Пiр чыл хус палаларының аразында пір пора палаҷах чоо ағырыбысхан. Мин, ағаа им пиріп, сӱт iчiрiп, хайди полза айылдырып алғам (кічіг ниме айастығ нооза).

Тус иртче, чайғы килче, кӧрзем, ол палаҷах сынынаң пасхазына чит полбинча. Хаҷан-да ағырғаны пілдiрче: тоңасты ағаа кӧп арах тастапчам, пірееде пасха даа тадылығ нимелер пирчем, че Пеструшкам улуғ ӧс полбинча. «Че, андағ даа ползын», – сағынчам.

Ирте часхызын пір улуғ хызыл куркаҷаам пала сығарып алған. Харға-саасхан сегірбезін тіп, піс ағаа алынҷа илееде улуғ сиден ит пиргебіс. Ол анда позының палаларынаң айғас турча. Хыринҷа Пеструшка иртіп париған, анаң ол, кинетін тохтабызып, айлан килген. Сетка ӧтiре пахлап, чоо кӧрче палаларзар, ниме-де чоохтанча. Тігізі сала тарынчатхан осхас, ниме-де пулбурабысхан. Пеструшка кидер хыйа пастырыбысхан.

Тоғыстаң айлан киліп одырзам, ирім мағаа хысхырча:

– Кӧрдек, аархы серейде ниме пол парды? Чарым час аннаң хайдар улуғ хысхырыс-табыс истілче!

Серейзер чӱгӱр киліп, кӧрзебіс, чоғархы уйада пір симіс ах таңах нымырха туурға кӱстенче, Пеструшка, тізең, уйа хыринда турып алып, чабал табыснаң ағаа хысхырча. Оларның тілінең чоохтаза, пiди осхас.

Пеструшка:

– Тур, хыйа пар мыннаң!

Хызыл хус:

– Чох, парбаспын, пу уйа прайзыни!

– Тур тіпчем, пу уйа мини полар! Мин пала пазарбын!

– Че мында нымырха даа чоғыл!

– Че чох полза чи, тур, тур, тууур!

– Хайди полчазың син, Пеструшка, кӧмес тее тохтадах!

– Чох, тохтабассым, пар мыннаң тіпчем, пар!

Мин Пеструшканы, кӧӧлҷе тудып, кидер апар салғам.

Иртен кӧрзем, Пеструшка хаҷанох ол уйада чадып алтыр. Че ниме идер зе, 4-5 нымырха сал пиргебіс. Чибіргi пір кӱн ирткен соонаң, Пеструшка тӧрт палаҷах сығарып, мааннап, изертіп чӧрче.

сом орыны

Антонида

АРШАНОВА-БЕЛОГЛАЗОВА