АСХЫС АЙМААНДА – НАА ПРОЕКТТЕР
09.12.2022
Хабарлар
«Чонға кирек иң артых проект» марығ. Асхыс аймаанда ікі танығлығ кирек полған. Полтах аалда спорт площадказы пайрамни азылған, Ӱс чулда – аймах кӧстегліг парк
ПОЛТАХТА – СПОРТ ПЛОЩАДКАЗЫ
Олар Хакасияның национальнай паза территориальнай политика министерствозының «Чонға кирек иң артых проект» марығ хоостыра чуртасха кирілгеннер. Полтах аалда хоккей коробказы пӱдірілген паза тренажерлар турғызылған. Спорт объектін азарға республиканың национальнай паза территориальнай политика министрiнің пастағы орынҷызы Наталья Салата, спорт министрі Сергей Кочан, Асхыс аймааның устағ-пастаа, С.З.Карамчаковтың адынаң Асхыстағы спорт школазының директоры Виссарион Кольчиков, Хакасияның меспектіг хоккейҷе піріктірілген командаларының улуғ тренері Виктор Менжуренко паза пасхазы килгеннер.
Хайди таныхталған, спорт чиңістерге чол асча. Ол чонның сабланызы паза сыйии полча. Ағаа прай чонға тартыларға кирек. Аннаңар наа спорт площадказы хазых чуртастың, олғаннарның паза улуғларның спорт тилізінің кіні пол парар.
Аал чуртағҷыларын алғыстирға Ис аал чӧбінің пазы Елена Чистыгашева сыххан.
– Минің кӧрізімнең, пу спорт площадказы аал чуртағҷыларына улуғ туза ағылар. Олғаннар уроктар соонаң пеер кӱннiң килчелер. Улуғлар ідӧк спортнаң айғасчалар. Ізенчем, піс пу площадкада хоккейҷе ле нимес, ідӧк мини-футболҷа марығлар иртірербіс. Улуғ алғызымны Хакасияның национальнай паза территориальнай политика министерствозына паза Асхыс аймаа администрациязына читірчем, – чоохтаан Елена Ивановна.
Асхыс аймаа пазы Абрек Челтыгмашевтің сӧстерінең, Ис аал чӧбінің чуртағҷылары спортха тартылчалар. Аймахта иртчеткен прай спорт мероприятиелерінде Полтах аалның командалары сыйыхтығ орыннарға сыхчалар. Спорт объекті республиканың национальнай паза территориальнай политика министерствозының, Асхыс аймаа администрациязының паза Ис аал чӧбінің пірге тоғызының салтары полча.
Хакасияның национальнай паза территориальнай политика министрінің пастағы орынҷызы Наталья Салатаның таниинаң, Ис аал чӧбi «Чонға кирек иң артых проект» марығда пӱӱл пастағызын на сыйыхтығ орынға турысты. Пічіктер 750 муң салковайға тимнелген. Ӱзінҷі орынға турызып, муниципалитет 550 муң салковай утып алған. Че андағ даа полза, чидiспинчеткен ахча табыл парған. Полтах аалда ідӧк спорт залы нааҷылалча, пу тоғыста прай даа чуртағҷылар араласчалар.
Чооғын тоозып, Наталья Салата спорт объектiнің пӱдіриинде ӧткін араласхан чуртағҷыларға министерствоның алғыстас пічіктерін читірген.
Аал чуртағҷыларын ідӧк Виссарион Кольчиков паза Виктор Менжуренко алғыстааннар. Хызыл чалама хыплал парғанда, чыылысхан аалҷылар тренажерларны паалааннар.
ӰС ЧУЛДА – НАА ПАРК
Олох кӱнде Ӱс чул аалда аймах кӧстегліг парк азылған. Хайди таныхтаан аал чӧбі пазы Занета Ултургашева, аал чӧбі, «Чонға кирек иң артых проект» марығда чиңіс тудып, 750 муң салковай утып алған. Ол ахчаа спорт тренажерлары, ойын оборудованиезі паза аалның тархынынаңар искіріглiг стендтер алылған. Парк наа ла тӧстелче, анда тӧрт алынҷа орын кӧрілче: спортха, ойыннарға, чайаачы тоғысха паза аал тархынына. Тынағ орнын сіліглиріне аал чӧбі ағас хорбыларын алып алған, олар газоннаң хада паркта пазағы чылда одыртыларлар.
– Хакасия правительствозы сыйиинаң пасха, пу тоғысха Асхыс аймаа администрациязы 100 муң салковай позытхан, аал чӧбі – 70 муң салковай. Парк сиденін турғызарға идінҷек Владимир Мурашко полысхан, столбалар ағыл пирген. Чол тоғынҷылары бульдозер пиргеннер, чирні чікім идібіскебіс. Ам сағынарбыс ағастарны хайдағ оңдайнаң одыртарға. Казахстанда оларны буквалар оңдайынаң одырт салғаннар, олар хан тигірдең кӧрінчелер, – чоохтаан Занета Ананьевна.
Паркты азарға ӱгренҷілер паза улуғлар килгеннер. Хайди таныхталған мероприятиеде, алындағы чылларда ол орын отха пастыр салған полған, анда сӧп-сап кӧп тӧгілген. Аал чӧбі аны иптирінҷе улуғ тоғыс толдырыбысхан.
– Пістің паркыбыс читiре тимде нимес, пу тоғыс нинҷе-де чыл апарылар. Мында хоза арт-объекттер турғызылар, ағастар одыртылар, кӧп чыл ирт парза, амғы палалар, ӧс парзалар, пӧзік ағастар аразында тынанарлар. Хакасияның национальнай паза территориальнай политика министерствозына паза Асхыс аймаа администрациязына улуғ алғызым читірчем, – теен Занета Ултургашева.
Наталья Салатаның сӧстерінең, парк чуртағҷыларны ӧріндірзін. Улуғлар мында аймах мероприятиелер иртірзіннер. Чайғызын мында тынанарға истіг ползын. Олғаннар пеер ойнирға кил турзыннар.
– Пазағы чылларда «Чонға кирек иң артых проект» марығның сыйыхтар чыындызы хозылып одырар. Аннаңар килчеткен чылның проектін чуртағҷыларнаң ӱзӱрерге чӧп пирчем, – чоохтаан Наталья Николаевна.
Абрек Челтыгмашевтің таниинаң, парк алындағы чылларда тоғынған устағҷының чазыттығ сағызы полған. Аны Культура туразының хыринда тӧстирге пӧгінгеннер. Че андағ даа полза, пӱӱнгі объект истіг орында пӱтче. Мында харах ӧріндірчеткен арт-объект турғызылған. Че мыннаң тоғыс тохтадылбинча, паркты чахсыландырарға мыннаң мындар кӧп кӱс салылар. Пӱӱлгі марығда аал чӧптерінің проекттерін толдырарына 20 миллион салковай позыдылған, пазағы чылда 34 миллион салковай позыдылар. Чооғын тоозып, Абрек Васильевич Ӱс чул аал чӧбіне дуб ағас хорбыларын сыйлап пирерге молҷаан.
Пайрамда нымах матырлары палаларға улуғ нимес ойын кӧзіт пиргеннер. Парк ізіктері азыл парғанда, олғаннар ӧрiніснең андар кире чӱгӱргеннер.
Автор :
Антон ЧЕРТЫКОВ
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
