ХАЙХАСТЫҒ РУЧКА ХАКАС ТIЛIН ӰГРЕНЕРГЕ ПОЛЫСЧА
27.01.2023
Хабарлар
«Добрыня» олған садының воспитательі
Наталья АРЧИМАЕВА группадағы палаларнаң хада
Чидiг. Ӱр ниместе Москвада «Минiң иң артых урогым» тиксi Россия синiндегi марығның финалы ирткен. Анда «Школа алнындағы хоза ӱгредiг» кӧстегде Ағбандағы «Добрыня» олған садының воспитательi Наталья Арчимаева iкiнҷi орынға турысхан
«Минiң иң артых урогым» марығны Россияның ӱгредiг паза наука министерствозы хабазиинаң М.В.Ломоносовтың адынаң Москвадағы хазна университедi, Москваның ӱгретчiлер университедi паза Менделеевтiң ис-пайы чыындызының коммерческай нимес пiрiгiзi иртiрчелер. Пӱӱл 15-ҷі хати иртірілген марығның халғанҷы чардығында 100 азыра психолог, логопед, дефектолог, музыка ӱгретчiлерi, воспитательлер паза даа пасха специалисттер опыттарынаң ӱлескеннер, тоғысха наа оңдайлар кирчеткенiн кӧзiткеннер. Оларның презентацияларын улуғ опыттығ, пӧзiк пiлiстiг ученайлар паза ӱгретчiлер паалааннар. Финалға сығып алғаннарның кӧбiзiнiң Чир-сууна хынысты кӧзiтчеткен тоғыстар полған. Жюридегiлер дее анзына улуғ хайығ салғаннар.
Хакасияның воспитательi Наталья Арчимаева, тiзең, хакас тiлiнiң ӱгредiг пособиезiнең таныстырған. Аны ол хада тоғынчатхан арғызы Наталья Павловна Григоренконаң тимнеен.
– Пособие чоохтанчатхан ручка полызиинаң тимнелген. Улуғ нимес стикерлерзер кiзi сӧстерi пазылча, оларзар ручканаң пазыбыссаң, чоохтанчалар. Iди пiс ибдегi аң-хус хакас тiлiнең хайди адалчатханын ӱгренчебiс, хайди олар тапсапчатханын исчебiс. Пособие, тiлнi ле нимес, iдӧк чир-чайаанны ӱгренерге оңдай пирче. Пiс мыннаң мындар олғаннарнаң хада пасха даа ниме-нооны ӱннендiрерге пӧгiнчебiс, – чоохтапча воспитатель.
Палаларға хакас тiлiн пособие пастыра ӱгренерге уғаа чапсых паза хынығ. Олар улуғ нимес стикерлернi хынып пасхлапчалар. Олаңай кинделердең кӧмес ирiк парғаннар нооза. Оларның хайиин наа технологиялар тартча.
Олған садында «Знаток» ручка пол килгенде, воспитательлер пастап аннаң ӱннер пазып ӱтертiнгеннер, че соонаң ирiк парғаннар. Че хакас группазының воспитательлерi аның тузазын чахсы пiлiп алғаннар.
– Ол стикерлерзер хакас тiлiнең аймах сӧстер пазып пастабысхабыс. Олғаннарның хынған «Синий трактор» мультфильмiн дее пос тiлiне тiлбестеп алғабыс, – хатхырча Наталья Иосифовна.
Ӱгредiг пособиезiн воспитательлер чарым чылҷа тимнееннер. Амды, ибдегi аң-хустаң пасха, ачын аңнарнаң танызып аларға чарир. Олғаннар аннаң хынып айғасчалар, аңнарны таныпчалар паза олар хайди тапсапчатханын оңарчалар. Мыннаң мындар хакас группазының воспитательлерi, iдӧк ручка полызиинаң cаннарны, ӧңнернi ӱгренер пособие тимнеп саларға пӧгiнчелер.
Мына пiди пу хайхастығ ручка хакас тiлiне ӱгредер киректе улуғ полысчы полча. Аннаң олғаннар тiлнi, чир-чайаанны ӱгренчелер, воспитательлер, тiзең, Россия синiндегi марығларда араласчалар, опыттарынаң ӱлесчелер, сыйыхтығ орыннарға турысчалар.
Автор :
Оксана СУНЧУГАШЕВА
| Пн | Вт | Ср | Чт | Пт | Сб | Вс |
| 27 | 28 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
