ХЫНЫС - ПОЛҒАН НА ОМАДА
Лариса Юрьевна хоосчы ӱгредиин толдыразынаң ирткен. Иң пурун ол Ағбандағы Д.И.Каратановтың адынаң олған хоос школазын тоосхан. Анаң Хызылчардағы В.И.Суриковтың адынаң хоос училищезiнде ӱгренген. Соонаң Н.Ф.Катановтың адынаң Хакас хазна университедiн тоосхан. Ол аймах марығларның чиңiсчiзi, Россия синiнде иртiрiлген плэнернiң араласчызы полча. Iдӧк Лариса Юрьевна «Хакасия» газетаның хоос редакторы полча.
Кӧзiдiге аның пасха-пасха чылларда чайалған тоғыстары, сомнары сығарылған. Оларда хоосчының Хакасияа, аның кибiрлерiне хынызы iле кӧрiнче. Кӧзiдiмге, «Тасхыллар пархазы», «Сундухтар худы», «Чылаңмас», «Хайҷының ыры» хоостар оларда чайалған омаларнаң чапсытчалар.
Чир-чайаан хоосталған тоғыстарның кӧбiзiнде кӱн чахайағы учурапча. Хоосчының чооғынаң, пу порчолар ӧсчеткен чирде ол уғаа истенче, сағыссырастары амырапча. Кӧзiдiгде iҷезiн, ағазын, позын хоостаан сомнар пар. Iдӧк Сойан-Сус ГЭС-та полған хорығларға, Илбек Ада чаа тузында Ағбанда орныххан госпитальның тоғызына чарыдылған хоостар кӧрiгҷiлернiң хайиин тартчалар. Паза кӧзiдiгде Лариса Юрьевна чайаан кӧклӧлернi кӧрерге чарир. Уғаа ачыныстығ омалығ хызыҷахтар пол партыр.
Таныхтирға кирек, Лариса Юрьевна кинделерге хоостар тимнепче. Аннаң кинде сығарарында хада тоғынғаннаңар «Хакасия» газетаның ӧӧн редакторының пастағы орынҷызы, республика культуразының саблығ тоғынҷызы, Россияның саблығ хабарҷызы Юрий Абумов чоохтаан. «Пiс Ларисанаң, Бонни паза Клайд чiли, хада тоғынчабыс, тӧӧй сағынчабыс. Позы кӧрбеен кiзiнi, аннаңар чоохты ла хығырып алып, уғаа орта хоостап салча. Мынзы аның таңнастығ сари. Пiс, газетада тоғынчатханнар, аның узы чылдаң чылға ӧсчеткенiн кӧрчебiс. Ол тилiс хаҷан даа тохтабинча. Прай чӱреебiснең аның чидiглерiне ӧрiнчебiс. «Хакасия» редакциязына мындағ чайаачы кiзiнi тоғысха алып аларға ӱлӱс тӱскен тiп санапчам», – теен ол.
Хоосчыны кӧзiдии азылғанынаң хада тоғынчатханнары, училищеде хада ӱгренгеннерi алғыстирға килгеннер. Полғаны ла Лариса Баканованың ачых-чарых, кiзее паарсах кӧңнiн таныхтаан. Д.И.Каратановтың адынаң олған хоос школазының директорының орынҷызы Марат Бурнаков Лариса Юрьевнанаң хада Хызылчарда ӱгрентiр. Хакасиядаң парғаннар училищеде харындас-пиҷелер чiли пiрге тудынҷаң полтырлар. Аннаңар олар удур-тӧдiр чахсы пiлчелер. Марат Константинович, хоосчы-хабарҷының чайаачызын пӧзiк паалап, олған хоос школазында кӧзiдiг иртiрерге хығырған. Лариса Баканованың тоғыстарынаң танызары ӱгренҷiлерге уғаа тузалығ полар тiп таныхтаан. Тиктең нимес аның тоғыстары республикабыстың аймах культура учреждениелерiн чазапчалар.
Лариса Юрьевнаның чайаачызынаң танызарға сағынчатханнарға кӧзiдiг 18 декабрьға читiре тоғынар.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |