Улуғ Сии аалның поғдархазы
28.09.2022
Статья
15 частығ Давид, республика синiндегi чайғыдағы ГТО фестивальында араласханда, 2-ҷi орын алып алтыр. Пылтыр, тiзең, пастағы орын утып алғанда, iдӧк «Артексер» путевканаң сыйлаттырған. 2019 чылда республика синiндегi ГТО фестивальында араласханох. Хайди кӧрчебiс, оолах спортнаң тӧремiл айғасчаттыр. Давид хайди андағ салтарға чидiп алғаннаңар ӱлесче:
– Сигiс частығдаң сығара мин кӱреске чӧр сыххам. Пастағы тренерiм Леонид Петрович Бутанаев полған, анаң секцияны Игорь Олегович Федянин апар сыххан. Хаҷан-да iҷем Тарина паза аның пиҷезi, ағам кӱреснең айғасханнар. Аннаңар мин дее спортха тартыл сыххам, неке. ГТО-ға тимненерiне улуғ хабазығ iҷе-пабам пирчелер, марығлар алнында стадион киректелче, олар минi неделяда нинҷе-де хати Таштыпсар ал чӧрчелер, iдӧк Асхыссар алай Абазазар чӱс чӧрерге ал чӧрчелер. Таштыпта бассейн чоғыл.
Давидтiң ӱгретчiзi Игорь Федянин чоохтап пирген:
– Бассейн сынап таа пiстең ырах орныхча, тренировкаларға тың на чӧр полбассың. Пӱӱл чайғызын Давид пастағы даа орын алып аларҷых, че чӱзерiнде баллар чiдiрiбiскен. Паза кӱресте ол позын хомай нимес кӧзiтче, марығларда удаа чиңiс тудып алча. Чайғызын федерация синiндегi марығлар ГТО фестивальынаң пiр тусха килiс парғаннар, аннаңар таллағ идiлген. Давидтi кiчiгдең сығара таныпчам, сӧбiрезi хонҷыхтар полғаннар. Ӧс парғанда, секцияларға чӧр сыххан, амды позының утырарға хынминчатхан хылиин кӧзiтче. Школада ӱгренiзi пасхаларнинаң халбинча, чахсы ӱгренче, че ӧӧн кӱзiн спортха пирче.
Давидтең хайди «Артексер» пар килгенiн сурастырғам, ол сағысха кирген:
– Чолның хорадығлары прай путевкаа кiрче. 28 августта пiс Ағбаннаң Москвазар пис час учуххабыс. Анаң Симферопольға теере поездтiг iкi кӱн парғабыс. Севастополь городты паза Гурзуф аалны ирт парыбысханда, талай хазындағы Ялтаға читкебiс. Аннаң ырах нимес пiстiң лагерь орныхча, анда олғаннар чыл тооза тынанчалар. Хакасиядаң сигіс кiзi парғабыс, че iкi хызыҷах соонаң ковиднең ағырыбысхан. «Артекте» пiс спортнаң, ӱгренiснең, чайаачынаң айғасхабыс. Полған на кӱнге позының расписаниезi, кирек чох одыр полбассың. Пос тузына обед соонаң iкi час пирiлче, че турадаң сығарға чарабас.
Давид, ам тоғыс классха сых парып, 11 класс тоозарға пӧгiн тутча. Школа соонаң Москвазар МЧС тоғынҷызына ӱгренерге кiрiп алар чазыт сағызы пар. Андағ ӧткiн, маңнаныстығ оолға хайди талаан полбас, хайди даа кiрiп алар тіп сағынчам.
Тарина Бутонаева
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде