Пос тілі паза хынығ ойыннар
Пос тiлi парыс ағылча
Аймир Боргояков Ағбанның 24№ школазында пастағы класста ӱгренче. ӱр ниместе ол пастағы ахчаҷағын утып алған. Аймир Хакасияның национальнай паза территориальнай политика министерствозы иртiрчеткен марығда араласхан. Анда ол, 70 азыра балл чыып, чиңiсчiлер санында полыбысхан.
Аймир кiчiгдең ала чапчаң, хыйғаҷах пала ӧсче. 3 частығдаң ала лего конструкторларын чыып пастаан, амды улуғ танктар даа, машинаҷахтар даа сидiксiнiс чох чыып алча. Пу кирекнең ол Арсентий кiчiг туңмаҷаанаң айғасча. Харындастарның аразы пiр ле час. Iдӧк Аймир мультфильмнердегi хынған матырларны хоостирға хынадыр. Кӧзiдiмге, Хагги Ваггилернi чахсы чайапча.
Ӱр ниместе марығ чиңiсчiзiн кӱрес секциязына пирiбiскеннер. Ол ағаа чайалған осхас.
– Олған садынзар чӧрчеткенде, Аймир, пасха палаларнаң харбазып, оларның ӱстӱне сығып, «Мин чиңiп алдым!» тiп хысхырҷаң. Воспитательлер аны удаа хоптаҷаңнар паза кӱрес секциязына пирiбiзерге чӧптеҷеңнер. Че ол андада кiчiг полған, аннаңар пiс аны андар пирерге маңзырабаабыс. Аймир пабазына кӧктеп парған тiп сағынчабыс, – чоохтапча Аймирнiң iҷезi Кристина Владимировна.
Боргояков ирепчi ибде тӧреен тiлнең не чоохтасча, оолахтарын iдӧк кӧнiктiрче. Аннаңар Аймирнең Арсентий пос тiлiнең чахсы чоохтасчалар. Орыс тiлiн, тiзең, олған садынзар ла чӧрiп пастаанда пiл сыхханнар. Пала хакас тiлiн пiлчеткенде, тiл мариинда аралазарға сағыныбысханнар. Итсе-де, олған садынзар даа чӧрчеткенде, сӧбiре хакас марығларында матап араласчаң, удаа сыйыхтығ орыннар алҷаң. Аннаңар пу тiл мариинда аралазарға чочынмааннар, улам тiл пiлчеткенде, хорғыстығ ниме чох полған.
– Тӧреен тiлiмнең чахсы чоохтасчатхан ӱчӱн мағаа ахча пирерлер. Минiң паза Арсентийнiң ахча чығҷаң iдbстерbбbс пар. Ахчамны позымнинзар чыы тарт салам. Итсе-де, пастап ойнаҷах алып аларға сағынғам, че iҷем ибде ойнаҷахтар кӧп теен, мағаа табырах ойлатчатхан велосипед алып аларға чӧп пирген. Мин аннаңар хаҷанох сағынчам нооза, паба-iҷемнең ал пирерге сурынҷаңмын. Амды пос ахчазына алып алам. Часхызына теере хоза ахча чыып алып, чайғызына мағаа наа велосипед ал пирерлер, – кӧңнiн чазырбинча марығ чиңiсчiзi.
Килчеткен чылда пу марығ иртiрiлерӧк. Боргояковтар сӧбiрезi анда хатап аралазарға пӧгiнче.
– Аҷазынзар кӧрiп, Арсентий очы оолағыбыс анда iдӧк аралазарға сағыс тутча. Утып алған ахчазын чыы тарт салып, килкiм ниме-ноо алып аларға хынча, – чооғын тоосча Кристина Боргоякова.
Оксана Сунчугашева
хынығ ойыннар ирткен
Таштып аалда чииттернiң кiнi тоғынча, анда ӱр ниместе, 22 октябрьда, олғаннарға хынығ ойыннар ирткен. Хайди слаймнар алай сабыннығ суғдаң кӧбbктер ӱбӱрерге. Орыс тiлiнде андағ кӧзiдiглер «мастер-класс» тbп адалчалар. Палаларны кӧзiдiглерге 5-6 частығдаң пасти алчалар, iҷе-пабаларынаң азынада чӧптесчелер, «мастер-класс» ӱчӱн ахча тӧлирге кирек нооза. Пiр паланың ӱчӱн 350 – 400 салковай сых парча.
Олғаннарға мындағ чапсых ӱлӱкӱннi Минсуғ городтаң килген «Анимашка» ӧме иртiрче, аның устағҷызы Екатерина Ледяева кӧзiдiглер иртiрерге Таштыпсар позы килген. Олғаннар, залда чыыл парып, улуғлар нимее ӱгретчеткенiн ситкiп исчеткеннер. Пiреезi слаймнарны ибде дее иткен полар, анда ПВА-клей паза хойытчаң ниме ле кирек. Сабыннығ суғны даа, сағынчам, тимнеп аларға аар нимес. Сағысха кирзе, мының алнында олғаннар, пiрее iдiс-хамыста шампуньны алай сабынны суғнаң аралап, кӧбbктер позытчаңнар.
Сынны чоохтаза, амғы палалар аны-мыны хайди идерiн интернет хоостыра даа чахсы пiлiп алчалар. Че пасха олғаннарнаң хада паза прай ниме пилен пирзелер, оларға уламох хынығ пiлдiрче нооза. Аннаңар, городтаң мындағ кӧзiдiглернең хатабох килзелер, кiчiг чон «мастер-классха» хайди даа хынып пар килер.
Август айда, тiзең, Таштыпта «Наа чуртас» пос устаныстығ ӧме хабазиинаң пасха аалҷылар палаларны чапсытханнар. Ағбаннаң килген iкi ирен аймах частығ олғаннарға тасхар суух азотнаң эксперименттер кӧзiткен: чахайахты, кии шариктерiн алай чиистi тоортып, анаң пушкани осхас трубалардаң суух азотнаң атханнар. Андағ «соох-шоу» палаларның кӧңнiлерiне уғаа кiрген, олар эксперименттер иртiрчеткен ах халаттығ «iстезiгҷiлердең» ойыннарда аралазарға сурынғаннар. Олғаннар, туртухпин, иреннерге ӧткiн полысханнар, iди тусты хынығ иртiргеннер. Ахча сурии кӧдiрiлбеен, аны «Наа чуртас» устағҷызы Надежда Троцкая аал чӧбi хоостыра хайдағ-да улуғ нимес грантха иртiрген. Чапсых кӧзiдiг ӱчӱн ағаа улуғ алғыс ползын.
Тарина Бутонаева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |