МЕДАЛЬЛАРНАҢ ӦРІНДІРГЕННЕР
09.12.2022
Хабарлар
Спорт. Ағбанда грек-рим кӱрезінҷе РСФСР-ның саблығ тренері Михаил Боргояковтың хумартхызына чарыдылған турнир ирткен
Боргояков турнирі – кибірліг марығ. Аны саблығ тренернің ӱгренҷілері 1995 чылда Михаил Игнатьевич хазыхтох иртірiп пастааннар. Ол 21 часха читкелек кӱресчілерге кӧріл парған. Алында турнир регионнар аразындағы полған, пӱӱл паcтағызын на тиксі Россия синінде иртірілді. Марыға спортсменнер 9 регионнаң килгеннер, ол санда Алтай паза Хызылчар крайларынаң, Томск, Новосибирск, Иркутск областьтарынаң.
Программа хоостыра турнир ікі кӱн парарға кирек полған. Сурыныс пічиин 130 спортсмен ыстыр, че салтарында Ағбандағы кибіссер 80 артиинаң кізі сыххан. Аннаңар марығны пір кӱнге иртiрібіскеннер. Арға-мӧрійні пайрамни азарында Хакасияның спорт министрі Сергей Кочан, республиканың спорт кӱрезінҷе федерацияның президенті Геннадий Канзычаков паза Европаның iкi хати чемпионы, тилекей марииның призеры Адам Курак араласханнар. Аарлығ аалҷылар, чоох тудып, оолларға чиңіс тударға, сіліг кӱресті кӧзідерге алғааннар.
Алғыстастар соонаң пастағы паза ӱзінҷі орыннар ӱчӱн харбазығ пасталған. Хакасия командазынаң азах меетке 5 кізі сыхтыр. 55 кг кӧдірімде финалда Максим Тумояковнаң Владислав Султреков тоғасханнар. Харбазығ пасталғандох, Максим чиңіс тудар тiп ікінҷілес чох полған. 2 – 4 декабрьда Хызылчарда Сибирь чемпионады ирткен. Марығда Тумояков ӱзінҷізі полыбысхан. Анзына хомзын парып, таң, 19 частығ Максим «ыырҷызын» порабысхан тиирге чарир. Ол Асхыс аймаандағы Ис пилтірі аалдаң. Пастағы тренері – Сергей Чепчигашев, анаң Степан Мамышевтің холында узын таптаптыр. Амды Олег Немченконың устаанынаң харбасча. 60 кг кӧдірімде Хакасия алнын Тимур Чебодаев алған. Чир-суғҷыбыстың азах меетке сығарға кӱзі читпиндір. Че ол хола медальны пірдеезіне пирбеен. 18 частығ спортсмен Таштып аймаандағы Чыланнығ аалда тӧреен, 7 частаң Ағбанда чуртапча.
Турнирнiң «чылтызына» Ильяс Палтушевті санирға чарир. Кибісте Ильяс китенминчеттір. 17 частығ спортсмен, ӧткін хайынып, «ыырҷыларын» микее кирче. Аннаңар Палтушевтің харбасчатханын кӧрерге хынығ. Грек-рим кӱрезіне хынчатхан улус Ильясты паза аның аҷазы Русланны чахсы таныпча. Харындастар Ағбаннаң, оларның пабазы уйгур полтыр, іҷезі – орыс. Руслан армияда служба иртчеттір, аннаңар туңмазы марығда позының паза аҷазының ӱчӱн турысча. Ильяс пылтыр Сибирьнің первенствозында чиңіс тутхан, пӱӱл кӱскӱзін Россия мариинда 5-ҷі орынға сыххан. Амды ол Россияның піріктірілген командазына кірче.
Чидіглерінең Пахтаев харындастар ӧріндіргеннер. Олар ікістер. Антон 87 кг кӧдірімде харбасча, Алексей – 67 кг кӧдірімде. Чоохтирға кирек, 67 кг кӧдірімде иң кӧп араласчы – 16 кізі – полған. Мында медальлар ӱчӱн Игорь Глазуновнаң Алексей Пахтаев харбасханнар. Хомзынысха, Игорь пастағы орынға сых полбаан, Алексейнің хола медаль. Антон Пахтаевтеңер чоохтаза, ол «ыырҷыларына» тын хабынарға пирбин, майыхтырчаттыр. Хакас спортсменнің узына марығның ӧӧн чарғыҷызы Антон Никифоров пӧзік паалағ пирген.
Антон Васильевич кӱресчіні тиктең махтабиндыр, ол алтын медальны холға кирген. Пахтаевтер пӱӱл Ағбандағы олимп резерві училищезiн (техникумны) тоосханнар. Амды пілістерін Хызылчардағы вузта алғытчалар.
Салтарында Хакасия спортсменнері 11 медаль утханнар: 4 алтын, 2 кӱмӱс, 5 хола. Тренерлердең Александр Худяков маңнаныстығ тоғынчаттыр. Аның тӧрт ӱгренҷізі сыйыхтығ орынға сыххан. Александр Михайлович ікінҷі чылы Валентин Кольчиковнаң хада тоғынча. Чиит тренерге 27 час, ол тоғынарға паза харбазарға маңнанча. Пу наада ирткен Сибирь чемпионадында чир-суғҷыбыс кӱмӱс призер полыбысхан. 87 кг кӧдірімде, тізең, Тимур Чепчигашев чиңіс тутхан.
Турнирнің иң чахсы спортсменіне Ильяс Палтушев саналған, чарғыҷызына – Артём Кулумаев. Максим Тумояковты чиңіске кӱстенген ӱчӱн таныхтааннар. Оларға Хакасияның спорт кӱрезінҷе федерациязының президенті Геннадий Канзычаков сыйыхтар читірген. Антон паза Алексей Пахтаевтерні, Максим Тумояковты позының адынаң грек-рим кӱрезінҷе CCCР-ның спорт узы Владимир Угдыжеков сыйыхтаан. Хакасияның физическай культура паза спорт министерствозы кӱстенізінең прай чемпионнар паза призерлар ахчалығ сыйых алғаннар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде