ШКОЛАДОХ ПРОФЕССИЯ АЛЧАЛАР
02.12.2022
Хабарлар
3 декабрьда – Кинектернің чоннар аразындағы кӱнi. Алтай аймааның Хубачар аалындағы коррекционнай школа-интернат профессиональнай ӱгредiг апарарына лицензия алды. Амды школаны тоосхан чииттер аттестат ла нимес, iдӧк профессия алчалар
Пу ӱгредiг организациязында олғаннар 9 классха теере ӱгренчелер. Амғы туста анда 100-ке чағын пала пiлiс алча, оларның хайзы-да ибде ӱгренче, пасхазы школаа чӧрче. Хайди чоохтапча школа директоры Светлана Кузнецова, хазии хоостыра прайзы профессия ал полбинча. Хызыҷахтар 2-ҷi разрядтығ кип-азах тiкчең усха ӱгренчелер, оолахтар – 2-3 разрядтығ столярға.
– Школада чииттернi профессияа ӱгредер сурығ хаҷаннаң турған, – чоохтапча Светлана Владимировна. – Пiстiң учреждениенi тоосхан оол-хыстар амға теере Ағбандағы алай ба Пиидегi профессиональнай ӱгредiг учреждениелерiнзер профессия аларға парчатханнар. Анда оларға ӧнетiн группалар тӧстелҷең. Пасха муниципалитетте олар сыбыра чуртапчатханнар, ибзер, тiзең, каникулларға ла айланчатханнар. Аннаңар пiс позыбыстың учреждениебiсте олғаннарны профессияа ӱгредерге чарадығ алғабыс. Хызыҷахтар тӧзек-частых чахсы тiк полчалар. Общежитиеде пiс пос ла тiккен тӧзек-частыхнаң тузаланчабыс. Оолахтар абдыралар, iдiс-хамыс чайапчалар. Мастерскойларыбыста тоғынҷаң тирiглер читкiҷе.
Мыннаң мындар школа-интернаттың уcтағ-пастаа ӧдiк тыхтапчатхан устарны тимнирге пӧгiнче. Хайди тiпче Светлана Кузнецова, Алтай аймаанда мындағ устар улуғ кирексiнiсте. Чуртағҷылар ӧдiктерiн иптирге Ағбанзар чӧрчелер.
Iдӧк пу ӱгредiг учреждениезі Алтай аймаана киректелчеткен пасха даа специалисттернi тимнирге тимде. Чииттерге пос чирiнде тоғыс полза, олар, аар-пеер сабылбин, пос чирiнде тоғынарҷыхтар паза туған-чағыннарынаң хости чуртирҷыхтар.
Автор :
Оксана Сунчугашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы