ПӰӰНГІ КӰННІҢ СИДIКСIНIСТЕРIНЕҢЕР ЧООХТАЗЫҒ
Тоғыс чорығы. Хакасия пазы Валентин Коновалов Пии аймаандағы Табат аалда пол килген
КРЕСЕН-ФЕРМЕР ХОНИИНДА
Республика пазы Валентин Коновалов Хакасия аалларынҷа тоғыс чорығынаң чӧрерін узаратча. 29 августта ол Пии аймаанзар чӧр килген. Хакасия пазынаң хада пу чорыхта республиканың аал хонии паза ас-тамах министрінің пастағы орынҷызы Александр Башков араласхан.
Валентин Коновалов пастап Табат аал хыринда орныхчатхан кресен-фермер хониинда пол килген. КФХ устағҷызы Дмитрий Протасов республика пазын аал хонии предприятиезінең таныстырған. Кресен-фермер хонии тоңастығлар, ідӧк гречиха ӧскірерінең айғасча. Ӧскірген тамах-суланы ӧӧнінде чуртағҷыларға паза фермерлерге мал азиин чіли сатчаттырлар.
– Пістің тамахты ӧӧнінде Асхыс паза Пии аймаандағылар алчалар, – чоохтаан Дмитрий Протасов. – Фермерлер паза олаңай чуртағҷылар даа.
Фермер Хакасия пазына наа пӱдірілген складын кӧзіт пирген. Тамах хайраллаҷаң складтың улии 1 муң квадрат метр. Наа складты КФХ прай позы ахчазына пӱдіртір. Че ол ахча тикке парбас, чыып алған урожай анда чахсы хайраллалар нооза.
Кресен-фермер хонииның аал хонии техниказы илееде: аймах-пасха кӧп комбайн паза трактор турған. Тоғазығда араласхан фермернің пабазы Александр Протасов (1990 чылларда пу КФХ-ны ол тӧстептір, амды тоғызын оолғы узаратча) техниканы аларында республиканың аал хонии паза ас-тамах министерствозы хабасчатханы ӱчӱн алғызын читірген. Че олох туста аның сурыныс пар полған.
– КФХ-ларға хабазығ ахчазы техника алылған соонаң на айландырылча, компенсация оңдайынаң, – чарытхан ол. – Килкім аал хонии предприятиелеріне ол ахча азынада пирілче, чарир ба піcке ідӧк ит саларға?
Аның чооғынаң, пірееде техниканы чапчаң аларға киректелче, анҷа килкім ахчаны, тізең, табырах таап аларға сидік. Аннаңар ахча азынада пиріл турғаны фермерлерге уғаа чахсы хабазығ поларҷых тіп таныхтаан ол.
Валентин Коновалов улуғ частығ кізінің сағыс-кӧрізінең чарасхан, Хакасияның аал хонии министерствозына андағ оңдайға кірерге чарир алай чарабазын кӧрібізерге чахығ пирген.
Республиканың аал хонии паза ас-тамах министрінің пастағы орынҷызы Александр Башков Протасовтарның кресен-фермер хониин махтаан. Ирткен чылда КФХ тоңастығларны 1,5 муң тоннаҷа чыып алтыр.
ЧУРТАҒҶЫЛАРНАҢ ТОҒАЗЫҒ
Фермернең тоғазып алған соонаң Валентин Коновалов Табат аалзар чол тутхан. Аалның Культура туразында республика устағҷызын чуртағҷылар сағааннар. Тоғазығда ідӧк Пии аймааның пазы Иннокентий Стряпков паза Табат аал чӧбінің пазы Владимир Третьяков араласханнар.
Тоғазығ кибірли «Хакасия наши дни» фильм кӧзідиинең пасталған. Аның соонаң Хакасия пазы республика правительствозының тоғызындағы ӧӧн кӧстеглердеңер, пу тус аразына хайдағ салтарларға читкенінеңер хысхаҷахти чоохтап пирген. Табатта, тізең, халғанҷы чыллар аразына ідӧк ас нимес тоғыс иділтір: тасхархы чарытхы нааҷылалған, суғ пирҷең сетьтерде тиксі тыхтағ тоғыстары толдырылған, олған сады пӱдірілген, Табат аал чӧбінзер кірчеткен Будёновка аалда Культура туразы пӱдірілген.
– Амды азых паза сын оңдайнаң чоохтазып алалар, – чоохтанып, Хакасия пазы сурығлар пирер чардыхты асхан. – Кемнің хайдағ чӧптер, сурығлар алай сидіксініcтер пар?
Чуртағҷыларның сурығлары ас нимес полған. Кӧзідімге, специалисттерге чурт пӱдірердеңер сурығнаң Табаттағы школаның пасталығ класстар ӱгретчізі Людмила Пидюрова айланған. –
Пістің ӱгретчілер чидіспинче, пӱӱнгі кӱнде орыс тілі паза математика ӱгретчізі чоғыл, – таныхтаан ол. – Мин мында алтынҷы чылы тоғын парирбын, чуртты арендаа суурарға килісче. Ӱгретчілерге пу саринаң хайдағ-да хабазығ полар ба?
Валентин Коновалов республика амғы туста имҷілерге чурт пиріп пастабысханын таныхтаан. Ол пӧгінге республика бюджедінең 100 миллион салковай позыдылған.
– Пазағы чылдаң ол программаны алғыдыбызарға сағыс пар, – таныхтаан Хакасия пазы. – Ол санда ӱгретчілерні андар кирерге. Че прай ниме бюджетнең палғалыстығ.
Чарыда чоохтаза, ахча полза, ол ниме иділер. Чох полза, сағирға килізер.
Пенсионер Галина Кожухованы автобустар чӧрізі сағыссыратхан.
– Пістің мында иртен Нонып – Ағбан автобус ла иртче, – искірген улуғ частығ ипчі. – Че ол полған на сай тығырама полча, аннаңар водитель, холларын чайа тудып, пістің аалдағыларны албин парыбысча.
Пенсионер кізі аның сылтаанда чуртағҷылар Пиизер алай Ағбанзар пар полбин халчалар тіп хомзынған. Хакасия пазы Валентин Коновалов пу сурығҷа хабас пирерге молҷаан. Итсе, ол сурығ аймахтың устағ-пастааның полномочиелері полчаттыр. Валентин Коновалов республиканың транспорт паза чол хонии министерствозына Пии аймааның устағ-пастаанаң хада тоғыныбызарға паза ол сурығның узы-пазына сығарға чахығ пирібізербiн тіп искірген.
Чуртағҷылар пасха даа сурығларнаң паза сурыныстарнаң айланғаннар. Олар прайзы хайыға алылғаннар, республика устағҷызы оларны пӧкчең оңдайларҷа тоғыс апарылар тіп ізендірген.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |