ФЕРМЕРЛЕР ПАЗА ПРЕДПРИЯТИЕЛЕР ЧААҶЫЛАРҒА ПОЛЫСЧАЛАР
28.12.2022
Хабарлар
Хабазығ. Хакасияның кресен-фермер хоныхтары паза аал хонии предприятиелерi Украинада ӧнетiн чаа операциязында араласчатхан чир-суғҷыларыбысха хабасчалар
Хакасияның аал хонии предприятиелерi паза фермалары ӧӧнiнде мал, хой ӧскiрерiнең айғасчалар, аннаңар чардыхти мобилизация пасталғанда, чааҷыларға итнең полыс пирерге чарадығ алылған. Республиканың аал хонии паза ас-тамах министерствозы, «Боевое братство» халых организациязынаң тоғазып, чааҷыларға ниме киректелчеткеннеңер сурған.
– Киректелчеткен ниме-ноо санында iдӧк ас-тамах, аннаңар пiс Ағбандағы ит-консерва комбинадынаң палғалысхабыс. Оларнаң чӧптескебiс. Фермерлер паза предприятиелер консервалар тимниріне маллар паза аттар тикке пиргеннер. 7,5 тонна консерва Омсксар пiстiң регионнаң парған чааҷыларға ызылған.
Пiстiң республикада iдӧк сӱт сығарчатхан хоныхтар пар, аннаңар сгущёнка ызарынаңар чарадығ алылған. Кӱрген айының 20-ҷі кӱнiнде чир-суғҷыларыбысха 25 тонна консерва ызылар. Полызығда 84 фермер паза предприятие араласхан. Олар 119 пас мал паза ат пиргеннер. Пiреезi пiр мал пирген, пасхазы – iкi-ӱс-пис. Кем нименең полыс пирер оңдайлығ, аннаң хабасхан. Пiстiң саблығ «Бирюса» ООО каша консервазын тимнирiне гречка пирген, чир тамаан ӧскiрчеткеннер тамкы паза пасха даа ниме-ноо ал пиргеннер. Амды пу тоғыс узарадылар, – теен Хакасияның аал хонии паза ас-тамах министрi Сергей Труфанов хабарҷыларға.
Хай пiрее фермерлер полызыға нинҷе-де пас ат алай iнек пиргеннер. Оларға Хакасияның аал хонии министерствозы адынаң алғыстас пiчiктерi читiрiлген. Оларның санында Алтай аймаандағы Берёзовка аалдағы фермер Николай Данилко полған, хайзы 15 пас ат пирген. Iдӧк Боград аймаандағы фермер Василий Апрелковты паза «Адриановский» ООО-ны таныхтааннар. Василий Апрелков 210 муң салковайға тур парар 3 пас мал пирген.
Сергей Труфанов чардыхти мобилизацияа хабылған чааҷыларға хабасхан кiзiлерге Хакасия пазы Валентин Коноваловтың, республиканың аал хонии министерствозы адынаң улуғ алғызын читiрген паза полызыға пасха даа хоныхтар хозыларына iзенчем тiп искірген.
– Тоғызыңар ӱчӱн алғыс. Сiрер тынағ чох тоғынчатханнарың ӱчӱн, тоғызыңар аарласта. Кӧбiзiңер мал ӧскiрерiнең айғасча. Оларны сыбыра азырирға кирек, аннаңар пу тоғыс уғаа аар, – теен Сергей Иванович.
Асхыс аймаандағы фермерлер Татьяна Пакачакова паза Константин Чочиев СВО чааҷыларына хабасханнарның санында. Олар консерва сығарарына пiрер пас мал пиргеннер.
Асхыс аймаандағы фермер
Татьяна ПАКАЧАКОВА
Татьяна Пакачакова Картоев аалда чуртапча. 2009 чылда ферма хониин тӧстеен, герефорд тӧллiг маллар ӧскiрерiнең айғасча.
– Оолғым Альберт Украинада ӧнетiн чаа операциязында азығ айынаң сығара полған. Чарыс айында айланған. Ол контрактча служба апарған. Амды Н.Ф.Катановтың адынаң Хакас хазна университедiнде юристке ӱгренче.
Iкiнҷi оолғым Роберт срочнай служба иртче. Гуманитарнай полызығны, аннаң даа пасха ниме-нооны вагоннарға таарлапча. Кем нименең полыс полар, полызарға кирек сағынчам – теен Татьяна Виссарионовна.
Чарыс айында Асхыс аймаандағы аал хонии управлениезi чардыхти мобилизацияа хабылғаннарға полыс пирерге фермерлерзер айланғанда, фермер Константин Чочиев iкiнҷiлебин ӱндескен. Ол Асхыс чоғархы аалда маллар ӧскірерінең айғасча. Пӱӱл от сыхпааннаңар, хоных пазы прай отты садызып алған.
– Покостар пар даа полза, от ӧспеен, iзiге кӧй парған. Пуғдай паза сула таарыпчабыс. Пӱӱл тоңастығлар пір дее сыхпаан. Мал азии чохтаңар, мал санын кӧместең хызырчабыс.
Аал хонии управлениезi хайда от ниик арах паанаң садылчатханнаңар искiрген, че ӧӧнiнде пiс отты позыбыс тiлеебiс. Боград аймаанаң садысхабыс. 400-че тюк садызып алғабыс, – чоохтаан Константин Чочиев.
Автор :
Оксана ЧЕЛТЫГМАШЕВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
