱстӱндегі амыр чуртас ӱчӱн».
Орғах айының 22-ҷі кӱнінде, хазна ӱлӱкӱнінде, Москвада Чиңіс паркында волонтёрлар хазнаның прай регионнарынаң, ідӧк Донецк паза Луганск Чон Республикаларынаң, Запорожьедең паза Херсон облазынаң, ағылған чардыхтардаң пӱтчеткен Россия флагын чазыбызарлар.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |