ӦТКІН ЧИИТТЕРНІ АЛҒЫСТААННАР
27.01.2023
Хабарлар
Жанна Чистогашева паза Екатерина Кобыжакова
ӱгредігде чахсы салтарлар кӧзітчелер
Сыйыхтас. Студенттер кӱнiнде Хакас хазна университедiнде ӱгредiгде, чайаачыда, спортта пӧзiк чидiглерге читкен чииттернi чеестееннер
Иң пурун студенттернi танығлығ кӱннең алғыстирға сценаа Хакасия пазы Валентин Коновалов сыххан:
– Пӱӱнгi кӱнде сiрер, наа пiлiстер алып, алнынзар хаалирына пик тӧстег тимнепчезер. ХГУ мағаа iдӧк чағын, мин мында ӱгренгем. Пiлчем, таңда сiрер пӧзiк пiлiстiг специалисттер поларзар паза Хакасиябысты тилiдерзер. 2023 чыл республикада Чииттер чылы тіп чарлалған. Аннаңар пӱӱл аның чуртазының полған на сферазында чииттер политиказын тилiдерiне уламох кӧп кӱс саларға сiренербiс. Анзы тиксi хазнабыстың стратегия тилiзiнiң ӧӧн кӧстеглерiнiң пiрсi полча. Амғы туста пӧзiк пiлiстiг специалисттер хайда даа киректер. Оларны, тiзең, пiстiң республикабыстың ӱгредiг заведениелерi, ол санда ХГУ, маңнаныстығ тимнепчелер. Студент тузы полған на кiзiнiң сағызында хаҷанға даа халча. Чуртазыңарның пу ӱзiгiн чалахай ла кӧңнiлiг иртiрiңер.
Iдӧк студенттерзер алғыстаc сӧстерiнең вузтың ректоры Татьяна Краснова сыххан.
– Алныңарда прай чоллар азых ползын. Пiстiң чииттерiбiс аймах марығларда, конференцияларда, олимпиадаларда тӧремiл ӧткiн араласчалар, пӧзiк салтарлар кӧзiтчелер. Анзына пӱӱнгi сыйыхтас киречi полча. Хакасия правительствозына чииттерге кӧп хайығ салчатхан ӱчӱн улуғ алғызым читiрчем, – теен ол.
ХГУ-ның улуғ аалҷылары санында полғаннар Хакасия пазының орынҷызы Михаил Побызаков, Федерация Чӧбiнiң сенаторы Александр Жуковтың орынҷызы Лариса Карпова, спорт министрi Сергей Кочан, культура министрi Светлана Окольникова, ӱгредiг паза наука министрiнiң орынҷызы Марина Захарова.
Маңнаныстығ ӱгредiг паза наукада iстезiглiг тоғыс апарчатхан ӱчӱн номинацияда иң кӧп кiзi таныхтатхан. Ӱгредiг паза наука министерствозының алғыстастарын алғаннарның санында Жанна Чистогашева паза Екатерина Кобыжакова полғаннар.
Жанна филология паза искусство институдында ӱзiнҷi курста ӱгренче. Позы ол Асхыс аймааның Полтах аалынаң. Ол наука-практикалығ конференцияларда паза олимпиадаларда ӧткiн араласча, саңай «пистерге» ӱгренче. Хакас тiлi ӱгретчiзiне ӧнетiн кӧстенiп парғам, аннаңар ӱгренiс аар пiлдiрбинче тiп таныхтапча чиит хыс. Чииттернiң кӧбiзi, институтты тоозып, городта халарға итчетсе, Жанна пасха сағынча. Ол Асхыс аймааның пiрее школазында тоғынарға пӧгiнче. Аалда хакас тiлi ӱгретчiзiне тоғыс табарға, узын тилiдерге оңдайлар кӧп арах полар тiп санапча.
Екатерина Орджоникидзе аймаандағы Майрастар аалынаң. Ол имнег колледжiнде тӧртiнҷi курста ӱгренче. Фельдшер полар чиит хыс имнег кирее, кiзiлерге полызары кӧңнiне кiрче тiп чоохтапча. Екатерина колледжте иртчеткен аймах мероприятиелерде, олимпиадаларда хынып араласча, чахсы ӱгренче. Чидiглерi мындағ пӧзiк синде таныхталарын сахтабаан, аннаңар сыйиина тың ӧрiнген.
ХГУ студенттерi, ӱгредiгдең пасха, постарын спортта уғаа чахсы кӧзiт турадырлар. Оларны Хакасияның спорт министрi Сергей Кочан таныхтаан.
Чайаачыда пӧзiк чидiглерге читкен чииттернi Хакасияның культура министрi Светлана Окольникова алғыстаан. Ол чахсы хабарнаң ӱлескен – пу ла кӱннерде Хакас искусстволар колледжi ӱгредiг тоғызын апарарына лицензия алып алтыр. Пӱӱл чайғызын андар пис специальностьча 75 абитуриент алылар. Светлана Анатольевнаның чооғынаң, 2023 чылға республикада аймах культура мероприятиелерi, чапсых проекттер кӧп кӧрiл парған. Ол чииттернi оларда ӧткiн аралазарға хығырған.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде