РОССИЯДАҢАР ПӀЛӀСТЕРӀН КӦЗӀТКЕННЕР
Марығ. Алтай аймааның Кӧк хайа аалындағы школада «Россияда чуртапчабыс, Россияны пiлчебiс» республика марии ирткен. Анда пасха хан чирлерiнең килген, пiстiң республикабыста чуртапчатхан ӱгренҷiлер паза студенттер араласханнар
Пӱӱл марығда 10 азыра олған араласхан. Олар аймах нациялығлар: хырғыстар, таджиктер, узбектер, казахтар, азербайджаннар, дагестаннар, украиннер, армяннар. Марығның ӧӧн пӧгiнi – пасха хан чирлерiнең килген олғаннарға хабазары, чоннар аразындағы хайызығларны тыыдары.
Анда аралазар ӱчӱн, чииттерге, «Нимедең пасталча Ада чир-суу?» сурыға нандырып, улуғ нимес сочинение пазарға кирек полған. Соонаң марығ араласчылары улуғ нимес тест ирткеннер, хайда оларға Россия культуразын, тархынын чахсы пiлчеткенiн кӧзiт пирерге киректелген. Чайаачы чардыхта, тiзең, ӱгренҷiлер паза студенттер Россия писательлерiнiң произведениелерiн кӧрбин хығырғаннар.
Марығ араласчызы Эдуард Камолов сӧбiрезінең хада Хакасияда читi чыл азыра чуртап парир. Ағбандағы 4 № школада ӱгренче. Аның алнында ол Киргизияда чуртаан. Анда аның аға-ууҷазы халған, сӧбiре оларзар чайғы каникулларда ааллап чӧрче.
– Пастап пабам Хакасиязар килiбiскен. Чурт паза тоғыс таап алғанда, пiстi прайзын кӧзiрген. Мында чуртирға истiг паза школада чахсы пiлiстер пирчелер. Пiрее теманы оңар полбазам, ӱгретчiлер хатап ипти чарыт пирчелер. Киргизияда, тiзең, ӱгренҷi позын хомай тудынза алай ба уйан ӱгрензе, ӱгретчiлер сах андох палаларны хатығлапчалар. Ағаа хоза, школа тоғынҷылары орыс тiлiн хомай пiлчелер, тӧреен не тiлнең чоохтасчалар. Че орыс тiлiн пiлбезең, ырах пар полбассың. Аннаң аймах чоннар чоохтасчалар паза аны кӧп хазнада ӱгренчелер. Орыс тiлi чох вузтарзар даа кiр полбассың. Пiске чахсы ӱгредiг пирерге пӧгiніп, iҷе-пабам Киргизиядаң кӧзерге чарадығ алған. Хакасиязар килгенде, мин орыс тiлiн iкi айға ла ӱгренiп алғам. Амды пiр дее туртухпин чоохтасчам паза тiлiмнi пайыдарға кӱстенчем. Школазар килгенде, орындағылар минi пiр дее хыйыхтабааннар, нанҷыласханнар паза школаа, ӱгретчiлерге кӧнiгерге полысханнар, – чоохтапча Эдуард.
Школа тоозыбысса, чиит оол МЧС-тың ӱгредіг заведениелерінзер ӱгренерге кiрерге пӧгiнче. Хайди ол тiпче, аның пабазы чиитте анда тоғынарға хынтыр, че килiспиндiр. Че пу профессиязар чолы чабых полза, ол тiс имҷiзiне ӱгренерге пӧгiнче, пу тоғыс аның iҷезiнiң кӧңнiне кiрче. Чиит оол, iҷе-пабазының сағынған сағыстарын толдырып, оларны ӧрiндiрерге сағынча.
Ағбандағы 20 № школаның ӱгренҷiзi Антон Кислицын iдӧк марығда араласча.
– Пасха хазнада ӱгренерге алай ба тоғынарға килiссе, андағылар миннең «Хайдағ ол Россия?» тiп сурзалар, мин нандырам: «Россия Илбек Ада чааны утып алған, фашисттернi чох иткен. Iдӧк анда иң улуғ гидроэлектростанция – Сойан-Сус ГЭС! Россия ол орыстарның на нимес, ол аймах чонның чир-суу полча. Пiстiң хазнада аймах чоннар ынағ, пiлiзiп чуртапча», – сағызын искiрче Антон Кислицын.
«Россияда чуртапчабыс, Россияны пiлчебiс» республика марии Хакасияның национальнай паза территориальнай политика министерствозы устаанынаң «Хакас Республикада Россиядағы нацияларның пірге полчатханын паза нациялар аразындағы хайызығларны тыыдары» программа хоостыра иртiрiлген.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |