НАЦИЯЛАР АРАЗЫНДА ЫНАҒЛАС ПОЛЗЫН
Гранттар марии. Ӱр ниместе Хакасияның национальнай паза территориальнай политика министерствозында гранттар марииның чиңicчілеріне ахчалығ сертификаттар читіргеннер
Пу чыылығны апарған Хакасияның национальнай паза территориальнай политика министрі Михаил Побызаков. Ол республикадағы хазнани нимес паза коммерческай нимес организацияларға ӧнетін социальнай программаларны пӱӱл чуртасха кирер гранттар марииның чиңiсчілерін алғыстаан.
Министрнің чооғынаң, мындағ гранттар марығлары республикада чыл сай иртірілчелер. Полған на сай ағаа пирілчеткен ахча сині пасха-пасха полча. Пӱӱл гранттарға 1 миллион салковай позыдылған. Аннаңар он чиңicчее 100-ер муң салковай киліс парған. Килер чылда гранттар мариина 3 миллион салковай сурирлар.
Пӱӱл гранттар мариинда Хакасияның 16 коммерческай нимес организациязы араласхан. Оларның проекттерінде кӧріл парған пӧгіннер – ӧӧнінде республикада аймах нациялар аразында ынағлас полары паза экстремизмге чол пирбеске.
Анаң чиңicчілер постарының социальнай проекттерінеңер хысхаҷахти чоохтап пиргеннер. Iди республикадағы «Самур» чииттернің халых организациязы Хакасиядағы полған на аалда хайдағ нация кізілері чуртапчатханынаңар, оларның кибірлерінеңер, кип-азаанаңар, кӧг тиріглерінеңер чоохтап турар, iдӧк аалдағы туризмнең айғазар.
Абаза городтағы «Славяночка» автономнай коммерческай нимес организация орыс чонның пурунғы кибірлерінеңер, кип-азаанаңар, ас-тамаанаңар чииттерге, олғаннарға, iдӧк туристтерге чоохтир паза кӧзідер.
Ағбандағы «Подорожник» кӧс чӧрҷең кӧклӧ театры ідӧк республикадағы аймах чоннарның кибiрлерін ойыннар пастыра кӧзідер. Пастағызын пeeл 1 сентябрьда «Орлёнок» олған паркында турғызарлар.
Iдӧк Ағбанда «Цветик-Семицветик» хазнани нимес олған сады пар полтыр. Андар 11 аймах нация палалары чӧрчеттiр, француз таа пар. Ідӧк анда олғаннарға ойын пастыра аймах чоннарның культуразын кӧзiдерлер.
Чиит оол Акай Албычаковтаңар пістің газетада хабар сыххан полған. Ол хакас тілі шрифтін компьютер клавиатуразына кир салған. Аны хоостыра интернетте хакас тілінең чоохтазып аларға паза, тіл пілбинчетсе, ӱгреніп аларға чарир. Михаил Побызаковтың чооғынаң, пу проект хакас тілін тилідеріне уғаа кирек.
Аалдағы чонға полызар «Пай Чир» халых организациязының устағҷызы Раиса Абдина чииттерні хакас ас-тамаан тимнирге ӱгредер проект тимнеп салған. Пістің чонның чіҷең нимелерінің хай піреезі чіт тее парир. Оларны айландырарға кирек. Кӧзідімге алза, хой идінең хайдағ чиис пызырарға, аалҷыларға пызығ итті хайди столға саларға паза даа пасхазын. Аны видео пастыра кӧзідерлер паза открыткалар тимнирлер. Анда хайдағ ас-тамах кирек паза нинҷе калорий полчатханын пас саларлар. Пу проект iдӧк уғаа кирек. Аймах чирлердең килген аалҷылар хакас ас-тамаан тимнепчеткен кафе алай ресторан таппинчалар.
Халғанҷызында министр Михаил Побызаков грант чиңicчілерін марығларда аннаң андар аралас турарға хығырған.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |