Пайрам. Хакасия пазы Солнечнайны паза Ағбан пилтірін Аал кӱнінең алғыстаан

Ирткен субботада Хакасия пазы Валентин Коновалов Ағбан пилтірі аймаандағы Солнечнай аалның паза Ағбан пилтірі посёлоктың тӧреен кӱніне чарыдылған пайрамнығ мероприятиелерде араласхан.

Солнечнайда аалның устағ­пастаа пайрамнығ кӱнде «Аал арғыстарын чыыпча» мероприятие иртірген. Регион устағҷызы аалның ярмарказында пол килген, анда орындағы чуртағҷыларнаң чоох алызып алған паза оларны ӱлӱкӱннең алғыстаан.

– Сірерні прай чӱреемнең Аал кӱнінең алғыстапчам! Солнечнай, республиканың иң чахсы социальнай проектке мариинда аралазып, тӧреміл гранттарға турысча, регионның ааллар тилізінҷе программаларында ӧткін араласча. Прай ол ниме аалны чахсыландырарға полысча, хайди ол алысчатханын піс прайзы кӧрчебіс. Инфраструктура, ӱгредіг тиліпче, оборудование алылча, тыхтағ тоғыстары толдырылча, – теен Валентин Коновалов. – Аарлығ арғыстар! Сірернің полғаныңарға ла пос аалын тилідеріне хозым итчеткен ӱчӱн алғызым читірчем. Пик хазых, часка паза сӧбіреде чахсы чуртас алғапчам! Ӱлӱкӱннең!

Ағбан пилтірі 1909 чылда улус чіли тӧстелген. 1932 чылда ол ағас комбинады тӧстелген сылтаанда посёлок пол парған. Хакасия пазы ағбан пилтіріндегілерні посёлоктың тӧреен кӱнінең алғыстаан паза аның Хакасияның паза тиксі хазна тархынынаң палғалыс парған пай тархынын таныхтаан.

– Чӱс чыл артиинаң тархын тузына Ағбан пилтірінде кӧп ниме алыс парған. Пір ле ниме алыспинча – кізілернің постың кічіг чир-сууна сибер хайии. Мында наа туралар пӱдірілче, орамалар иптелче, наа тынағ орыннары тӧстелче. Посёлок тилирге кирек, аның тиліҷең кӱзі, пай кибірлері пар сылтаанда ол мыннаң мындархы тиліске пик тӧстег, – алғыстаан регион устағҷызы. – Аарлығ ағбан пилтіріндегілер! Алғыстапчам сірерні Посёлок кӱнінең! Тӧреен Ағбан пилтірі чиріне сын полчатханыңар паза ағаа хынчатханыңар ӱчӱн улуғ алғыс! Сірернің прай ниме чахсы ползын!

Хакасия правительствозы тоғызының ӧӧн кӧстеглерінің пірсі – кізінің чахсы чуртазы, пістің регион чуртағҷыларының тоғынар кӱзін тилідері. Аннаңар ӱлгӱ прай кӱзін салча, республиканың аалларында паза посёлоктарында кізілерге чуртас чылдаң чылға истіг полып одырар, олар сағынған сағыстарын постың кічіг чир-суунда, Хакасияда, чуртасха кирер ӱчӱн. Валентин Коновалов позының алғыстас сӧстерінде ол кӧcтеге алынҷа хайығ салған.