“Хола пырғыҷах” 2-ҷі орынға турысты
04.12.2022
Хабарлар
Хысхының пастағы кӱні “Хакас чирі” газета редакциязын öріністіг хабарнаң удурлады: газетабыстың “Хола пырғыҷах” хоза сығарызы “Алтын Гонг” Ясен Засурскийнің адынаң Тиксі Россиядағы хабарҷылар марииның “Олғаннарға паза чииттерге иң артых öнетін сығарыс” номинациязының 2-ҷі степеньніг дипломына турысты.
Пу чидігдеңер пічік паза сыйыхтар читірер пайрамға хығыртығ “Хакас чирі” газетаның ööн редакторы Радион Сунчугашевтiң адына марығны иртірчеткен Регионнардағы СМИ устағҷыларының альянсының (АРС-ПРЕСС) толдырығлығ устағҷызы Софья Дубинскаядаң кірген!
Чоохтирға кирек, марығ Россияның саннығ тилізі, палғалызы паза чон коммуникациязы министерствозының ахчалығ хабазиинаң иртче. Ідӧк “Российская газета” редакциязы, Саха (Якутия) Республиканың инновациялар, саннығ тиліс паза искіріг-коммуникация технологиялары министерствозы, Тиксі Россияның чон фронты, “Росводоканал” ГК, Россияның криптоэкономика, арған сағыс паза блокчейн ассоциациязы (РАКИБ) марығны иртірерге полысчалар. “Алтын Гонг” марығ пӱӱл 28-ҷізін иртірілче.
“Хола пырғыҷах” хоза сығарыс, тізең, «Хакас чирі» газетада 30-ча чыл сых парир. Аның тöстегҷізі хакас писатель, хабарҷы Каркей Нербышев полған. Пӱӱн газетабыстың кічіг хығырығҷыларына хоза сығарысты культура пöлии редакторы Татьяна Тютюбеева сығарча. Ол, республиканың школаларынаң, хакас тілі паза литература ӱгретчілерінең палғалыс тудып, олғаннарның пічіктерін паза хоостарын чыып алча, анаң “Хола пырғыҷахтың” страницаларында сығарыбысча. Аның ідöк позының “чылтызахтары” пар: аймах марығлар чиңісчілері, чайаачы кöңніліг олғаннары, спортсменнер. “Хола пырғыҷах” чоныбыстың öсчеткен тöлін тöреен тілін пілеріне, аны ӱгренеріне, ағаа хынарына улуғ хозым итче!
Аның редакторын паза редакция ӧмезiн наа чидігнең алғыстапчабыс паза мыннаң мындар наа сыйыхтар алғапчабыс!
Автор :
Тимнеен Наталья Сюптерекова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы