ПӦКЧЕҢ ОҢДАЙЛАР ТАБАРҒА МОЛҶААН
Тоғыс чорығы. Пу наада Хакасия пазы Валентин Коновалов Алтай аймаандағы Кӧк хайа аалзар чӧрген. Анда Успас от мемориал комплексінде, Кӧк хайадағы культура туразында пол килген
Пастап Хакасия пазы Валентин Коновалов Успас от мемориал комплексiнде полып, анда чахайахтар салып, Илбек Ада чаа араласчыларын хумартхылаан. 2020 чылда аал чуртағҷылары ол комплекстi иптирдеңер пастағнаң сыхханнар. Кӧк хайаның аал чӧбі, «Иң тузалығ социальнай проекттер» марығда аралазып, ікінҷi орынға турызып, сыйыхха 350 муң салковай алған. Ол ахчаа аймах паза аал чӧбі бюджеттерінің паза спонсорлар полызиинаң Успас от комплексі нааҷылалған паза иптелген. Амды мемориал комплексінде Илбек Ада чаа араласчыларына, тыл iстенҷiлеріне паза политика саринаң хыйыхтатханнарға хумартхы тастар турғызыл парған.
Хакаcия пазы Валентин Коновалов iдӧк Кӧк хайадағы культура туразының ойнаҷаң залында пол килген. Анда 2021 чылда «Культура» национальнай проектче тыхтағ тоғыстары толдырылғаннар. Залда наа кӧзенектер турғызылған, чылығ пирҷең система алыстырылған, потолок, стенелер сырлалған паза наа линолеум тӧзелген. Душ кабинкалары паза тасхын чӧрҷең орыннар нааҷылалғаннар.
Хакасия правительствозы муниципальнай пӱдістерге аймах оңдайларнаң хабасча. Ол санда Алтай аймаандағы Кӧк хайа аал чӧбіне. Халғанҷы ӱс чыл аразына республика правительствозының хабазиинаң Кӧк хайа аалда олған сады пӱдіріл парған, суғ ағысчаң система нааҷылалған, Культура туразында тыхтағ тоғыстары пасталған паза мемориал комплексі иптел парған. Аалдағы чолларны иптиріне 55 миллион азыра салковай позыдылған. Кӧк хайа аал Ағбан городтың чылығ пирчеткен системазына киріл парған. Андағ оңдайнаң чуртағҷыларның тураларынзар чылығ пирчеткені чахсылан парған паза котельнайлардаң киизер тасталчатхан оолығ ниме-ноо сині хызырыл парған.
Кӧк хайадағы культура туразының актовай залында ӧткiн чуртағҷылар чыылысханнар. Олар Хакасия пазы Валентин Коноваловнаң тоғазарға паза сағыссыратчатхан сурығларын пирерге килгеннер.
Валентин Олегович пастағызын 2019 чылда алыл парған ӧӧн стратегиялардаңар искірген. Хысхаҷахти хайдағ тоғыстар апарылчатханын чарытхан. Iдӧк чуртағҷыларға «Хакасия наши дни» фильм кӧзіділген. Анаң аал чуртағҷылары республика пазына сурығлар пиргеннер. Чонны сағыссыратчатхан сурығлар аймах темаа чарыдылғаннар. Олар хазых хайраллирынаңар, ӱгредігдеңер, кӧп чон чӧрчеткен транспорттаңар, сӧп-саптаңар паза чон чӧрчеткен орыннарны иптирінеңер чоох апарғаннар.
Кӧк хайа аал чуртағҷыларының кӧбізін орындағы, имнег учреждениезінде имҷілер чидіспинчеткені сағыссыратча. Пӱӱнгі кӱнде Кӧк хайа аалдағы школада паза олған садында медсестралар чоғыл. Аннаңар ӱгредіг учреждениелерінің устағҷыларына кӱннiң сай олғаннарны школазар паза олған садынзар чочынып ала аларға килісче. Кӧзідімге, олған садында кічіг палалар, оларны имҷі чох аларға чарадылбинча. Iдӧк Кӧк хайадағы амбулаторияда имҷілер паза ортын имнег тоғынҷылары чидіспинче.
Читі чыл мының алнында аалда музыка школазы кӧй парған. Амға теере олғаннар аалдағы ортымах школада ӱгренгеннер, че пӱӱл пастағы классха парчатхан олғаннар саны хозыл парғаннаңар, школада iкi сменалығ ӱгредіг поларынаңар чоох парча. Андада музыка школазының ӱгренҷiлеріне ӱгренер оңдай чох пол парар.
Iдӧк тоғазығда Хакасияның хазых хайраллаҷаң министрі Олег Ананьевский, Алтай аймааның пазы Татьяна Раменская, Кӧк хайа аал чӧбiнiң пазы Светлана Маркова, Хубачардағы ӧӧн имнег туразының ӧӧн имҷізінiң тоғызын толдырчатхан Ольга Черненко араласханнар. Таныхтирға кирек, Кӧк хайа аал чуртағҷылары илееде ағырсымнығ сурығ тимнеп салғаннар. Аннаңар тоғазығ тузында даа чуртағҷылар аразында талазығлар полыбысчаң. Полғаны ла позының сағыс-кӧрізін хай пірее сидікciністi хайди пӧгердеңер искірчеткен.
Тоғазығның салтарларынҷа Хакасия пазы Валентин Коновалов профильліг министерстволарға, муниципальнай пӱдістiң устағ-пастаанаң хада-пірге тоғынып, чуртағҷылар айланған сурығлар хоостыра пӧкчең оңдайлар табарға чахығ пирген.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |